Mitanie ya varumi 20
20
1Ili kitari kilya kindewolia, Paulo kavaanga vanalosho kavaikimba kalakana nawo. Numa kakwimboo aende Makedonia. 2Neeli andemaa iira taari tilya na iwiiṛia vakristo va kulya muu na firero fiingi kafika Ugiriki. 3Ili andemaa ikaa ifo miiri iraru Vayuda vakalliya kyama, ili eeriee yenda Siria kwa shia ya nruva. Kyasia kauya kasoṛa shia ilya ya iira Makedonia. 4Na vandu valya vandemwimia kyaaṛoń kyo kumande Asia ni: Sopateri mwana wa Puro wa Beroya, na Aristariko na Sekundo vandu va Tesalonike, na Gayo nndu wa Deribe, na Timoteo na Tikiko na Tirofimo vakee va Asia. 5Vandu wo veemiiraa mbele vakandetiverea ifo Tiroa. 6Neese tikaimboo̱ kyaaṛo kya nruveń numa ya kisuku kya Pasaka tikauka Filipi. Tikavakooya Tiroa kyaaṛo kya mikonu iraanu tikakaa-fo mikonu mfungare.
7Na nkonu wa mbele usoṛie nkonu wa Sabato ili tikusandie tiifukyaa nkate Paulo kavaongoya sheeli aimboo kyaaṛo ili lya ngama. Kaengeṛia irera kumande isomukoń lya kari. 8Tiifoo na taa shiingi ifo kai kalya tiikusandiee. 9Nseṛo umwi nkoo irina lyamwi Eutiko eekee rembo idirisheń karoywa nruo nnu, fulya Paulo andeomuya nnu irera, kawa auka kai ka kararu kaimbolo ammaa ifwa. 10Paulo kaoloka kallaya kankwiṛinia kanumbua: Manya mutataṛaake, amu muu wamwi wifo kari kamwi. 11Karwa lingi kai kafukya nkate kalya kaengeṛia irera nawo kumande ngama kio, Uyo aende. 12Vakannde nseṛo ulya nkoo akee na muu vakauywa mmuu kinini nnu.
13Kake ise tikaira mbele yenda ngalaveń tikaenda kumande Aso. Neese tiikundiee iimboo Paulo ifo, amu nkuro eevvavasaa, fulya ye muni eemmaa ifukya sheeli aendaa na marende. 14Neeli andetikooya ifo Aso tikansaamisa ngalaveń. Numa tikafika Mitilene. 15Tikauka ifo, na nkonu wa kavili tikafika andu akee mbaai na Kio. Nkonu wa kararu tikafika Samo na nkonu wa kaani tikafika Mileto. 16Amu Paulo eenrekiaa sheeli airaaa Efeso akee ngalaveń, amu atasinde ifo Asia. Amu eeworee uvini eefuriee ifika Yerusalemu nkonu wa Pentekoste kwakooya kivaa.
17Ifo Mileto Paulo karuma vandu vaende Efeso kavaanga vasuṛi va siṛi ilya. 18Neeli vandefika kwamwi kavaia: Ini mwishi mu veni weendo lwakwa nndekuwara nalo kyeeri kyoose niikee kwanu kuuka nkonu ulya nndefika Asia 19niiṛundiaa Nndumi na ikunyiisa lyoose na masoru na maelelio andeshishea a mitambwe ya Vayuda valya. 20Na lingi mwishi sheeli nta nndemufisa kirero kimwi kya imwelekia ndi. Kake nndemworusa na imulosha na baa na ifo numba ta vandu. 21Nnderambuya Vayuda na Vagiriki vaaṛukie Iṛuva na ikusura Nndumi weru Yesu Kristo. 22Kyasia alli lleń nkee iwara shia neende Yerusalemu nammaa ifingwa nrimiń ntamanye kindo kindeshikooyaa, 23kita Mumuyo Nsongori akee ishirambuya muṛi kwa muṛi eenumbuaa: Fifingio na ngyukiva fishiveree. 24Kake ifi fishieṛeesie ndi. Na akwaa mmuu wakwa nkindo kya uuru kwakwa ndi. Kindo llangie ni imarisia weendo lwakwa na miṛundie ilya nndeniingio̱ ni Nndumi Yesu ya irambua mboni shisha ya uwoo lwa Iṛuva. 25Na alli lleń niń niishi sheeli ini moose nndemukwanisia umangi lwa Iṛuva niiendaa ifo na ifo mukishiloliaa lingi kisangu ndi. 26Kwa ikyo namurambuya ini mu woose nkonu uu wa nnu, sheeli kwakooya umwi wanu na kava i atuṛaa ikiṛwa lyamwi nkonu ulya wa uumisio, niń noore ilomi kwamwi ndi. 27Amu nalea imukwanisia mifurie yoose ya Iṛuva ndi.
28Kuringeńń mu veni na shoo yoose, amu Mumuyo Nsongori amurambikia mwisalalie, mumakii itumbana siṛi ya Iṛuva andeiuṛa na usao lwamwi weni. 29Niń niishi sheeli nammaa yenda sui shivave tishaa kwanu titaliliaa shoo ii. 30Lingi kari kanu mu veni vakwimboo-fo vandu veereraa fikasha vaomue vanalosho vavasoṛe wo. 31Kwa ikyo kaań kya umbuura mwikumbuaa sheeli myaka iraru kio na nsanyiń nare ntaikimba nndu woose wanu na masoru ndi. 32Kyasia alli namurambikiań Iṛuva mukukaarise na kirero kyo kya ililia lyamwi. Ye amakii imusongovisa na imuniinga diṅu andu emwi na valya woose vamiiliswa. 33Nndelanga fesa ana saabu ana nta isaṛa lya nndu ndi. 34Ini mu veni mwishi sheeli maako va akwa wwo andeshiṛundia kilya kishifile andu emwi na vaaroe vakwa. 35Niń nndemworusa foose sheeli kyatiwara ikwataria mashoṛa kuro da, amu timakii yelekia vatanyari tiikumbuaa firero filya fa Nndumi Yesu andefirera ye muni: Llyo ṅwana iniinga kita iwaria, 36Ammaa irera ifi kafwiṛia nri si katereva andu emwi nawo woose. 37Woose vakaiya nnu vakakulingilia Paulo sungoń vakamwonga mimo 38veenaṛiaa nnu kiimba kya kirero kilya arera sheeli vatakilloliaa lingi kisangu. Vakandaṛata kumande ngalaveń.
Currently Selected:
Mitanie ya varumi 20: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
