Barua ya Yakobo 3
3
1Vanavama, manya mutave veengi vaṛuya mashoṛa a ilosha mwimanyaa sheeli ise valosha tikooyaa uumisio unini mmwasi. 2Amu ise ti woose tikee varekwa kwa findo fiingi. Nndu atarekio̱ nta kimwi eereraa, ito ni nndu nsumani deń, amakii iima na wili wamwi woose. 3Lleń te tirwaa uruu kaniń ka nshungu, amu utiirikie, kuro tikabiṛiaa wili wayo woose. 4Lingi lleń ngalava lla kasa tikee nini nnu na ikurikwa mmburaato ta finya, nato taaṛuywaa ni ubau unnya taari ilya mukurika ngalava afuraa yenda. 5Mfo kuro na ulumi nkyeenga kinnya kya wili lukakuṅinisa findoń finini. Lla te muro munnya ukee ikoṛa nsito nnini. 6Na ulumi mmuro. Kari ka feenga fa wili weru ni ulumi luwore ukasha wiingi, lukee ikasheesa wili woose na ikoṛa mikae yoose ya muu lukakangio̱ weni nSatana. 7Mikae yoose ya mafisi na ndee na shoka na mafisi a mureń yakabiṛio̱ ni nndu ikammaa ikabiṛio̱ kuuka mbele. 8Kake nta nndu amakii iima ulumi, ni ukasha lutamakii isia do, lwishule saiye ya ufu. 9Tikee iṅinisa nalo Iṛuva Nde na idenga nalo vandu vandeumbwa-umbwa vavakani na Iṛuva. 10Iṅinisa na idenga fikee yuka kaniń kemwi. Vanavamae vakwa, kitamuvie kuri ndi. 11A iriso lya mura limwi limakii innde mura uloraa na mura uvavaa kiṛukioń kimwi? 12Vanavama, a nri wa nkuu umakii ivika nunda ta nsenifu ana nsabibu uvikaa nunda ta nkuu? Mfo kuro da iriso lya mura wa munyu limakii innde mura uloraa ndi.
13Ni i awore uṛango na imanya kwanu? Aoruse mashoṛa amwi na mitanie imilie weendoń usha lusumani na uwoo na uṛango. 14Kake mukamiira iriso liwore kivawwo na nkuru mirimiń yanu, manya mutakushombe ana mutarere wongo andu a dede. 15Amu uṛango lo llo lua lushee luuka iṛuvewu ndi, kake llwa isanga na lwa mikae ya kinndu na lwa Satana. 16Amu andu alya awore iriso na nkuru wwo awore iraanga na mitanie yoose mikasha. 17Kake uṛango luukie ule lya mbele ni usha, lingi llwa unambwe na lwa uwoo na lwa windi lwa iindia vengi. Lwishule mitanie misha na ililia, loore inunua ana loore ukavili ndi. 18Kake mbeu innde usumani iveekio̱o̱ unambweń walya vatanaa kya unambwe.
Currently Selected:
Barua ya Yakobo 3: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
