Mitanie ya varumi 14
14
1Na kulya Ikonio vakaira na numba ya iterevia ya Vayuda vakaongoya-fo. Na syamu nini ya Vayuda na Vagiriki vakakusura. 2Kake Vayuda valya vatakusurie wo vakafuluta vayavaṛumu na ivaatia fikasha, amu vasue vanavamae. 3Kyasia vakakaa ifo mikonu miingi veekwanisaa na baa vakuvavie na Nndumi. Nae Nndumi karambua kirero kilya kya ililia lyamwi eeveelekiaa amu myorusie ya maṛiikiswa itanike kwa maako awo. 4Kake wiingi lwa vandu veekee muṛiń vakakwava kavili. Vengi vakakaa taari ya Vayuda na vengi taari ya varumi. 5Kikakwimboo kitari kwa vayavaṛumu na kwa Vayuda na vanini vawo vavatuṛue na ivakaba na mawe. 6Ili varumi vandemanya mboni ii vakarishia Lisitira na Deribe ikee miṛi ya Likaonia na ngyuruka tikee miyanuń. 7Vakakaa-fo veekwanisaa mboni shinuru ta ikia.
8Na ifo Lisitira eeifoo nndu umwi marende amwi eekee manketenkete. Eekee kisaya kuuka ndewuń ya mae, nae eemeendaa kutu ndi. 9Nndu to kaaranya Paulo ili eereraa. Nae kamulla koroo kalolia sheeli awore ikusura lya ikiṛwa. 10Karera na ununga unini kamwia: Salala na marende afo kinsha! Kasalala ree kaṛua. 11Neeli isyamu lindelolia kilya Paulo atana vakarosa ngyununga tawo veereraa na mirerie yawo ya Kilikaonia: Maṛuva ankufananisa na vandu akatiolokia. 12Vakavaanga Barinaba Seusi na Paulo vakavvaanga Hermesi, fulya yye eekee nreri. 13Na nkohani wa Seusi eeworee numba yamwi ya ivika firaso ikee wooṛo ya muṛi. Kannde numbe na fiṛeto fa fivaṛo ifo mbengeń ya muṛi arie ivikia varumi firaso andu emwi na syamu. 14Kake varumi valya Barinaba na Paulo ili vandemanya ikyo vakarandaranda miseto yawo vakakwata io isyamuń vakaṛoṛongya 15veenumbuaa: Muṛe womi, nki ili mukee itana ifi? Neese tikee vandu sheeni. Tikee imukwanisia mboni shinuru ta ikia, amu mwilashike na itia findo fi fa dua na yaṛukia Iṛuva uu eefo na muu, uu atanie iṛuvewu na isanga na nruva na foose fiifo. 16Nae ni ulya ilyo mbele mikonu yo yaira atia vayavaṛumu woose vasoṛe shia tawo wo veni. 17Kake andeiwukana neeni ndi, fulya atana na finuru eemuniingaa fua yuka iṛuvewu na feeri fa iilula eemuwuurusaa mirima yanu shoonga na ifura. 18Nawo ili veereraa kuri vakaima isyamu kwa ngatara vatavarase. 19Veeifoo Vayuda vandefika-fo vauka Antiokia na Ikonio vakakuria syamu vakakaba Paulo na mawe vakansuṛuya wooṛo ya muṛi veekusaṛaa ammaa ifwa. 20Kake ili vanalosho vandesha vallengetie kakwimboo kaenda kulya muṛiń. Na ili lya ndesi kauka-fo kaenda andu emwi na Barinaba vakafika Deribe.
21Ili vandemaa ikwanisa mboni shinuru ta ikia kulya muṛiń ulya na ikooya vanalosho veengi vakauya na kulya Lisitira na Ikonio na Antiokia muṛi wa Pisidia 22veekaarisaa mirima ya vanalosho, amu vakaa ikusureń lia na ivaikimba sheeli kyatiwara yaka umangiń lwa Iṛuva na ngatara shiingi. 23Vakavasauya vashili siṛiń yoose vakavarambikia Nndumi to vankusurie veetereviaa-wo na ikootoya. 24Vakaira kari ka Pisidia vakafika urukefi lwa Pamfilia. 25Neeli vandemaa ikwanisa kirero kilya kulya Perige vakainama kumande muṛi wa Atalia. 26Na kuuka ifo vakasaama ngalaveń vakaenda Antiokia. Neefo mfo vaterevio̱ uwoo lwa Iṛuva mashoṛeń alya veemmaa yawutia. 27Vammaa ifika-fo vakasandia siṛi yoose vakavaongoya filya foose Iṛuva andetana andu emwi nawo na sheeli anruya vayavaṛumu mwaango wa ikusura. 28Vakakaa ifo mikonu itakee myaangu andu emwi na vanalosho.
Currently Selected:
Mitanie ya varumi 14: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
