Mitanie ya varumi 13
13
1Neefo siṛiń ilya ikee Antiokia veeifoo vaauya na valosha, nawo ni Barinaba na Simeon eevaangwaa Nigeri na Lukio wa kulya Kirene na Manaen ulya eekee uroe wa mangi Herode, na Saulo. 2Kyasia iva ili veeterevaa Nndumi na ikootoya Mumuyo Nsongori kanumbua: Shisauyeń Barinaba na Saulo vaende mashoṛeń alya nndevavaangia. 3Ili vandemaa ikootoya na itereva vakavaekeṛia maako vakavaotoṛa vaende.
4Kyasiań vandu wo ili vandemaa irumwa Mmumuyo Nsongori vakainama Seloikia. Na kuuka ifo vakaira nruveń vakafika Kipiro. 5Na ili veekee kulya Salami vakakwanisa kirero kya Iṛuva numbeń ta isomia ta Vayuda. Nawo veerianii na Yohane kava ndundi wawo. 6Ili vandemaa iira karikari ka uruka loose lwa Kipiro kumande muṛi wa Pafo, vakalolia nndu nsavi akee mwauya wa wongo. Nae ni nndu Muyuda irina lyamwi mBar-Yesu. 7Nndu uu eekuworee na nshili wa kulya Serigio Paulo akee nndu ndango. Nshili to kavaanga Barinaba na Saulo vashe kwamwi kafura yaranya kirero kya Iṛuva. 8Kake mwaanga ulya Elima — amu yo yyo misendie ya irina lyamwi — kavingana nawo kafura iroongia nshili ulya nrima wa ilea ikusura. 9Kake Saulo ulya avaangwa na Paulo eeshue Mumuyo Nsongori kamulla koroo kanumbua: 10Iwe kwishue ntambwe na ukasha loose kukee mwana wa Satana, kukee nkituva wa udede loose, kutiaa-wo se yotuaotua shia ta Nndumi tiseṛeekie? 11Kyasia lla uko lwa Nndumi lukuwaraa, nawe kuvaa ndoń kutakiloliaa saa kyeeri kilive. Lia eni nruve ukawwoya na llema kalengetialengetia eeṛuyaa nndu wa iwwara uko amworuse shia. 12Na ili nshili ulya andelolia filya findetanika kakusura eṛiikaa kya miloshie ya Nndumi.
13Numa Paulo na vaaroe vakasaama ngalaveń vakauka kulya Pafo vakafika muṛiń wa Perige urukeń lwa Pamfilia. Mfo Yohane andelakana nawo kauya Yerusalemu. 14Kake wo vakakwimboo kulya Perige vakaira kari ka uruka vakafika Antiokia muṛi wa Pisidia. Vakaira na numba ya iterevia nkonu wa Sabato vakakaa rembo. 15Kyasia ili mavavaso andemaa isomwa na mboni ta vaauya fisuku, vanini va numba ya iterevia vakavarumia nndu avaie: Muṛe vanavama, kwakooya moore kirero kya yeleka vandu va, kirereń. 16Paulo kakwimboo kavatukia uko kanumbua: Muṛe womi va Isiraeli neeni mweṛee Iṛuva, shaaranyiń! 17Iṛuva wa ufwari lu lweru lwa Isiraeli yye asaua vaande yeru kafumbuta vandu wo ilyo veekee sha veeni urukeń lwa Misiri. Kasaaṛa uko lwamwi kavauta-fo. 18Kavasisiria andu a myaka makumi aani kulya bateń. 19Na ili andemaa ireta ngyuṛiti mfungare kulya urukeń lwa Kanaan kavaniinga uruka lo luve diṅu yawo. 20Ikaira myaka mayana aani na makumi araanu. Numa yayo kavaniinga vashili kumande kyeeri kya mwauya fisuku ulya Samweli. 21Numa yayo vakatereva vaniingwa mangi. Iṛuva kavaniinga Sauli mwana wa Kisi akee nndu wa ufwari lwa kwa Benyamin kwa kiṛengo kya myaka makumi aani. 22Neeli andemaa imwuta-fo ito, kaseṛeesa Davidi ave mangi yawo ulya andenrambua eenumbuaa: ”Nallolia Davidi mwana wa Isai, ni nndu asenye nrima wakwa, atanaa mifurie yakwa yoose“. 23Ifo uṛitiń lwa nndu to Iṛuva andeendee vandu va Isiraeli nkiṛa, yye Yesu sheeli arekia. 24Nae kitaare andesha, Yohane eemoongoyaa vandu woose va Isiraeli mboni ta ubatiso lwa iilashika. 25Na Yohane ili eekee imarisia uṛundi lwamwi kanumbua: Mukusaṛie niń nkee i? Nniń ye ndi. Kake lleń akee isha umwi numa yakwa ito ntakaṛiaa iboṛomua faaru fa marende amwi. 26Muṛe vanavama, mukee vana va ufwari lwa Abraamu na iwo vakee kari kanu vakusurie Iṛuva, nkweru ise kirero ki kya ikiṛwa kinderikwa. 27Amu iwo vakee Yerusalemu na vanini vawo vandemanya Yesu uu ndi vakamwumisia. Na kuro vandeawutia firero filya fa vaauya fisuku fikee isomwa nkonu woose wa Sabato. 28Lla kasa vandetuṛa kiteveto kya iwwaa vakatereva Pilato awalwa. 29Neeli vandemarisia foose eentisiṛio̱o̱, vakamwolota kiriń vakandika mbangeń. 30Kake Iṛuva kanduta kwa vafu. 31Kalolika mikonu miingi kwa valya vanderwa nae vauka Galilaya vakafika Yerusalemu. Wwo vakee varambua vamwi alli mbele ya vandu. 32Neese tikee imukwanisia nrumi shisha ya kirekio kilya kinde-niingio̱ vaande yeru sheeli: 33Iṛuva antifitia ise tikee vana vawo kirekio kyo, ili andeṛuta Yesu kwa vafu. Mfo kuro kyeentisiṛwaa na akwaa nkitabuń kya kavili kya fiimbo fa Davidi: ”Iwe ni iwe mwana wakwa nniń nakwira nnu“. 34Lingi sheeli andenduta amu atabwaa, Ilyo anderera sheeli: ”Mmuniingaa ini findo fisongori fa Davidi fiiya fitavaa iilashika“. 35Kwa ikyo na andu engi akee irera: ”Kureaa nsongori wafo abwaa ndi“. 36Amu ili Davidi andemaa iṛundia mifurie ya Iṛuva kyeeri kyamwi kafwa kaṛikwa kifuń kya vaandee yamwi kabwaa. 37Kake ulya andeṛutwa ni Iṛuva ye abwaa ndi. 38Kyasia vanavama, kimanyike kwanu sheeli kiimba kya uu mukee ikwanisio̱ itio̱ lya mareko 39Na kwa kiimba kyamwi ulya woose amwirikiaa ataalio̱o̱ usumani lutavaa itaa ifo uvavasoń lwa Mose. 40Kyasia kulleń mutafikio̱ nkirero kilya kyarerwa wauya fisuku sheeli: 41”Lleń ini muwore wilo muṛiike na ireka mureke! Fulya niń nkee itana kindo kyeeri ki kyanu kindo mutakiirikiaa deń, na akwaa nndu amwongoya are.“
42Neeli veesomukaa vakavatereva vaongoywa lingi firero fi nkonu ungi wa Sabato. 43Ili kisomio kindesomuka, Vayuda na vandu vasongori va siṛi vakakulunga na Paulo na Barinaba. Nawo vakarera na vandu valya vakavakaarisa nrimiń vakaa vakuwore na uwoo lwa Iṛuva. 44Na nkonu to wa Sabato undesoṛa vandu veengi kufui va muṛi woose vakakusandia vaaranye kirero kya Iṛuva. 45Kake ili Vayuda vandelolia isyamu vakaira iriso vakakana firero findererwa mPaulo veefiiriaa ngani na iruma. 46Paulo na Barinaba vakarera na baa veenumbuaa: Kyeewwaraa kirero kya Iṛuva kirerwa kwanu mukee Vayuda lya mbele. Kake fulya mukee ikiumbutia kwaasha na ikulolia mirimiń yanu sheeli mutatinywa muu wa miṛeṛe, Heń te tikiongoyaa vayavaṛumu. 47Amu nkuro tikee vavavase ni Nndumi: ”Nankurwaa kuve langa ya vayavaṛumu, kuve mukiṛa kumande mmando wa isanga“. 48Ili vayavaṛumu vandeita ifo vakafura vakaitikisa kirero kya Nndumi. Na woose veemmaa ideeṛio̱ muu wa miṛeṛe vakakusura. 49Na kirero kya Nndumi kikakwana urukeń lua loose. 50Kake Vayuda vakaaya vaka vanini vandekuwara na Vayuda na vanini va muṛi vakakuria vandu, amu vasue Paulo na Barinaba vakavaumbuta miyanuń yawo. 51Nawo vakavaangatia funga ya marende awo vakaenda Ikonio. 52Na vanalosho valya vakaishua ifura na Mumuyo Nsongori.
Currently Selected:
Mitanie ya varumi 13: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
