Mitanie ya varumi 27
27
1Kyasia ili kindevavaswa kyaaṛo kyeeni kya yenda Italia vakarambikia Paulo na vafingwa vengi maakoń a nshili umwi irina lyamwi ni Yulio wa kyama kya Kaisari. 2Tikaaṛukia ngalaveń ya Adaramiti yeemmaa ikusongosia yende kumande miṛiń ya mbaai ya Asia. Tikakwimboo, na Aristariko wa Tesalonike kulya Makedonia kalungana neese. 3Ili lya ndesi tikafika Sidon. Yulio kaawutia Paulo kisha nnu kanniinga muumu aende kwa ndoo tamwi amu vamulle. 4Ili tindeuka ifo tikaira kwa itate ya Kipiro, amu tiiwuke mburaato ikee ituuka na mbele yeru. 5Ili tindeira nruveń ya taari ya Kilikia na Pamfilia tikafika Mira muṛi wa Likia. 6Na ifo nshili ulya kakooya-fo ngalava yukie Alekisanderia, nayo iiriee kyaaṛo yende Italia, katisaamisa-fo. 7Tikaenda kyaaṛo kya mbuṅwambuṅwa ikaira mikonu miingi. Tikafika kufui na Kinido kwa ngatara. Na fulya mburaato indetiima toolokiaa-fo tikaira kwa itate ya Kireta tiiraa muṛi wa Salimone. 8Tikaira-wo kwa ngatara mbaambaa ya nruva tikafika kundo kuvaangwaa Kyovioń kisha. Na kufui na kulya wifo muṛi uvaangwaa Lasaya.
9Mikonu miingi yamiira na kyeeri kyo kyaaṛo kya nruveń kiikee kya kitani nnu, amu mikonu ya ikootoya yeemmaa iira, Paulo kavaikimba. 10Kavaia: Muṛe womi, llolie sheeli kyaaṛo ki kivaa na kitani na ngatara shiingi nta nkya fiya fa ngalaveń na ngalava sheni da ndi, na akwaa nkya muu weru. 11Kake nshili ulya kairikia nnini wa ngalava kita filya farerwa mPaulo. 12Na fulya kundo kulya kutakee iva ikaa kyeeri kya mbioo, kinga kyawo vakanumbua, llyo ṅwana yuka kunu vakwatare vafike Foinika kwakooya kivaa vakaa-fo kyeeri kya mbioo. Nafo nkiimuyoń kya Kireta, nakyo kisikaa mburaato ya taari ya ukwawuń. 13Ili mburaato ya itate indebooka ivivita kinnya vakamanya vallolia kilya veekusaṛiee vakabooka kyaaṛo veeitaa ngalava kufui na mbaai ya Kireta. 14Numa ya kyeeri kyaangu ikasha mburaato nini ya mikae ya uniale, irina lyayo ivaangwaa kiimboo mavia. 15Ili ngalava indewarwa nta imakii ivingana na mburaato tikaiotoṛa tikakurikwa. 16Tikakurikwa mmburaato tikafika kufui na kyuruka kinnya kivaangwaa Kilauda. Io tikakuniinga finya deń, amu timakii iimboo-fo kingalava kilya kya mbaai kiseere kinnya da tiilemwaa. 17Ili vandemaa ikirosa ngalaveń vakaṛunda kya iringa ngalava yawo nini vakaifinga na ngoye shiingi veeitaa ngoye to kwa si yayo. Nawo vakaeṛea kundo ngalava irawaa kumande nruva ya Sirite. Kwa ikyo vakaolota fiya fa yendisa ngalava vakakurikwa kuri. 18Na kiimba kya mburaato ilya indetilisa ukiva deń ili lya ndesi vakabooka ikumba kyeenga kya fiya fa ngalava nruveń. 19Nkonu wa kararu vakakumba na fiya fingi na maako awo meni. 20Ili mikonu miingi indesia, saa italolike ana nyinyiri na mburaato itaangue tikauta ba ya ikia. 21Nawo ili veenkaa mikonu miingi vatalya shoonga, Paulo kasalala kari kawo kanumbua: Muṛe vaseṛo, kikoo mwasoṛa kirero kyakwa mure mutakwimboo Kireta, mwikooyaa ukiva lu ndi. 22Na alli nkee imuia kirero: Uywań mmuu, amu kari kanu eefo nta umwi arekaa ndi kita ngalava sheni da. 23Amu kio ki kya nnu malaika wa Iṛuva to niń nkee wamwi, nae yye nkee indundia andeshishea. 24Kashiia: Manya kuteeṛee Paulo! Kyankuwara kusalale mbele ya Kaisari. Lingi lla te Iṛuva ankuniinga vandu woose variani nawe. 25Kyasia womi, kutomariseń! Amu nkusurie Iṛuva sheeli kivaa kuro da sheeli nndeio̱. 26Kake na tikatana ki toolotwa kyurukeń kimwi.
27Ili kio kya ikumi na kaani kindefika tiirungutwaa ifo na ifo kari ka nruva ya Adiria, kio kya masomukoń vakurika ngalava vakakusaṛa vamfika kufui na uruka uumu. 28Ili vandeolota kyelelio vakakooya kifikie makumi avili. Ili vandeenda kinnya vakaolota kyelilio lingi vakakooya kifikie ikumi na firaanu. 29Vakaeṛea kundo tituulwaa kundo kuwore mbamba vakaolota fiirisha ngalava fiini fa numa vakavera nnu kukye. 30Na vakurika ngalava veeriee irisha na itia-fo ngalava. Vakaolota kingalava kilya nruveń veevakanaa sheeli vakee yolota na fiirisha ngalava fa mbele. 31Paulo kaia nshili ulya na vasikari: Kwakooya iva vatakaa kunu ngalaveń nta mukiaa ndi. 32Kyasia vasikari vakaminya nruu ta kingalava vakakiotoṛa kikawa nruveń. 33Ili kundekya Paulo kavalembalemba woose valye shoonga eenumbuaa: Nnu ni nkonu wa ikumi na kaani mwiveraa na ikootoya mutalya shoonga. 34Kyasia namulembalemba mulye shoonga, amu Uyo livaa ikia lyanu. Amu nta ifuli lya nrwe lya umwi wanu lirekaa. 35Neeli andemaa irera kuro kaimboo nkate kaana Iṛuva mbele yawo woose kaufukya kabooka ilya. 36Woose vakauywa mmuu vakalya shoonga veni. 37Neese toose tiikee ngalaveń tikee vandu mayana avili na makumi mfungare na varindaru. 38Ili vandemaa iwuura vakaangusa ngalava vaeeṛaa ngano ifo nruveń.
39Ili kundekya nta vamanya uruka lua ndi, kake valolia andu mwaanya wa iṛuka ukai. Vakareriana iita ngalava io akwaa kivaa. 40Vakaminya ngoye ta fiirisha ngalava vakatirea nruveń. Vakarosa itanga lia innya na iliaṛuya taari ya mburaato vakasumanisa ngalava na mwaanya ulya. 41Kake kitaare ngalava indefika mbaai ikakooya andu a misanga isikie mmura ikakutotia-wo kwaasha. Ifo mbele ngalava ikawarwa tabu mmisanga nta isenika, kake ifo numa ikafukywafukywa ni ikoola lya nruva. 42Kikwena kya vasikari ni iwaa mifungwa, amu vatakweeṛe nruveń varishe. 43Kake nshili ulya ili eekundiee ikiṛa Paulo kavaima veetanaa sheeli veemaaliaa. Kavavasa valya veeshi iira kwa ule ya mura vakweeṛe nruveń vaaṛukie urukeń. 44Na iva vasaa vakukiṛe veekuwaraa na mbau ana findo fingi fa ngalava. Na kuro vandu woose vakafikia uruka na kibua.
Currently Selected:
Mitanie ya varumi 27: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
