Mitanie ya varumi 19
19
1Kikava ili Apolo eekee kulya Korinto, Paulo ammaa iira kari ka ngyuruka ta Asia kafika Efeso. Kakwania-fo na vanalosho kiindi. 2Kavauṛa: Oo mwawaria Mumuyo Nsongori ilyo mukusura? Vakamwaṛua: Wode na akwaa ni iita sheeli eefo Mumuyo Nsongori tamiita ndi. 3Kavauṛa: Kyasia mwabatiswa kwa ubatiso lungaluń? Vakanumbua: Nkwa ubatiso lwa Yohane. 4Paulo kanumbua: Yohane abatisa kwa ubatiso lwa ikurra eeiaa vandu vakusure ulya ashaa numa yamwi, nae yye Yesu. 5Ili vandeita ifi vakabatisio̱ irina lya Nndumi Yesu. 6Neeli Paulo andemaa ivaekeṛia maako Mumuyo kavashea. Vakabooka irera na mirerie miiya na yauya. 7Na woose veekee womi ikumi na vavili. 8Paulo kaaka numba ya itereva karera-fo na baa kiṛengo kya miiri iraru eeaṛuyanaa na vandu na ivaomuya kari ka mboni ta umangi lwa Iṛuva. 9Kake vandu kiindi vakakuumisa vakalea ikusura na isuta shia yo mbele ya syamu. Kyasia kakwimboo kavatia kalakanisa-fo vanalosho kaaṛuyana na vandu nkonu tiṛi ifo kisomioń kya nndu umwi avaangwaa Tirano. 10Mboni ti tikatanika kuro andu a myaka ivili, na iwo woose veekee kulya Asia vakaita kirero kya Nndumi Vayuda na Vagiriki. 11Iṛuva katana na myorusie ikilie kita kwa maako a Paulo. 12Na akwaa walole vakaendewa firami na miseto yukie wiliń wamwi, na ndwaṛi tawo tikavauka na mimuyo mikasha ikavasomuka.
13Veeifoo na Vayuda kiindi vatangatanga, nawo waanga va iiraria mimuyo mikasha. Vakakaṛia isendia irina lya Nndumi Yesu valya vaworwa mmimuyo mikasha veenumbuaa: Namuvavasa kwa irina lya Yesu ulya akwaniswa mPaulo. 14Na iwo vatana kuro veekee vana mfungare va Sikeva nndu Muyuda akee wa ufwari lwa nkohani nnini. 15Mumuyo ulya nkasha ukavaaṛua ukavaia: Yesu nammanya na Paulo mmwishi, kake ini mukee va ki? 16Na nndu ulya aworwa mmumuyo nkasha kavarumbukia kavamakii vali vavili kavavinga kumande vasomuka numba ilya veerishaa vakee na fisyaa fa ruu na mavaṛa. 17Mboni ii ikamanyika vVayuda woose na Vagiriki veekee Efeso na woose vakawarwa wweṛei. Na irina lya Nndumi Yesu likaitikiswa nnu. 18Na veengi va iwo veenkusuraa vakasha ikurra veerambuaa mitanie yawo ya mbele. 19Na vandu veengi kari ka valya veekuworee na findo fa waanga ukasha vakasaṅiṛia fitabu filya fawo vakafikoṛa kisanguń kya vandu woose. Vakataala uuru lwayo vakakooya sheeli nshilingi fiku makumi araanu. 20Kuro mfo kirero kya Nndumi kindekwengeṛia na ivinga na finya.
21Ili mboni ti tindemaa isia Paulo kakurera ifo nrimiń wamwi, kamaa iira Makedonia na Akaya eendaa Yerusalemu. Kanumbua: Numa ya iva ifo kyashiwara indella na muṛi wa Rome nato. 22Karuma vandu vavili va valya veekee indundia vamwirie mbele vaende Makedonia, nawo nTimoteo na Erasto. Nae muni kakaa kulya Asia kyeeri kyaangu.
23Kyeeri kyo likakwimboo irabuule inini kiimba kya mboni ta shia yo. 24Amu nndu umwi irina lyamwi nDemetirio ni mfuru wa fesa eesongosiaa fwana ta fesa ta numba ya irasia Artemisi kaendie vaaṛia valya mbusha shiingi. 25Kaitiṛimu iwo andu emwi na vengi veekee iṛunda mashoṛa andu emwi nawo kavaia: Muṛe vaseṛo, mwishi sheeli usimba lweru luukie mashoṛeń iva. 26Lingi mulolie na iita sheeli nkunu Efeso da ndi, kake nkari ka Asia yoose deń Paulo uu amiikimba vandu veengi vakailashika makusaṛo awo eenumbuaa sheeli findo fikee isongosio̱ na maako a vandu mfo maṛuva ndi. 27Niikai ishoṛa li lyeru lyoore kitani kya iilwa deń da ndi, kake na numba ii ya iṛuva lya kika liṅini kuri itaalwa sheeli nkindo ndi na yutwa unini lwamwi, neekai lli liindio̱o̱ vvandu woose va Asia na va isanga lyoose. 28Ili vandeita kuro vakaliwa nngoo vakaṛoṛongya veenumbuaa: Artemisi wa Efeso yye nnini! 29Kyasia muṛi woose ukava irabuule, na vandu vakaenda veerishaa vakafika andu a fitavanu kwa nrima umwi. Vakawara na Gayo na Arisitariko vakee vandu va Makedonia vashe-fo na Paulo. 30Neeli Paulo andefura yaka iṛoṛondeń lia, vanalosho vakamwima. 31Na kiindi kya vanini va ushili lwa Asia vakee ndoo tamwi vakanrumia nrumi vakantereva atakworuse ifo iṛoṛondeń ilyo. 32Kyasia vengi veekee iishiṛa kuri na vengi kuri, fulya ikusandio lyo lyeewaa ifulufulu. Na veengi vandeimanya kiteveto kya ikusandio lyo ndi. 33Kyasia Vayuda vakauta Alekisandero iṛoṛondeń vakanseṛeesa arere. Alekisandero kavatukia uko kafura irera na vandu valya. 34Kake ili vandemanya ye ni Muyuda vakaṛoṛongya woose kwa ununga lumwi andu a kufui saa ivili veenumbuaa: Artemisi wa Efeso ni nnini! 35Na mutisiṛa wa muṛi ili andemaa iwolisa vandu karera nawo eenumbuaa: Muṛe womi va Efeso, ni nndu ungau ateeshi sheeli muṛi wa Efeso nto nringi wa numba ya Artemisi akee nnini, ukee na nringi wa fwana yamwi yaoloka kuuka iṛuvewu? 36Kyasia fulya mboni ti titamakii ilewa, kyamuwara musie do mutatane kindo kya ree ree. 37Amu mwaminnde vandu va kitaare vamiiva findo fa numba ya Artemisi ana iruma iṛuva lyeru lya kika. 38Kyasia kwakooya Demetirio andu emwi na vaaṛia vakee andu emwi nae vawore kirero kya iṛiinga nndu, numba ta fikwena tiifo na vafukya fikwena veefo vandekuṛiingia-fo. 39Kake kwakooya muwore-fo kirero kingi, kisongosio̱o̱ vvandu wo vakee vasauye ishoṛa lyo. 40Amu toore kitani kya iṛiingwa kiimba kya mwaandu uu wa nnu utawore kiteveto. Neese tikee ituṛa shia ya ikuuta mwaanduń uu. 41Ili andemaa irera ifi kata-ṛakanisa ikusandio lia.
Currently Selected:
Mitanie ya varumi 19: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
