Barua ya Vafilipi 4
4
1Kyasia vanavama vakwa vakunde mmuworie nyura ini mukee ifura lyakwa na tikisi yakwa, salaleń kyumu mukuwore na Nndumi. 2Naikimba Evodia na iikimba Sintike vave kimwi kari ka Nndumi. 3Nawe Sisigo wakwa nakutereva kwelekie vaka wo, amu vandekabania nrumi yo shisha andu emwi nań na Kilemensi na vaaroe vengi va mashoṛa va. Marina awo akee matisiṛe ifo kitabuń kya muu.
4Fureń kyeeri kyoose, fulya mukee va Nndumi! Lingi namuia: Fureń! 5Uwoo lwanu lulolike kwa vandu woose. Nndumi akee kufui ashe. 6Manya mutakwatare na kindo na kikava ki, kake filya muuṛi ongoyeń Iṛuva mwinterevaa na illembalemba andu emwi na imwaana. 7Na unambwe lwa Iṛuva lwilanyi ngyuṛango toose lumuware ngoo tanu na makusaṛo anu mulungani na Kristo Yesu. 8Lya ifurumia vanavama, kusaṛeń filya fikee fa dede na filya fikee fa sonu shisha na filya fikee fa langa na filya fisenyie na filya fikee fisha fa irera na filya foore tikisi shisha fikusaṛień. 9Ifo nafo mundefundio̱ na ifikulosha mukafiwaria mukafiita mukafilolia kwakwa niń, alli fitaniń! Na Iṛuva muni unambwe avaa neeni.
10Nafura nnu kari ka Nndumi, fulya mundekooya lingi shia ya ikusaṛa kyakwa sheeli mwikee ishikusaṛia, kake nta mundelolia mwaanya ndi. 11Nta niikai narera kuro sha ntaare kindo ndi. Amu nankufunda ifilwa mfilya nkee nafo. 12Niishi yanguywa, lingi niishi ifumbukio̱. Kari ka mikae yoose na ka findo foose nammaa ifundwa iwuura na iliwa nsoto na iva na fiingi na yanguywa. 13Nkee imakii findo foose nkee na ito ashiniingie finya, yye Kristo. 14Kake mundetana kisha, ili mundeelekiana nań ngatareń takwa. 15Neeni Vafilipi mwishi mu veni, sheeli lia mbooka yongoya nrumi shisha ilyo nndeuka Makedonia, nta siṛi ingi indeelekiana nań kari ka mboni ii ya iniingia na iwaria kita ini mu veni da. 16Na lia nkee kulya Tesalonike mundeshiendie fa ishielekia na filya fishitinye, ana nta llimwi ndi. 17Nta niikai llangie ifo five findo fa ishieleka ndi, kake nkee iṛuya nunda timilie ikundeń, nato mutaalio̱o̱ ni Iṛuva. 18Kake wwore findo foose na ifumbuka, lingi niishule bele. Nndewaria kwa uko lwa Epafurodito findo filya findeuka kwanu fikashivia kyuuna kya kisaamu fikashivia nsimbika wirikio̱ usenye Iṛuva. 19Na Iṛuva wakwa amufumbutiaa filya foose fimutinye kwa kiṛengo kya usimba lwamwi lumwiriaa mboṛa yukie kwa Kristo Yesu. 20Iniva akee Nde yeru eetikiswa miṛeṛe na miṛeṛe! Amen.
21Shiisanień nsongori woose awarani na Kristo Yesu. Vanavamae valya vakee kimwi nań yamwisana. 22Vasongori woose vamwisana, kilanya valya vakee va numba ya Kaisari. 23Unambwe lwa Nndumi Yesu Kristo lukaa na mirima yanu! Amen.
Currently Selected:
Barua ya Vafilipi 4: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
