Barua ya Vakolosai 3
3
1Kyasia kwakooya mwandutwa andu emwi na Kristo, ṛuyeń kilya kikee ule kundo Kristo akai akee rembo uko usha lwa Iṛuva. 2Kusaṛień kilya kikee ule, nta ifi fikee isangeń ndi. 3Fulya mwamfwa na muu wanu ufisio̱ andu emwi na Kristo ifo kwa Iṛuva. 4Neeli Kristo alolikaa akee muu weru, llyo neeni mulolikaa andu emwi nae uniniń.
5Kyasia waań milangie ilya ya mivili yanu ikee ya kiisanga sha waaisi na ukwe na ilanga ikasha na makusaṛo a ruu andu emwi na unyuku lukee windi lwa maṛuva a wongo. 6Findo sha ifo fikoṛaa uvave lwa Iṛuva lusheaa valya vambiṛie. 7Neeni mwikee na mareko alya lia mukuwara nawo. 8Kake alli ifi foose firwaań kwaasha: ituṛuka na ukasha na nrumu na uvave na findo fa usutu fa kaniń kanu. 9Manya mutareriani wongo, fulya mwammaa isomuta-fo mikae ilya ya mbele andu emwi na mitanie yayo 10mukakuvikia mikae ya nndu mwiya aaṛulwa kisumani na fwana ya ito andentana, amu ammanye kisha. 11Kyawa kuro llyo mukiuṛaa lingi ndi, kwakooya uu ni Ngiriki ana Muyuda ana nrine ana nndu atakee nrine ana mwini ana mmisa ana isinga ana atakee isinga, kake foose mfa Kristo, nae akuwore na ifi foose.
12Neeli mukee vasaue va Iṛuva na vasangori na vakunde, kiimba kya iki muve vandu va ngoo toore wooṛoo na warutu na utele na uwoo na ulalamboo! 13Muve va ndewu sheelwa mukutie mu veni na mu veni, kwakooya nndu awore shuu na nndu ungi. Sheeli Kristo amutia ini, mfo kuro neeni mutane! 14Na kilanya kya ifi veń na witanu lukee innde ifi foose na ifisumanisa! 15Na unambwe lwa Kristo lushilie ngoo tanu, fulya unambwe ilu llo mwavaangio, amu mukee wili umwi. Muve na vandu vaana Iṛuva! 16Kirero kya Kristo kiwore uṛango loose kiishue kari kanu bele! Mukuloshe na ikufunda mu veni na mu veni na fiimbo mukee iniingwa mMumuyo Nsongori, mwimbie Iṛuva ngooń tanu mwimwaanaa. 17Na foose mukee itana na firero ana na mitanie mutane mukuvavie na Nndumi Yesu mwiaanaa Iṛuva Nde!
18Muṛe vaka, irikień womi vanu sheeli kyawara valya vakee va Nndumi. 19Muṛe womi, kundeń vaka vanu, manya mutave vandu muvatuṛuaa na ivairia kinisi. 20Muṛe vana, indień vasuṛi vanu kya findo foose, amu kuro kisenyaa Nndumi. 21Muṛe vaande ya vana, manya mutatuṛue vana vanu na kinisi, amu nawo vatamurishe sha mafisi. 22Neeni vaṛundi, irikień iwo vakee womi vanu va kiwili findoń foose, nta nkwa windi lwa kisangu sha valya vakushiisa mbele ya vandu ndi, kake nkwa usha lwa nrimiń mwiindiaa Nndumi. 23Kilya kyoose mukee itana taniń na nrima sheeli kikee kya Nndumi, nta nkya vandu ndi, 24mwimanyaa sheeli muwariaa maṛe a diṅu kwa Nndumi, amu mukee iṛundia Kristo Nndumi. 25Amu ulya akasheesa atawaa kilya akasheesa kiteefo kikundia. Muṛe womi, niingeń vaṛundi vanu filya fisumani nawo mwimanyaa sheeli ini neeni muwore Nndumi akee ifo iṛuvewu.
Currently Selected:
Barua ya Vakolosai 3: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
