Mitanie ya varumi 26
26
1Agiripa kaia Paulo: Kuwore muumu ikureria kyafo. Llyo Paulo aseṛeesa uko lwamwi kakukabania kuri: 2Nkulolie nrimiń wakwa nkee wa ngoma, wui mangi Agiripa, fulya nkukabania mbele yafo nnu kya findo filya foose nndeṛiingwa nafo vVayuda. 3Mmwasi fulya iwe kwishi nnu mikae na myuṛie yoose iworwa vVayuda. Kiimba kya ikyo nakutereva kushiaranye kwisisiriaa. 4Vayuda woose veeshi weendo lwakwa kuuka ukooń lwakwa kasa kiikaii kuuka mbele ifo uṛitiń lwakwa na ifo Yerusalemu. 5Kuuka mbele vashiishi nnu, kwakooya vafurie ishirambua, sheeli niikee Mfarisayo na ilatia windi lwa miloshie yeru isumanikie kutu. 6Na alli nselele ia naanduywa kiimba kya iverea lya kirekio kilya vaande yeru vaniingio̱ ni Iṛuva. 7Kikee nkyo ngyufwari teru ikumi na ivili tiveree tifikie veeṛundiaa Iṛuva na utomari kio na nsanyiń. Nań nkee iṛiingwa vVayuda kiimba kya iverea lyo, mangi Agiripa. 8Naamu ki ili kikusaṛio̱ kwanu sheeli nkirero kitairikio̱ sheeli Iṛuva aṛuta vafu? 9Nkue niń shi muni nalolia nrimiń wakwa sheeli kyashiwara iṛunda findo fiingi fa iima irina lya Yesu wa Nasareti. 10Ifo nafiṛunda kulya Yerusalemu. Nafinga veengi va vasongori na ivarwaa fifingioń, ili mmaa iniingwa miimu vvakohani vanini. Neeli veekee ivawaa nań navaelekia. 11Na keengi ifo numbeń ta iterevia koose navavavisa niivakabiṛiaa vakane Yesu. Navaendea na uvaave sheeli noorwa ni uketo navaumbuta kumande miriń ya veeni. 12Kyasia kari ka mashoṛa wo ili niiendaa Damasiko noore miitoṛio na uvavaso lwa vakohani vanini.
13Ee mangi, kyeeri kya nsanyiń niikee ifo shień nalolia langa yuka iṛuvewu ikilie langa ya saa ikashimulikia taari toose andu emwi na valya niirianii nawo. 14Tikawa na si ti woose. Nań naita ununga lwireraa nań na mirerie ya kiebrania: Saulo uu, Saulo uu, nki ili kukee ishuumbuta? Nkyumu kwafo ikaba undeesho inanga. 15Nań nanumbua: Kwava i Nndumi? Nndumi kashiia: Nniń Yesu ulya iwe kukee imwumbuta. 16Kake kwimboo kusalale na marende afo, amu nankukuorusa kiimba kya iki nkurwaa kuve nrambua wa ifi kwamfilolia na wa findo fikee mfo nkurambuyaa kwafo. 17Nakusaua kari ka vandu vafo na ka vayavaṛumu vakee wwo nkurumaa kwawo. 18Kuvarue miso awo varie llema vashe langeń, vauke ushiliń lwa Satana vaaṛukie Iṛuva. Kuro vakooye itio̱ lya mareko awo na diṅu kari ka iwo vamiiliswa veeshikusuraa niń. 19Kwa ikyo, mangi Agiripa, nta nndemakii ilea myorusie yo ya iṛuvewu ndi. 20Kake nndeenda ikwanisia mbele valya va Damasiko na va Yerusalemu na numa kari ka uruka loose lwa Yudaya na vayavaṛumu woose veelashike mirima yawo na yaṛukia Iṛuva veetanaa mitanie isumani na miilashikie yawo. 21Kiimba kya ikyo Vayuda vakashiwara ifo numba ya Iṛuva vakaelelia ishiwaa. 22Kyasia fulya nankooya yelekio̱ lyukie kwa Iṛuva nselele kumande alli niirambuyaa vannya na vanini. Ana nta kirero kingi nkee irera kita filya vaauya fisuku na Mose varera fikaa faawukie: 23Sheeli kyawara Kristo aliswa ukiva na sheeli ye avaa wa mbele wa iṛutwa kwa vafu ave mukwanisa mboni ta langa kwa vandu vamwi va Isiraeli na kwa vayavaṛumu.
24Neeli eekee ikukabania kuri Festo karera na ununga unini: Paulo, kuworwa ni usukwa, isoma lyafo iingi lyamiilasha uṛango lwafo. 25Kake Paulo kanumbua: Noore usukwa ndi, nnini wakwa Festo, kake nkee irera firero fa dede na fa uṛango weni. 26Amu nae mangi eeshi mboni ta findo ifi, nań mmakii irera nae na baa. Amu niishi nnu sheeli kiteefo nta kirero kimwi kari ka ifo atakiishi. Amu nta kindo ki kindetanikia mbaai ndi. 27A mangi Agiripa, kukusurie vaauya fisuku? Niishi sheeli kuvakusurie. 28Agiripa kaia Paulo: Kyasaa kyaangu ishivinga vve nkristo. 29Paulo kamwaṛua: Nkee itereva Iṛuva sheeli io kyasaa kinnya ana kinini ni iwe da ndi na akwaa ni iwo woose vakee ishaaranya nnu vave shań kitaare nkifingio iki. 30Kyasia mangi na nshili wa uruka na Berenike na valya veekee rembo andu emwi nawo vakakwimboo. 31Neeli vandeenda vakakurera wo veni na veni veenumbuaa: Nndu uu atanie kindo kyawara awalwa ana ifingwa ndi. 32Agiripa kaia Festo: Nndu uu eemakii iboṛomulwa kikooye kitaare eentiṅwaa yumisio̱ nKaisari.
Currently Selected:
Mitanie ya varumi 26: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
