Urambuyo lwa Yohane 1
1
1Urambuyo ilu lumilie kwa Iṛuva. Ye andekuningia Yesu Kristo aoruse maketi amwi nalo filya fitanikaa kyeeri kikee kufui. Kalumanyisa iketi lyamwi Yohane eenrumiaa malaika wamwi. 2Na Yohane yye anderambua kirero kya Iṛuva na irambua filya Yesu Kristo andellolisa. 3Wwa ngoma ulya asomiaa firero fa wauya lu na wa ngoma valya vaaranyaa na iwara filya fikee fitisiṛe-fo. Fulya kyeeri ki kikee ifika.
4Niń Yohane namwisana ini mukee siṛi tilya mfungare tikee ifo Asia. Uwoo lukaa neeni na unambwe fuukie kwa ito eefo, nae eeifoo, nae ashaa, fuukie na kwa mimuyo ilya mfungare ikee mbele ya kifumbi kyamwi kya witoṛo. 5Fuukie na kwa Yesu Kristo akee nrambua ulya nsongori, ni ulya andebooka iwara muu eeukaa vafuń, akee nnini wa mamangi a isanga. Ito afikundie na itikiṛa mareko eru na usao lwamwi. 6Katiaṛua mamangi na vakohani kisanguń kya Ndee Iṛuva. Unini llwamwi na finya kumande miṛeṛe na miṛeṛe. Amen.
7Lleń te akee isha ariwa mmaṛumbe. Na miso woose alloliaa na a valya vandensimba. Na ngyufwari toose ta isanga vaishiṛaa kiimba kyamwi. Ee nkya dede. Amen. 8Niń nkee Alifa na Omega, nkee wa mbooko na wa ifurumia, nkuro Nndumi Iṛuva arera uu eefo, nae eeifoo, nae ashaa, muni wa foose.
9Niń Yohane nkee mwanamae wanu na mutańaṛia mavaviso na umangi lwa Iṛuva andu emwi neeni na ulalamboo lwa iverea Yesu Kristo. Nnderawa kyurukeń kilya kikee kari ka nruva kiivaangwaa Patimo, fulya nndekwanisa kirero kya Iṛuva na irambua Nndumi Yesu. 10Nkonu umwi wa Iṛuva nndewarwa mMumuyo naita ununga unini numa yakwa sha ununga lwa wembe. 11Lukashiia: Kilya kwallolia kitisiṛe kitabuń kukirikie siṛi tilya mfungare tikee ifo Efeso na Simirina na Perigamo na Tiatira na Saride na Filadelifia na Laodikia. 12Nań naaṛuka nille ununga lua lwarera nań. Namaaṛuka nalolia taa mfungare ta saabu. 13Na kari ka taa to nalolia nndu avakani na nndu wa vandu. Nae aṛee nseto mwaasha, na mbafuń aṛeefo kitati kya saabu. 14Nrwe wamwi na mafuli amwi kikee feelwa fyu sha mbaamba ana sha mboṛongo. Na miso amwi eekee sha kibalabala kya muro. 15Na marende amwi nsha minya yansokulwa nnu iikalakalaa ifo muroń. Na ununga lwamwi lwikee sha kiṛuṛumu kya mura nnini. 16Na ukoń lwamwi usha eeworee nyinyiri mfungare na kaniń kamwi ikauka-fo shombo shooi kuvili. Na kisangu kyamwi kiikee sha saa ikee ivaa na finya yayo. 17Nań ili nndellolia nawa io marendeń amwi sheeli nkee mfu. Nae kasheekeṛia uko lwamwi usha kashiia: Manya kuteeṛee! Nniń wa mbele na wa ifurumia. Niń nkee muni muu. 18Niń niikee mfu, a te nkee na muu alli na matika woose. Nań noore finya ya yuta vandu ufuń na ya ivinga ufu.
19Kyasia tisiṛań mboni to kwalolia na ifo fiifo na filya fivaa numa. 20Kya kiṛisi kya nyinyiri tilya mfungare kwatilolia ukoń lwakwa usha na kya taa tilya mfungare ta saabu manya: Nyinyiri tilya mfungare vveesi va siṛi tilya mfungare, na taa tilya mfungare nsiṛi tilya mfungare to sheni.
Currently Selected:
Urambuyo lwa Yohane 1: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
