Mitanie ya varumi 15
15
1Vakainama vandu kiindi Antiokia vauka Yudaya vakalosha vanavamae sheeli: Mukara mutarinwa musoṛe mikae ya Mose, mumakii ikia ndi. 2Kikava kitari ifo siṛiń. Na Paulo na Barinaba vakavingana na vandu wo na yaṛuyana nawo nnu. Lya ifurumia vandu va siṛi vakavavasa Paulo na Barinaba varwe vaende Yerusalemu andu emwi na vengi kari kawo varwaa-fo mwaandu uu kwa varumi na vasuṛi. 3Kyasia vakaṛaṛatwa nsiṛi vakaira kari ka uruka lwa Foinike na Samaria veekwanisaa mboni ta iilashika lya vayavaṛumu. Kikaniinga vanavamae ifura inini. 4Neeli vandefika Yerusalemu vakawario̱ nsiṛi na varumi na vasuṛi. Nawo vakavaongoya findo foose Iṛuva andeṛunda andu emwi nawo. 5Kake kiindi kya taari ya Vafarisayo valya veekusuriee vakasalala vakanumbua: Kyawara varinwa na ivavavasa vaware ivavaso lya Mose.
6Varumi na vasuṛi vakakusandia amu vakusaṛe kerero kyo. 7Na numa ya yaṛuyana iingi Petiro kakwimboo kavaia: Muṛe vanavama, ini mwishi sheeli kuuka mbooko Iṛuva ashisaua kari kanu amu vayavaṛumu vaite kirero kya nrumi ya ifura ya ikia kwa kana kakwa na ikikusura. 8Na Iṛuva uu eeshi mirima ya vandu kavarambua eevaniingaa Mumuyo Nsongori sheeli atiniinga neese. 9Ana nta arwaa mwavanu kari kawo neese ndi kavasangya mirima yawo na ikusura. 10Nki iliń mukee yelelia Iṛuva na irika vanalosho myanda sungoń kitaare vaande yeru ana ise tammakii ikurika. 11Kake tikusurie sheeli ni uwoo lwa Nndumi Yesu lo weni lutikiṛaa neese shawo. 12Kyasia isyamu lyoose likasia do likaaranya Barinaba na Paulo veevaongoyaa mboni ta myorusie na maṛiikiso lya Iṛuva andeatana kwa urumi lwawo kari ka vayavaṛumu.
13Nawo ifi vandemaa Yakobo kaaṛua eenumbuaa: Muṛe womi na vamwanama, shaaranyiń! 14Petiro antoongoya sheeli Iṛuva muni andebooka illa vayavaṛumu, amu asaue vandu kari kawo vaindie irina lyamwi. 15Na firero fa vaauya fisuku fivakani na firero fo, sheeli kyatisiṛwa: 16”Ifo fikammaa iira nuuyaa, nań nsongosiaa fingi numba ya Davidi yeewwaa. Nsongosiaa fingi iwa lyayo, nań niiseṛeesaa, 17amu vandu valya vakiseere vaṛuye Nndumi andu emwi na vayavaṛumu woose. Amu nawo vakee nkula wakwa. Nkuro Nndumi arera atana ifi foose. 18Nakyo kyammanyika kuuka mbooko ya isanga.“ 19Kiimba kya ikyo niń nkee ifukya kuri: Manya titatuṛue valya vandeaṛukia Iṛuva vauka ifo kwa vayavaṛumu. 20Kake tivati-siṛie barua na ivaia vaiwukani na irasia vaṛumu na iiwukana na waaisi na ilya nyama ta findo fakuṛwa na inwa usao. 21Amu kuuka ilyo kala Mose awore vandu va ikwanisa mboni tamwi muṛiń woose tiisomwaa nkonu woose wa Sabato ifo numbeń ta iterevia.
22Kyasia kikasenya varumi na vasuṛi na siṛi yoose vasaue vandu kari kawo na ivaruma Antiokia andu emwi na Paulo na Barinaba. Nawo wwo iva: Yuda eevaangwaa Barisaba na Sila veekee vandu vanini kari ka vanavamae vawo. Vakatisiṛa barua na ivarikia kwa maako awo. Nayo irerie kuri: 23Ise varumi na vasuṛi tamwisana ini vanavamae veru mukee ifo Antiokia na Siria na Kilikia muukie kwa vayavaṛumu. 24Tamiita sheeli vandu vandeuka kweru vakasha na kwanu kitaare vanderumwa ni ise. Nawo vakamutuṛua na firero fawo na ifulua mirima yanu. 25Kiimba kya iki tamiirikiana na nrima umwi tisaue vandu na ivaruma kwanu andu emwi na Barinaba na Paulo vakunde veru. 26Nawo vavili wwomi vandereta muu wawo kiimba kya irina lya Nndumi weru Yesu Kristo. 27Kyasia tanruma Yuda na Sila wwo vamuiaa wo veni firero fo na kana kawo. 28Amu tindefukya teelekio̱o̱ mMumuyo Nsongori manya titamurike myanda kitaare mfilya fawara. 29Mfo ifi: Mwiwukani na findo fa misimbika ya firasio ya fwana na usao na nyama takuṛwa na waaisi. Mukakwima ifo mutanaa kisha. Kaańń na kibua!
30Ili iwo vandemaa iṛaṛatwa vakainama Antiokia. Vakasandia siṛi yoose vakaniingia barua ilya. 31Nawo vakaisoma vakafura kiimba kya ilembwalembwa lia. 32Yuda na Sila nawo wo veni veekee vaauya vakaikimba vanavamae na firero fiingi vakavakaarisa. 33Neeli vandekaa ifo kyeeri kiindi vakavikio̱ muumu wanavamae vauye na unambwe kwa valya vandevaruma. 34Kake Sila kalolia nkisha ikaa ifo.
35Na Paulo na Barinaba vakakaa ifo Antiokia veeloshaa na ikwanisa nrumi shisha ya Nndumi andu emwi na vandu vengi veengi. 36Numa ya mikonu myaangu Paulo kaia Barinaba: Sie! Tuuye alli tindella vanavamae wo miṛiń yoose kulya tindekwanisia kirero kya Nndumi timanyi kasa veefo. 37Kyasia Barinaba kafura ikurika Yohane ulya eevaangwaa Mariko aende ariani nawo. 38Kake Paulo kalolia nkisha ikurika ito andevarea ifo Pamfilia ataende nawo mashoṛeń ndi. 39Kyasia tikasha-wo ngani kari kawo kumande valakana. Barinaba kakurika Mariko vakaaṛukia ngalaveń vakaenda Kipiro. 40Na Paulo kasaua Sila kaimboo kyaaṛo eeterevio̱o̱ wanavamae Iṛuva avakurike na uwoo. 41Kaira kari ka Siria na Kilikia eekaarisaa siṛi tilya.
Currently Selected:
Mitanie ya varumi 15: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
