Barua ya Vaebrania 7
7
1Melikisedeki ulya eekee mangi wa Salemu na nkohani wa Iṛuva uu akee iṛuvewu ule. Nae kandeondoṛa Abraamu ifi auka fireń ilya ya ivinga mamangi alya kanniinga mboṛa. 2Na Abraamu kamfukiya kyeenga kya ikumi kya findo filya foose andewara fireń. Misendie ya irina lyamwi lya mbele ni: mangi wa udede, fingi: mmangi wa Salemu, nkimwi na mangi wa unambwe. 3Ndee na mae na vakuuku vamwi veeshiwa ndi, ana awore kyeeri kya muu wamwi kyabookia ana kyamanda ndi, amu awakaniswa na Mwana uu wa Iṛuva akaa nkohani wa miṛeṛe.
4Lleń te sheeli uu eekee nnini, nde yeru nnini Abraamu kanniinga kyeenga kya ikumi kya mifungwa ilya. 5Na kari ka vana va Levi valya varambikio̱ ukohani nawo vaniingio̱ ivavaso lya yuta kyeenga kya ikumi kwa vandu kisumani na mavavaso, nawo wanavamae vawo vamilie kwa Abraamu. 6Kake ulya kitaare wwa uṛiti lwawo andewaria kyeenga kya ikumi kya findo filya fa Abraamu kanniinga mboṛa ulya akee na kirekio kilya. 7Ana iki kileekie kutu sheeli munnya aniingwaa mboṛa ni nnini ndi. 8Na ia vandu vakee vaya ufu vawariaa kyeenga kya ikumi, kake ulya akee irambulwa sheeli eefo na muu. 9Lingi kimakii irerwa sheeli kya shia ya Abraamu na akwaa lLevi ulya awaria kyeenga kya ikumi andeniingia kyeenga kya ikumi. 10Fulya eekikee ifo kisiń kya nkuuku wamwi ilyo Melikisedeki akwania nae.
11Kyasia kifo lwiifoo usongovisi lufile kyeeri kya ukohani lwa Levi — fulya vandu wo vakooya ivavaso kiimba kya ukohani lo — kiifo kiteveto lingi kya nkohani ungi ashe wa mikae ya Melikisedeki ana nta atataalikio̱ mikae ya Aron? 12Amu ukohani lo lukankwilasha kyawara na uvavaso nalo lwilashike. 13Amu ulya andererwa na firero fo eekee wa uṛiti lungi, kitaare amuuka nndu uṛitiń ilo wa iṛunda mashoṛa a irasia. 14Amu kimanyikie na baa sheeli Nndumi weru amilie ifo kwa Yuda, ni uṛiti kitaare Mose arera nta kirero kimwi kiimba kyayo ifo mboniń ta ukohani. 15Lingi ifo tikee irera mfa baa mmwasi kya kita, ili nkohani ungi arawa-wo avakie Melikisedeki. 16Nae andeva nkohani kwa mivavasie ya uvavaso lukee lwa shia ya kivvili ndi, kake andeva kuri kwa finya ya muu utawore mmando. 17Amu arambulwa sheeli: ”Iwe kukee nkohani wa miṛeṛe wa mikae ya Melikisedeki“.
18Nakyo nkyo kindeuta ivavaso lia lindebooka, fulya liikee itanyari litaare finya. Amu ivavaso lia nta kindo lyaawutia. 19Andu ayo likaatwa-fo iverea likee inuru mmwasi, fulya timakii iserikia nalyo Iṛuva. 20Manyiń liifo ikite lindeliwa. Amu valya vandeva vakohani liteefo ikite. 21Kake ye anderawa na ikite ni ulya, andemwia: ”Nndumi allya ikite, nae eelashaa ndi eenumbuaa: Iwe kukee nkohani wa miṛeṛe“. 22Kyasia kwa kiṛengo ki Yesu andeva nsalaba wa mma ikee shinuru kita ilya ingi.
23Lingi valya vandeaṛulwa vakohani vveengi, fulya vandeimwa ni ufu veekaa. 24Kake ye fulya akaa miṛeṛe awore ukohani lwamwi lutasendukaa. 25Nae kiimba kya ikyo amakii ivakiṛa deń valya vasheaa Iṛuva veesalalio̱o̱ yye, fulya akee na muu kyeeri kilungani, amu avaterevie-wo. 26Amu kindetiwara ise iva na nkohani nnini wa mikae ii akee nsongori atawore ukasha, atawore teve nta imwi na ilakaniswa kalakaniswa na varekwa, akee ule kita iṛuvewu. 27Amu ye awore kiteveto kya nkonu tiṛi sha vakohani vengi vanini ndi valya veerasiaa mbele kiimba kya mareko awo veni, numa vakarasia vandu nawo kiimba kya mareko awo. Amu ye amaa itana ifi limwi tubu, ili andekuniingia ye muni. 28Amu uvavaso lua lukee yaṛua vandu vave vakohani vanini vawore utanyari, kake kirero kya mma ilya indesha numa ya uvavaso kinderwaa-wo Mwana akaa miṛeṛe aawukie koose.
Currently Selected:
Barua ya Vaebrania 7: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
