Mitanie ya varumi 17
17
1Neeli vandemaa iira ifo Amfipoli na Apolonia vakafika Tesalonike. Neefo iifoo numba ya iterevia ya Vayuda. 2Na Paulo katana sheeli eeshivie kaaka neefo vakai kauṛana nawo Sabato isaru kya filya fitisiṛie mitisiṛień. 3Kavaorusa na bata na ivaongoya sheeli kyeewwaraa Kristo aliswa ukiva na iṛuka kwa vafu. Kamanda eenumbuaa: Yesu uu nkee imwongoya mboni tamwi yye Kristo. 4Kiindi kari kawo vakakusura vakakuwara na Paulo na Sila na Vagiriki veengi veekusuriee Iṛuva na vaka veeworee tikisi nta veekee vaangu ndi. 5Na Vayuda valya vakaira iriso vakakurika vandu kiindi kari ka vandu va dua vataare nsendo nnuru. Nawo vakasandia syamu vakaanta kitari muṛiń. Vakalengetia numba ya Yason veeṛuuyaa-wo Paulo na Sila vavarwaa mbele ya vandu va muṛi. 6Neeli vandevatuṛa-fo vakasuṛua Yason na kiindi kya vanavamae vakavarwaa kwa vashili va muṛi veeṛoṛongyaa veenumbuaa: Vandu va vafukiye isanga lyoose vansha kunu nafo. 7Na Yason kavawaria kwamwi. Na iva woose vakee itana findo fikee mbaai na mavavaso a Kaisari veenumbuaa sheeli iifo mangi ingi avaangwaa Yesu. 8Vakaunganisa vandu veengi na akwaa washili va muṛi ili vandeita ifi. 9Neeli vandemaa iwaria masaa a nrendeke Yason andevaniingia na vaaroe vamwi vakavaotoṛa. 10Lia eni vanavamae wo vakaṛaṛata Paulo na Sila kio kilya kumande Beroya. Ili vandefika-fo vakaira na numba ya iterevia ya Vayuda. 11Na vandu va veeworee windi kita valya va Tesalonike vakawaria kirero na warutu. Vakasaṛaana mitisine nkonu woose valle akwaa findo fo nkuro fikai. 12Kyasia vandu veengi kari kawo vakakusura na vaka va Kigiriki iwo veeworee tikisi na womi veekee vaangu ndi. 13Kake Vayuda va Tesalonike ili vandeita mboni sheeli kirero kyo kikee ikwaniswa mPaulo kulya Beroya vakaenda ifo nafo vakafulutafuluta syamu. 14Kyeeri kilya kyeni vanavamae valya vakakurika Paulo aende kumande mbaai ya nruva. Kake Sila na Timoteo vakasaa ifo Beroya. 15Na valya vandeimia Paulo vakamfita muṛiń wa Atene. Neeli vandemaa iwaria ivavaso lya irwaya Sila na Timoteo, sheeli manya vatakyewa insoṛa, vakauya na kwawo.
16Ili Paulo eevaveree ifo Atene kalolia sheeli muṛi uu wishule fwana ta maṛuva a wongo, nrima wamwi ukafulutwa nnu. 17Karera na Vayuda na valya vandekuwara nawo ifo numba ya iterevia. Na akwaa nsingiṛeń karera na vandu andekwania-fo nawo. 18Na vandu kiindi va taari ya Epikuro na ya Sitoa vakavingana nae. Veefo vandenumbua: A nriṅani uu afurie irera ki? Vengi vakanumbua: Alolikie sheeli mmukwanisa mboni ta maṛuva meeni. Mfulya Paulo eekee ikwanisa mboni ta ifura ta Yesu na ta iṛuka lyamwi. 19Vakawwara vakankurika andu a ireria fikwena kiduruń kya Aresi vakanumbua: Naare? Timakii imanya misendie ya miloshie ii miiya kukee iilosha? 20Amu kukee innde mboni shiiya marwiń eru. Kyasia tifurie imanya misendie ya mboni ti. 21Fulya Vaatene na veeni wo veekee ifo veeworee nta mwaanya wa kirero nta kimwi kita iniingia mboni na yaranya mboni ta kindo kiiya. 22Kyasia Paulo kasalala alya kiduruń kya Aresi karikari kanumbua: Muṛe womi va Atene, llolie mukee vandu muworwa nnu mmasha a iindia maṛuva anu findoń foose. 23Lia nduaṛua kunu kwanu niillaa andu anu a irasia nakooya kirasioń kitisiṛie-wo: Nkya Iṛuva liteeshiwa. Kyasia ito mumwindiaa mutamwishi yye uu nkee imukwanisia mboni tamwi. 24Iṛuva uu yye atana isanga na findo foose fiifo, amu ye ni Nndumi wa iṛuvewu na isanga. Nta akaa numba ta iterevia tantanwa na maako a vandu ndi. 25Ana nta aṛundio̱o̱ kwa maako a vandu ndi ana nta kindo kintinye, amu yye aniingie woose muu na mumuyo na findo foose. 26Nae yye andemilisa ngyuṛiti toose ta vandu kwa nkuuku umwi kavaniinga mwaanya wa ikaa masangeń koose. Kavarwaya feeri fa muu wawo na miyanu ya firembo fawo. 27Yye uu afurie vaṛuye Iṛuva, na kwakooya vatangatanga vallolie. Lla kasa atakee kwaasha na nndu woose weru, 28Fulya kwamwi tiutaa muu weru na mikae yeru na foose tikee nafo. Sheeli na vaaṛia kiindi va kikwanu vandenumbua: ”Neese tikee va ufwari lwamwi“. 29Kyasiań kwakooya ise tikee va ufwari lwamwi, kivaa ivakanisa Iṛuva na mitanie ya saabu ana ya fesa ana ya mawe findesongosio̱ kwa imakii na uṛango lwa vandu ndi. 30Kyasia Iṛuva ameeṛa feeri filya fa utondo lwa vandu mungo. Kake alli akee iṛaṛika vandu woose na vakava kwi vailashike mirima yawo. 31Mfulya andeeṛia nkonu ashaa nato aumisie va isanga na usumani. Na uumisio lu kalurambikia nseṛo ulya andenduta kwa vafu kanrambuya vandu woose vautiewo inkusura.
32Kyasia ili vandeita mboni ta iṛuka lya vafu, vengi vakamweetia. Vengi vakanumbua: Tikwaranyaa mboni yo nkonu ungi. 33Nae Paulo kakwimboo kalakana nawo. 34Na womi kiindi vakakuwara nae vakakusura. Kari ka iwo eeifoo nndu wa kikwena kinini kya kiduru kya Aresi yye Dionisio na nka umwi irina lyamwi nDamari na vandu vengi andu emwi nawo.
Currently Selected:
Mitanie ya varumi 17: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
