Barua ya Yuda 1
1
1Niń Yuda nkee iketi lya Yesu Kristo na mwanamae wa Yakobo. Neesana vavaange valya vakee vakunde ni Iṛuva Nde na iringio Yesu Kristo. 2Engeṛio̱ń ililia na unambwe na ikunda.
3Vakunde, ili niikee itania utomari nnu imutisiṛia mboni ta ikia lyeru ise ti woose, nalolia sheeli kyanshiwara imutisiṛia niimwikimbaa, amu muvinganie ikusura lyo linderambikio̱ vasongori limwi nsi. 4Amu veefo vandu vandekwata siṛiń kwa kiṛisi, nawo wandu vantisiṛio kuuka mbele uumisio ilu. Vvalea Iṛuva veekasheesaa uwoo lwa Iṛuva weru na waaisi Iwawo. Nawo vakee ikana ito akee nnini weru ye muni, yye Nndumi weru Yesu Kristo.
5Kake mfurie imukumburusa — mweemmaa imanya ifi foose — sheeli Nndumi andemaa ikiṛa vandu vamwi va Isiraeli kulya urukefi lwa Misiri, na lingi kareta valya vatankusurie. 6Na vamalaika valya kitaare vanderinga unini lwawo veni vakatia firembo fisumani nawo kavafinga na mise itafikaa vavere nkonu tilya nnini vaumisio. 7Sha lia vandu va Sodomo na va Gomora na va miṛi ilya ikee miyanuń yawo vandelatia waaisi sha iwo vakasoṛa mikae ya kivvili kitaare yya kimia, na kilya vandetawa nakyo ni iretwa na muro utarunyikaa. 8Mfo kuro na vafulute mirwe iva vakafuuta mivili yawo na ibiṛa unini lwa Iṛuva na iruma valya vawore miitoṛio. 9Kake Mikaeli malaika ulya nnini ili andevingania na Satana nnyińa wa Mose na yuṛana nae, nta andekaṛia inruma ndi, kake anumbua: Nndumi akukabe. 10Kake vandu sha iwo varumaa filya vatafiishi, na filya vafiishi kwa kimia sha mafisi atawore uṛango vakukasheesaa nafo wo veni. 11Ushi wo, fulya vandeenda shień ya Kain veesoṛaa urekwa lwa Bileamu kiimba kya maṛe a ulembi, nawo vakarekia uretiń sha Kora. 12Vandu va vakee ilya andu emwi neeni miliyeń yanu ya makundano vakee va ukwe lwa nrimiń vakakuwuurusawo vatawore sonu. Wo nsha maṛumbe atawore fua eeriwaa mmburaato. Vakee sha miri yammaa yangara itawore nta nunda, yammaa yuma kavili na iiṛulwa kuru. 13Vakee sha mavia a nruveń atavaa iirisha veerosaa ukasha lwawo veni sha mavia. Vakee sha nyinyiri tiiṛaaṛaa. Na dińu yawo veemfisio̱o̱ ni llema wa miṛeṛe. 14Na Enoki nkuuku ulya wa mfungare kuuka Adamu aringisia kyawo eereraa: ”Lla Nndumi ansha ariani na vasongori vamwi mafiku na mafiku, 15amu aumisie vandu woose na ireta woose vawore beṛebeṛe kya mitanie yawo yoose ilya vayamareko wo vandelea nayo Iṛuva na kya firero fawo fa kirumu vandenrera nafo“. 16Vandu va wańuńura na vaiyaiya na ilatia malanga awo. Na kana kawo karera firero finini fa ukushombi veekundiaa vandu kiimba kya mbusha valya vawore tikisi.
17Kake ini, vakunde, kumbueń firero filya farerwa ilyo mbele vvarumi va Nndumi weru Yesu Kristo. 18Amu vandemuia sheeli: Kyeeri kya ifurumia vavaafo vandu va iteenda veesoṛaa ilanga lyawo veni lya ureti. 19Vandu wo wwo vannde mwavanu, vakee vandu va isanga li da vatawore Mumuyo Nsongori. 20Kake ini, vakunde, kuroongień ikusura lyanu likee isongori na itereva muworwa mfinya ya Mumuyo Nsongori. 21Kuringeń mu veni mwikaa na ikunda lya ikunda Iṛuva na iverea ililia lya Nndumi weru Yesu Kristo limurwaa muuń utakisiaa. 22Na iva vakee na inunua valilień 23mwivatafuraa muroń na ivakiṛa. Na valya vengi valilień mukee na weṛei mwisuaa na akwaa mmasaṛa awo akee mafuute kiṛinda kya mivili yawo.
24Kake ito awore imakii lya imuringa mutakubaaye na imusumanisa musalale mbele ya unini lwamwi na inkabia mindoṛo ateefo malomi: 25Yye Iṛuva ye muni Mutikiṛa ise kwa Yesu Kristo Nndumi weru. Tikisi yyamwi na unini na imakii na finya kuuka mbele na alii na kumande miṛeṛe! Amen.
Currently Selected:
Barua ya Yuda 1: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
