Barua ya Yakobo 4
4
1Fira yukie kwi na myaandu ikee kwanu yukie kwi? Yukaa milangień yanu se yantaa ngabanu kari ka meeṛo anu? 2Muwore ilanga, kake nta kindo muwaraa. Mukee ikwiria iriso na ikuwaa, ana nta kindo mukooyaa. Mukee iṛuya fira na myaandu, kake nta kindo muloliaa, fulya mutakee itereva. 3Na akwaa mukee itereva, nta kindo muwariaa, fulya mukee itereva kikasha, amu muṛundie nafo milangie yanu. 4Ini vaaisi, mwishi se sheeli iwara ndoo na isanga ni iva kituva kya Iṛuva? Kyasia ulya akundaa iva ndoo ya isanga akwaṛua kava kituva kya Iṛuva. 5Ana mwishi sheeli mitisiṛie yarera kya ruu? Mumuyo ito akukaarisa kari keru alangie nnu ivingana na iira iriso. 6Kake uwoo lo atiaviaa ni unini lwilanyi. Kwa ikyo mitisiṛie irerie: ”Iṛuva aleaa valya vakuṅinisaa, kake valya vakunyiisaa avaaviaa uwoo“. 7Kyasia irikień Iṛuva. Leeń Satana nae amurishaa. 8Serikień Iṛuva, nae amuserikiaa ini. Sangyeń maako anu ini muwore mareko na iilisa ngoo tanu ini muwore mirima ivili. 9Manyiń ukiva lwanu na iṛiika na iiya. Seko yanu yaṛuke ive kiiyo na ifura lyanu live unaṛi. 10Kunyiiseń mbele ya Nndumi, llyo nae amuṅinisaa. 11Manya mutakuṛiinge, vanavama. Ulya aṛiingaa mwanamae ana yumisia mwanamae akee iṛiinga mavavaso na yumisia mavavaso. Kake kwaumisia mavavaso kuvaa mwawutia mavavaso ndi, kake kwavva mwumisia mwanamaa. 12Muniingia mavavaso na mwumisia ni umwi da, yye amakii ikiṛa na ireta. Kukee i iwe kuumisiaa ungi?
13Kyasiań ini munumbuaa: Nnu ana ndesi teendaa muṛiń llive na ikaa-fo mwaka umwi na ikaba mbusha na iifumbuta 14muteeshi kilya kivaa ndesi. Muu wanu nto kiki? Amu ini muvakani na musu ulolikaa kyeeri kyaangu da, lia eni ukareka. 15Andu a firero fo fanu kiimuviaa ṅwana inumbua: Nndumi kankunda tivaa na muu na itana kuri ana kuri 16Kake alli mukee ikushomba na makusaṛo anu awore ukwishiki. Ikushomba lyoose lya mikae ii ni ikasha. 17Kyasia ulya eeshi filya fikee fisha fa itana kalea ifitana ito kwamwi ni ireka.
Currently Selected:
Barua ya Yakobo 4: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
