Barua ya Vakolosai 2
2
1Amu mfurie mumanye ivingana lyakwa likee inini lya imuvingania ini na valya va Laodikia na valya vatandeshilolia kisangu kyakwa, amu vaimuruswa mirima yawo veelunganisio̱o̱ ikundeń vakooye usimba loose lwa uṛango na baa lwa imanya deń kiṛisi kya Iṛuva, nakyo nKristo. 3Amu kwamwi ye masaa woose a uṛango na imanya mfo fifisie. 4Nkee imuia kirero ki, amu nndu atashe amulembe na firero fa imukaba nrwe. 5Amu na kwakooya ntaiyo na wili, kake nkee andu emwi neeni na nrima niifuraa ilolia walio lwanu na udede lwa ikusura lyanu lya ikusura Kristo. 6Kyasia sheeli mundewaria Nndumi Yesu Kristo, mfo kuro endeń mukuwore nae. 7Muve vakuveekia si kwamwi na ikusongosia na ikukaarisia ikusureń sheeli mundeloshwa na yengeṛia iniingia yaana. 8Kulleń amu nndu atamuware uketi na miloshie ya ruu na ulembi lwa mboni ta ruu tiriani na sewu ta kivandu ana na ngyufundo ta kiisanga titariani na Kristo.
9Amu kari kamwi ye mfo ilolikie mboṛa yoose ya Iṛuva. 10Na ini mwankooya mboṛa ii yoose kwamwi ye akee nrwe wa unini na witoṛo loose. 11Na irinwa mukarinwa andu emwi nae urini lutakee lwa maako, lwalakana na mikae ya kiwili iwore mareko, kuro llyo irinwa andu emwi na Kristo. 12Mukaṛikwa andu emwi nae ifo ubati-soń mukaṛutwa andu emwi nae mwikusuraa finya ya Iṛuva andenduta kuuka kwa vafu. 13Kamwaṛua neeni muve vayamuu andu emwi nae mwikee vafu mirima kiimba kya mareko na kiimba kya mikae yanu ya kivandu eemutiaa mareko woose. 14Kataṛua kilya kikee kitisiṛe kya itiṛiinga na itirwaa uumisioń lwamwi kakiuta-fo kitakive lingi eekikabiaa nsalabeń. 15Kavinga va finya na veetoṛo deń na ivaorusa na baa na ivaania vafinge na nsalaba wa Kristo.
16Kyasia manya nndu atamurerie kya findo fa ilya ana inwa ana kiimba kya kisuku ana iṛaswa lya mwiri ana mikonu ya Sabato. 17Findo fi foose mfa wooṛo foore ngo isiaa. Kilya kikee kwa ule nKristo ye muni. 18Manya nndu atamusoke isekye lyanu eeṛuaa na ukavili na itereva vamalaika na ikuṅinisa eenumbuaa alolia myorusie na ikufumbuta na makusaṛo amwi a kiwili akee a ruu, 19ataare akuwara na ito akee nrwe. Nae yye mulunganisa wili woose ukaniingwa finya kwa meeṛo na mirarii ukaṅina kwa mifurie yukie kwa Iṛuva.
20Kyasia kwakooya mwafwe andu emwi na Kristo mukalakana na filya foose fikee fa isanga, nki ili mukee ikurwaa kwa si ya mavavaso sha vandu vakee ikuwara na isanga? 21Vakee imuia: ”Manya mutaware ifi, ana mutakombe ifi, ana mutabaane ifi”! 22Ifo foose fanrawa-fo fiṛunde, numa fikashaa. Kwa ikyo mavavaso wo na miloshie yo yya vandu da. 23Findo sha ifo filolikie sheeli mfa uṛango veekusauyaa shia ya iindia Iṛuva wo veni na ikunyiisa kya wooṛo na ikootoya. Nafo mfindo fitarie ngo ana foore finya ya iima milangie ya wili ndi.
Currently Selected:
Barua ya Vakolosai 2: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
