Barua ya Yakobo 5
5
1Kyasia ini masimba, iyeń na iishiṛa kiimba kya ngyukiva tanu timusheaa. 2Masaa anu ambwaa na masaṛa anu alliwa mmakurukuru. 3Saabu tanu na fesa tanu tawwarwa nnguraa, na nguraa yayo imusutaa, nayo ilyaa mivili yanu sha muro. Alli mikonu ii ya ifurumia mwamiitiṛimu masaa. 4Manyiń maṛe a vaṛundi valya vandeilula nremiń tanu alya ini mundevaima akee ikaba kiṛoṛongyo na fiiyo fa valya vandeilula famaaka marwiń a Nndumi akee muni matoroto. 5Ini mwallya fisha foose fikee kunu isangeń na inyanyata masaa mukaboṅisa mirima yanu sha vandu vakuboṅisa mikonu ya isikya nyama. 6Ulya nsumani mwamuumisia na iwwaa, nae nta avingana neeni ndi.
7Kyasia vanavama, sisirień kumande Nndumi ashaa. Lleń te nndu nremi akee iverea filimu fa nrema tamwi eesisiriaa kiimba kyayo kumande fua ya kisie na ya mateeri ikabaa. 8Neeni sisirień kuro mwikaarisaa mirima yanu, amu nkufui Nndumi ashe. 9Vanavama, manya mutakuṅuṅurie, kaaṛa mutaumiso̱. Lleń muleta aselele mwaangoń. 10Vanavama, kulosheń na vaauya wo vanderera na irina lya Nndumi, kasa vandetuṛulwa na isisiria ngyukiveń tawo. 11Lleń te tikee illa valya vasisiria sheeli wo wa ngoma. Mwamiita kya isisiria lya Yobu na sheeli Nndumi andeliinutia. Kumanyiseń nakyo sheeli Nndumi akee na wooṛoo na ililia iingi.
12Kake mmwasi wa foose vanavama, manya mutalye ikite nta na iṛuvewu ana nta na isanga ana ikite na kindo kingi kyoose. Kake mukanumbua: Ee, kive ee dede, mukanumbua: Wode, kive wode dede, kaaṛa mutawe uumisioń. 13Nndu wa kwanu kankooya mavavio atereve Iṛuva. Awore ifura aimbe ngyufina. 14Nndu wa kwanu kawa nroiye avaange vashili va siṛi, nawo vanterevie na imwaamba mafura na irina lya Nndumi. 15Na kiterewo kyo kya ikusura kikiṛaa ito aroiywa na Nndumi amwimboo. Kantana mareko atio̱o̱. 16Kyasia kurambuyeń mareko anu ini mu veni na mu veni na ikuterevia mukooye ikiṛwa. Kiterewo kya nndu nsumani lyelekaa deń kantereva na utomari. 17Elia eekee nndu wa mikae imwi neese. Nae katereva na utomari, amu fua itakabe. Na fua nta ikaba isangeń kyeeri kya myaka iraru na miiri irindaru. 18Katereva lingi na iṛuvewu likaotoṛa fua na isanga likamirisa nunda tayo.
19Vanavama, kwakooya nndu wa kwanu arekio̱ kilya kikee kya dede na nndu ungi kawwiiṛa, 20manyiń sheeli ulya awiiṛa nrekwa eemwutaa shień ya ureti akiṛaa nrima wamwi na ufu na isikia wiingi lwa mareko.
Currently Selected:
Barua ya Yakobo 5: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
