Barua ya Vakolosai 1
1
1Niń Paulo nkee nrumi wa Kristo Yesu kwa mifurie ya Iṛuva. 2Ise na mwanamae weru Timoteo tamwisana ini mukee vanavamae veru va ifo Kolosai mukee vasongori mukuwore na Kristo. Uwoo lukaa neeni na unambwe fuukie kwa Iṛuva Nde yeru.
3Taana Iṛuva akee Nde wa Nndumi weru Yesu Kristo mikonu yoose tiimutereviaa kwamwi. 4Fulya tamiita mboni ta ikusura lyanu lya ikusura Kristo Yesu na ta ikunda lyanu mukundani nalyo na vasongori woose. 5Tikamwaana kiimba kya filya mufiveree mundefisio̱ ifo iṛuvewu. Nafo mweemiitaa kwa kirero kya udede kirie nrumi shisha ya ikiṛwa ilya indefika kwanu. 6Na sheeli ikee ikwana isangeń lyoose na ivika nunda na ifumbuka, mfo kuro ifumbukie na kwanu da kuuka ilyo mundeiita mukamanya uwoo lwa Iṛuva sheeli llwa dede. 7Nkuro mundeloshwa ni Epafira uroe weru nkunde akee ndundi nsaari wa Kristo kwanu. 8Nae andetiongoya kya ikunda lyanu lindemiriswa mMumuyo Nsongori mirimiń yanu.
9Na kiimba kya ikyo ise neese kuuka nkonu ulya tindeita tirekio̱o̱ deń yaana Iṛuva na imuterevia ndi, amu mukooye imanya kilya akundie mwishuṛwaa waṛia loose na uṛango fuukie kwa Mumuyo 10na yenda mwende weendo lusumani neeni mukee va Nndumi, amu asenywa deń ni ini, mwivikaa nunda ta mashoṛa woose manuru sha nri uvikaa nunda na yengeṛio̱ uṛango lwa imanya Iṛuva. 11Na yavio̱ mwavio̱ yye finya toose kwa kiṛengo kya unini lwamwi, amu muve na isisiria lya mikae yoose na utele, 12mwiaanaa na ifura Vaava uu andemuniinga imakii iwaria fuva ya diṅu ya vasongori va ifo kiremboń kya langa. 13Nae andetiiṛua finyeń ta llema katikaarisa umangiń lwa Mwana wamwi nkunde. 14Amu ye kwamwi toore itaulwa, llyo itio̱ lya mareko. 15Nae avakani na Iṛuva uu atalolio̱, akee mwiriwa wa mbele wa foose fitani. 16Fulya findo foose fiifo ifo iṛuvewu na kunu isangeń filya filolikie na fitalolikie, five fifumbi fa tikisi ana ngyumangi ana unini ana witoṛo findo ifi foose findetanwa kwa shia yamwi na kiimba kyamwi. 17Nae eefo kwa ule ya findo foose na findo foose fikuware nae. 18Nae yye akee nrwe wa wili, nto siṛi. Nae yye wa mbele kava ndute wa mbele kari ka vafu, amu ye ave wa mbooko kari ka findo foose. 19Fulya kindesenya Iṛuva, finya yamwi yoose ikuware nae, 20amu ye aitanise findo oose na Iṛuva fikee kunu isangeń ana fikee iṛuvewu, kammaa innde unambwe na usao lwamwi andeluirita nsalabeń wamwi.
21Na ini ilyo mwikee kwaasha na Iṛuva, lingi mwikee fituva famwi mwikuwaraa na mitanie yanu mikasha, 22alli amuwiiṛa kwa Iṛuva eeniingiaa wili wamwi ufuń, amu amuseṛeese kisanguń kyamwi mukee vasongori vataare malomi ana ukavili, 23kwakooya mukaa na inkusura na iwara tabu iverea lia nrumi shisha indemwendee. Nrumi ii mwamiita, nayo yankwanisio̱ fitani foose fikee kwa si ya iṛuvewu. Nań Paulo nawa ndundi wayo. 24Alli noore ifura kiimba kya matuṛulo nndeakooya kiimba kyanu. Na lingi nkee yawutia alya aseere a matuṛulo a Kristo na wili wakwa kiimba kya wili wamwi, nto siṛi yamwi. 25Nań nawa ndundi wa siṛi niisoṛaa uṛundi ilu linderambikio̱ ni Iṛuva, amu naawutie imwongoya kirero kya Iṛuva. 26Nkyo kiṛisi kilya kyafiswa kuuka mbele na kwa fishuku foose, kake kyanrambulwa kwa vasongori vamwi. 27Amu Iṛuva andekunda ivamanyisa usimba na unini lwa kiṛisi ki kari ka vayavaṛumu. Na usimba llo ilu: Kristo akee kari kanu munnde iverea lya unini lwa miṛeṛe. 28Nae yye ise tinkwanisaa tiikimbaa nndu woose na ilosha nndu woose uṛango lukee lwa dede, amu taaṛue nndu woose asumanike kwa Kristo. 29Nań nkee ikwatara kwa ikyo na ikabana kwa finya ya ito akee nań na imakii lyamwi.
Currently Selected:
Barua ya Vakolosai 1: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
