Barua ya Petiro ya mbele 1
1
1Niń Petiro nkee nrumi wa Yesu Kristo. Namwisana ini mukee vasaue mulele ifo Ponto na Galatia na Kapadokia na Asia na Bitinia mukee vanyanyate mwikaa-fo winiń. 2Fulya mwandengio̱ ni Iṛuva Nde mwiliswa mMumuyo Nsongori, amu mukooye ikusura Yesu Kristo na ifwalio̱ usao lwamwi. Uwoo na unambwe feengeṛio̱ kwanu!
3Aarafumwa Iṛuva akee Nde wa Nndumi weru Yesu Kristo andetililia na ililia lyamwi iingi katiira lya kavili tiware iverea linnde muu kiimba kya miṛukie ya Yesu Kristo kwa vafu. 4Llyo atiniinga diṅu itakisiaa ana itakashaa ana yuma. Ii mufisio̱ ini kulya iṛuvewu. 5Lingi mukankaa na ikusura muringwaa mfinya ya Iṛuva mukooye ikiṛwa lyo lyandeeṛio̱ lya ilolika na baa nkonu ulya wa ifurumia. 6Kwa ikyo mukabaa nndoṛo na akwaa kyamuwara alli iṛiika kyeeri kyaangu mwielelio̱o̱ mfindo fa mikae miingi, 7amu ikusura lyanu lyelelio̱ kwakooya llya dede na ilolio̱ akwaa liwore uuru kita saabu ikashaa, nayo yelelio̱o̱ muroń kwakooya nshinuru. Mukawa kuro mukooyaa nsendo na tikisi na unini, ili Yesu Kristo alolikaa. 8Nae munkundie kitaare mullolie mukankusura ateefo kisanguń kyanu. Kwa ikyo mukabaa nndoṛo mwiwarwaa ni ifura litavaa isenda likee iilise. 9Llyo mufitaa mmando wa ikusura lyanu, ni ikiṛwa lya mirima yanu.
10Kya mboni ta ikiṛwa lyo vaauya vakatiṛuyaṛuya na isunundasununda, nawo wwo varingisia mboni ta uwoo lua lumusheaa ini. 11Vakaṛuya nkyeeri ki na nkyeeri kya mikae ingai veeikimbwaa mMumuyo wa Kristo ulya eekee kari kawo, ulya abooka ivaringisia mavaviso alya akooyaa Kristo na unini lua luwiaa numa ya ifo. 12Vakarambuywa sheeli nkiimba kyawo veni ndi, kake nkwa kiimba kyanu vandeatarikia mboni to. Na alli tamoongoywa kwanu vvalya vandemwendee ini nrumi shisha kwa finya ya Mumuyo Nsongori anderumwa auka iṛuvewu. Mboni to na akwaa vvamalaika valangie itilla.
13Nkyo kiteveto mukusongosie mirima yanu muvakani na vandu vakufingie fisiń. Mukootoye mwivereaa deń uwoo lu mwendio̱o̱ ni Yesu Kristo ili alolikaa na baa. 14Ili mwawa vana va Iṛuva vawore imwindia, mutakilatie milangie yanu ya mbele ilyo mwikee kwaasha na Iṛuva. 15Kake sheeli ulya andemuvaanga akee nsongori, mfo kuro neeni veń vasongori weendoń lwanu loose. 16Amu nkitisiṛe: ”Muve vasongori, fulya niń nkee nsongori“. 17Na kwakooya mukee ivaanga Vaava ulya aumisiaa nndu woose atawore kikundia kwa kiṛengo kya mashoṛa amwi, endeń na weṛei kyeeri iki kyanu kya ikaa ia sha veeni. 18Neeni mwishi sheeli mundetaulwa nta nna findo fikashaa ndi sha fesa ana saabu, amu muuke weendoń lwanu lutasumani mundewaria kwa vaande yanu. 19Kake mwantaulwa na usao lwa Kristo lwa uuru andekuniingia sha ngarina ya yaanri itawore ilomi ana ibaṛanga. 20Nae eenrawaa kuuka mbooko kitaare isanga findetanwa, kake arambulwa baa kyeeri iki kya ifurumia kiimba kyanu. 21Amu yye andemwaṛua muve vakusura Iṛuva uu andenduta kwa vafu na inniinga unini. Nkyo kiimba ikusura ifi lyanu lirie na iverea lya iverea Iṛuva. 22Mukammaa iilisa mirima yanu na iirikia filya fikee fa dede kumande mwafikia ikundana na vanavamae fitawore ukavili, kyasia engeṛień ikundana na nrima mu veni na mu veni. 23Fulya mwamiiriwa lya kavili nta nna mbeu ikashaa ndi, kake nna ilya itakashaa, nkyo kirero kya Iṛuva kiwore muu kikaa kumande miṛeṛe. 24Amu: ”Nndu woose nsha maṛe na usha lwamwi loose nsha kivaṛo kya maṛe. Maṛe aumaa na kivaṛo kyayo kyangaraa. 25Kake kirero kya Iṛuva kikaa miṛeṛe”. Nakyo nkyo kirero kilya kindemukwanisio̱ kikee nrumi shisha ya ikia.
Currently Selected:
Barua ya Petiro ya mbele 1: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
