Barua ya Yakobo 2
2
1Vanavama, manya mutakusaṛe sheeli ikusura Nndumi weru Yesu Kristo muni wa unini liitani na ikundia vandu. 2Amu kwakooya ifo ikwanioń lyanu aakaafo nndu awore nrashi ta saabu miniń, aṛee na miseto minuru, lingi kaaka-fo nkiva aṛee miseto misalutu — 3neeni mukalla ulya aṛee miseto minuru na imwia: Iwe kaa rembo ia anuru, na iia ulya nkiva: Iwe salala ifo ana kaa rembo ia marendeń akwa, 4a le mwantana se ilomi mirimiń yanu mukava vafukya vawore makusaṛo makasha? Vanavama vakunde, aranyiń: A Iṛuva asaua se valya vakee vakiva va kunu isangeń vave masimba a ikusura na vayadiṅu ya umangi eendeeṛiaa valya vankundie? 6Kake ini mwamiila nkiva ulya. A masimba wwo se vakee imulamia na imurwaa mbele ya fifumbi fa uumisio? 7Iwo wwo se varuma irina lia isha lindemusendio̱ (ubatisoń)?
8Ee da kwakooya mwaawutia ivavaso lia lya kimangi sheeli kikee kitisiṛe: ”Kunda nndu ungi sheeli kukukundi ku muni“, mwantana kisha. 9Kake mukankundia vandu mwantana ireko na yumisio̱ ni ivavaso sha vatana fikasha. 10Amu kwakooya nndu aindia mavavaso woose kakasheesa-wo limwi tubu, ammaa ikasheesa woose. 11Amu ito anumbuye: Manya kutaaike, yye muni anumbuye: Kutawaa vandu. Nawe kwara kutaaika, kake kwavva wwaa, kyasia kwammaa ikasheesa mavavaso. 12Rereń na itana taniń kuro sha vandu vairikie mavavaso afingie nrumi shisha ya Iṛuva vakakunda yumisio̱ kisumani na mavavaso wo. 13Amu nndu ateeworee ililia ito aumisio̱o̱ kyumu atakooyaa ililio̱ nta. Kake muya ililia aendaa uumisioń luteefo weṛei.
14Kyelekaa ki, vanavamae vakwa, kwakooya nndu anumbua: Nkusurie Iṛuva atawore mitanie? Ikusura lya mikae ii limakii inkiṛa? 15Kwakooya nndu mwanamae ana mfwamae atuṛa kya iṛaa kaanguywa nshoonga 16na umwi wanu kavaia: Endeń na unambwe, oreń muro, wuureń, kavaima kilya wili wawo ufurie, iki kivaelekaa ki? 17Mfo kuro ikusura fitawore mitanie ni ifu, fulya fikee lyo yeni. 18Eeba eefo nndu anumbuaa: Iwe kuwore ikusura, nań noore mitanie. Shiorusa ikusura lyafo litaare mitanie, nań nkworuse ikusura lyakwa kwa shia ya mitanie yakwa. 19Iwe kukusurie sheeli Iṛuva ni umwi, kwankusura kuro nkinuru. Masatana nawo vakusurie iki na irerema. 20A iwe kukee nndu atakusaṛie kindo kumanyaa se, sheeli ikusura fitawore mitanie nkindo kya ruu?
21A nde yeru Abraamu andesumaniswa se kwa mitanie, ilyo andeniingia mwana wamwi Isaki ave kirasio? 22Kulolie sheeli ikusura lyamwi lindeṛunda mashoṛa andu emwi na mitanie yayo na sheeli ikusura lyo lindeawukia kwa shia ya mitanie ilya. 23Kikaawukia kilya kikee kitisiṛe sheeli: Abraamu akusura Iṛuva kataalio̱ sheeli ni usumani kwamwi. Nae kavaangwa ndoo ya Iṛuva. 24Mulolie sheeli nndu ataalio̱ usumani kwa mitanie yamwi, nta nkwa ikusura lyo yeni ndi. 25Mfo kuro na akwaa ni Raabu nka ulya wa shia andetaalika se sheeli awore usumani kwa mitanie, lia andewaria varumi valya kavasama na shia ingi? 26Amu sheeli wili utawore mumuyo ukee mfu, mfo kuro na ikusura lituṛie mitanie ni ifu.
Currently Selected:
Barua ya Yakobo 2: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
