Mitanie ya varumi 16
16
1Kyasia kafika Deribe na Lisitira. Na ifo eeifoo mwanalosho umwi irina lyamwi nTimoteo akee mwana wa nka Muyuda akusurie. Na ndee eekee Ngiriki (= muyavaṛumu). 2Nseṛo to eemanyikiee kinuru wanavamae valya vakee kulya Lisitira na Ikonio. 3Paulo kakunda ito aende andu emwi nae kankurika kanrina kiimba kya Vayuda valya veekee taari tilya. Amu woose veeishii sheeli ndee ni Ngiriki. 4Kyasia ili veeiraa kulya miṛiń ilya vakavaniingia mavavaso alya a varumi na vasuṛi valya vakee Yerusalemu, amu vaaringe. 5Na siṛi tilya tikaniingwa finya ya ikusura tikakwengeṛia ifumbuka oo nkonu.
6Vakaira urukeń lwa Firigia na Galatia vakaimwa mMumuyo Nsongori veekwanisaa kirero kilya ifo Asia. 7Ili vandefika kufui na Misia vakaelelia yenda Bitinia, kake Mumuyo wa Yesu avaniinga muumu ndi. 8Vakaira Misia vakainama Tiroa. 9Na ifo Paulo kaoruswa myorusie kio. Kalolia nndu wa kulya Makedonia aselele-wo kantereva na imwia: Ṛuka kushe Makedonia kushetielekia! 10Neeli andemaa ilolia myorusie yo, lia eni tikafura yenda Makedonia, fulya talolia sheeli ni Iṛuva antivaangia nafo tivakwanisie nrumi shisha ya ikia.
11Kyasia tikaira kyaaṛo kya ngalaveń kuuka Tiroa tikafika Samotirake na nkonu wa kavili tikafika Neapoli. 12Na kuuka ifo tikafika Filipi ukee muṛi nnini muungoń ulya wa Makedonia andu Varome vasamia. Tikakaa muṛiń uu mikonu kiindi. 13Neeli undefika nkonu wa Sabato tikasomuka wooṛo ya muṛi tikaenda mbaai ya iriko tikakusaṛa sheeli andu wo awore andu a iterevia. Tikakaa rembo tikarera na vaka veekusandiee io. 14Nka umwi irina lyamwi ni Lidia akee nkumbi wa miseto itondoṛie akee wa muṛi wa Tiatira akusurie Iṛuva kataaranya. Na Nndumi kanrua nrima aware kisha firero filya Andererwa mPaulo. 15Neeli andemaa ibatiswa andu emwi na va numba yamwi katitereva kanumbua: Kwakooya mwashilolia sheeli nsumanikie kwa Nndumi, oṛeshoń kyeń kwakwa mukaa-fo. Katiitika tikaenda.
16Neeli tiiendaa andu emwi alya a iterevia, isinga limwi lya kika likakwania neese aworwa mmumuyo wa iringisia, andekooiya nato womi vamwi mbusha shiingi kwa iringisia lyamwi. 17Kasoṛa Paulo neese eekabaa kiṛoṛongyo eenumbuaa: Vandu va vvaṛundi va Iṛuva akee ule, nawo vakee imukwanisia shia ya ikiṛwa. 18Katana kuro mikonu miingi. Kake Paulo katuṛuka kainduka kaia mumuyo ulya: Nakuvavasa na irina lya Yesu Kristo, uka nndu uu. Ukamwuka saa ilya sheni. 19Neeli womi vamwi vandelolia sheeli mbusha ya masaa awo yammaa ivarekia vakawara Paulo na Sila vakavasuṛua mbele ya vanini va muṛi. 20Vakavarwaya vashili vakanumbua: Vandu va vakee ifuluafulua nnu muṛi weru, nawo vVayuda. 21Lingi vakee ikwanisa mboni ta mikae itasumani tiiwarie na iisoṛa, amu ise tikee Varome. 22Isyamu lyoose nalyo likavasua. Na vashili vakavauta miseto yawo na finya vakavavasa vakabwa na mbiiri. 23Neeli vandemaa ivakaba nnu vakavarwaa kifingioń vakavavasa nringi wa kifingio avaringe nnu. 24Neeli amaa ikooya ivavaso lyo kavarwaa kiṛiń kya kari kavafinga marende awo na makengeto.
25Kake kyeeri kya kio masomukoń Paulo na Sila vakatereva Iṛuva na imwimbia fiimbo fa imwitikisa, na vafinge vengi veekee Vaaranya. 26Lia eni likava irerema inini lya si na kirembo kya kifingio kikasenika. Na lia eni myaango yoose ikaruuka na makengeto a woose akaoṛomuka. 27Nringi ulya wa kifingio kamarukia-fo kalolia myaango ya kifingio iruukie kasomua shombo kafura ikuwaa, amu akusaṛa sheeli vafungwa vanrisha. 28Kake Paulo karosa ununga lwamwi na finya eenumbuaa: Manya ikukasheesa, amu tiiyo ti woose. 29Nae kavavasa taa tinndwa karumbukia kari eereremaa na yeṛea kawa marendeń a Paulo na Sila. 30Kavasomuta wooṛo kanumbua: Womi vakwa, nkiki ntanaa amu nkie? 31Vakamwia: Kusure Nndumi Yesu Kristo, nawe kukiaa andu emwi na va numba yafo. 32Vakamwongoya kirero kya Nndumi ye na va numba yamwi woose. 33Kavawaria kwamwi saa ilya sheni ya kio kavasangya faasha fawo. Numa kakubatisio̱ ye na vandu vamwi woose kyeeri kyo kyeni. 34Kavarwaa numba kwamwi kavasongosia shoonga. Kafura nnu ye na va numba yamwi, fulya ammaa ikusura Iṛuva.
35Ili kundekya vashili vakaruma vaṛundi vawo veenumbuaa: Otoṛa vandu wo vakwendie! 36Nringi ulya wa kifingio kaia Paulo firero filya eenumbuaa: Vashili vanruma vandu, amu mwoṛomulwa. Kyasia alli somukeń wooṛo mukwendie na unambwe. 37Paulo kavaia: Vantikaba mbele ya vandu woose kitaare vantianduya, neese tikee Varome. Lingi vakatirwaa kifingioń. Na alli vakee itiuta-fo na kiṛisi? Wode nkuro ndi. Vashe wo veni vashetiuta-fo. 38Vaṛundi valya vakandeongoya vashili valya firero fi. Nawo vakaeṛea ili vandeita sheeli wo vVarome. 39Vakasha ivalembalemba vakavasomuta wooṛo vakavatereva vauke muṛiń ulya. 40Nawo vakauka kifingioń vakaenda numba kwa Lidia. Neeli vandemaa ikwania na vanavamae vakavawiirṛia muu vakaenda.
Currently Selected:
Mitanie ya varumi 16: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
