Barua ya Vaebrania 13
13
1Kaań na ikundana sha vana va nka. 2Manya mutarekio̱ iwaria veeni, amu kwa shia ii vengi vawwaria vamalaika, nawo veni vateeshi. 3Kumbueń iwo vakee vafinge sheeli neeni mwafingwa andu emwi nawo. Mukumbue iwo vakee ituṛulwa, amu mukee na vvili shawo. 4Ihingana lya vandu vaalikie liirio̱ sonu vvandu woose, na kiraa kyawo manya kitasutwa, amu Iṛuva aumisiaa vaya ukwe na vaaisi. 5Manya mutave vandu vakuwore na unyuku, filwań mfilya fikee fanu. Amu ye muni anumbua: ”Nkureaa ndi, ana niiwukanaa nawe ndi“. 6Kwa ikyo tikee ikaṛia irera: ”Nndumi yye asheelekiaa, neṛeaa kindo ndi. Nkiki vandu vamakii ishitania“?
7Kumbueń veesi vanu valya vandemuia kirero kya Iṛuva. Mulle nnu ifurumia lya weendo lwawo musoṛe ikusura lyawo. 8Yesu Kristo wwa mikae imwi nsi kuuka mbele na alli na kumande miṛere. 9Manya mutafulutwa mmiloshie ingi itasumani imusheaa. Amu kilya kikee kisha kya yumisa ngoo ni uwoo lwa Iṛuva, nta mmiliye ya shoonga ndi. Yo yendee valya vakee ikwataria nayo mbusha ndi. 10Ise toore kirasioń kitaare valya vakee iṛundia yema lia vawore muumu wa ilya kilya kiiyo (nshoonga ya Nndumi ya waaṛo). 11Amu nyama ta findo filya usao lwayo lukee inndwa ni nkohani nnini andu alya asongori lwa iwolisa mareko to tikoṛio̱o̱ wooṛo ya muṛi. 12Nkyo kiimba na Yesu kalisio̱ ukiva wooṛo ya mbenge ya muṛi (Goligota), amu ailise vandu vamwi na usao lwamwi weni. 13Kiimba kya iki ise tisomuke muṛiń ulya tilungane nae wooṛo tiikurikaa na usutu lua andeluekeṛio̱. 14Amu kunu toore muṛi ukaa ndi, kake tikee iṛuya ulya ukaa. 15Tikankaa nae tuutie Iṛuva nsimbika wa imwitikisa matika woose, nto wavi lwa fiṛomu filya fikee irambua irina lyamwi. 16Manya mutarekio̱ itania vengi finuru na yaviana nawo, amu miniingie ya mikae ii yyo isenyaa Iṛuva. 17Irikień iwo vamwirie mbele na ivakunyiisia, fulya iwo valalaa rembo veekusaṛiaa mirima yanu, amu wwo vakaa vauṛwa kiimba kyayo. Kutomariseń itana kuro, amu vatane mashoṛa awo na ifura kitaare vakee idia, amu iki kimwelekaa ndi.
18Titerevień! Amu mirima yeru ikee itirambuya filya tiishi sheeli: Tifurie iva na weendo unuru findoń foose. 19Kake nkee yengeṛia imwikimba mutiterevie kuro, amu wwiiṛwa kwanu ree.
20Iṛuva muni unambwe andeṛuta Nndumi weru Yesu akee mwisi nnini wa maanri ifo kwa vafu kwa usao lwa mma ya miṛeṛe, 21Iṛuva uu amuniinge finya ya itana mifurie yoose ilya afurie! Ye akaarise mirimiń yanu kilya kinsenyie eemurwaa shień ya Yesu Kristo. Uu eetikiswa miṛeṛe na miṛeṛe! Amen.
22Kake namutereva, vanavama, warień firero fi namwikimba nafo na uwoo, amu namutisiṛia kwa firero faangu. 23Manyiń sheeli mwanamae weru Timoteo ammaa iboṛomulwa. Kansha ree tikwaniaa neeni andu emwi nae. 24Isaniń woose vamwirie mbele na vasongori woose. Vanavamae veru vakee ifo Italia vamwisana.
25Uwoo lukaa neeni mu woose!
Currently Selected:
Barua ya Vaebrania 13: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
