Mitanie ya varumi 12
12
1Feeri filya feni mangi Herode kawara kiindi kya Vakristo kavatuṛua. 2Kawaa Yakobo mwanamae wa Yohane na shombo. 3Ili andelolia sheeli kikee isenya Vayuda kawara na Petiro. Na mikonu yo ikee mikonu ya mikate itadookie. 4Ammuwara kanrwaa kifingioń kanrambikia maakoń a vasikari vaani vaani vanringe. Kafura ansomute anrwaa mbele ya vandu Pasaka ikamiira amwumisie-fo. 5Kyasia Petiro karingwa kifingioń na siṛi ikalunga itereva Iṛuva kiimba kyamwi.
6Na kyeeri Herode andefura insomuta, na kio kilya kyeni Petiro eelelee karikari ka vasikari vavili afingie na mise ivili. Na kiwooṛo veeiyoo varingi va iringa kifingio. 7Lia eni malaika wa Nndumi kasalala kufui nae, langa ikamulika kulya kiṛiń kilya. Malaika ulya kakaba Petiro io mbari eemwiaa: Kwimboo alli kuri! Na mise ikaangaria si yuka maakoń. 8Malaika kamwia: Kufinge, ṛaa faaru fafo! Katana kuro. Numa kamwia: Raa nseto wafo kushisoṛe! 9Nae kasomuka wooṛo kansoṛa, nta imanya sheeli mmboni ya dede yaṛundwa mmalaika. Kakusaṛa sheeli yyoria da. 10Vakaira iringioń lya mbele na lya kavili. Vakasha kumande mwaangoń wa minya wa yaka muṛiń ukavaruukia to muni. Vakasomuka wooṛo vakaira shień imwi. Kwibari malaika kantia-wo. 11Neeli Petiro andeṛukio̱ kanumbua: Alli nammanya dede sheeli ni Iṛuva aruma malaika wamwi asheshuuta ukoń lwa Herode na iverea lya vandu va Vayuda. 12Ili eekusaṛaa ifi kafika numba ya Maria akee mae wa Yohane ulya avaangwa na irina lyamwi lya kavili Mariko. Na vandu veengi vee-kusandii-wo veeterevaa Iṛuva. 13Nae ili eekabakabaa yoondi iketi lya kika irina lyamwi ni Rode kasha yaranya. 14Ili andemanya ununga lwa Petiro nta irua mwaango kiimba kya ifura. Karisha kaaka na kulya kari kavaia sheeli Petiro aselele mwaangoń. 15Vakamwia: Koorwa ni uketo. Kake ye kakaarisa nnu kanumbua sheeli mfo kuro kikai. Wo vakanumbua: Mmalaika wamwi. 16Petiro kaengeṛia ikabakaba. Ili vandemaa inruya vakallolia vakariika deń. 17Nae kavatukia uko vasie do kavaongoya kasa Nndumi amwuta kifingioń. Kavaia: Endoongoyeń Yakobo na vanavamae veru mboni ti. Kakwimboo kaenda kundo kungi.
18Ili kundekya vasikari vakaṛiika nnu, nkwi Petiro aira. 19Ili Herode andenduya nta illolia kauṛa varingi valya kavavasa vawalwa. Numa kainama auka Yudaya kaenda Kaisaria kakaa-fo. 20Na kyeeri kilya Herode eetuṛukiee nnu vandu va Tiro na Sidon. Nawo vakarera kikwena vakanrumia vandu va intereva. Vakawara undoo na Bilasito akee mulla wa numba ya mangi vakatereva unambwe, fulya uruka lwawo lwikooyaa shoonga urukeń lwa mangi ilya. 21Kyasia nkonu umwi weenrekio̱o̱ Herode kaṛaa miseto ya kimangi kakaya kifumbi kyamwi kya witoṛo kareria vandu. 22Vandu vakaṛoṛongya veenumbuaa: Ni ununga lwa Iṛuva, nta ni ununga lwa nndu ndi. 23Lia eni malaika wa Nndumi kankaba, fulya kitaare andeniinga Iṛuva tikisi. Kaliwa mmakuru akee na muu kafwa. 24Na kirero kya Iṛuva kikafumbuka na ikwana. 25Na Barinaba na Saulo ili vandemaa yawutia uṛundi lwawo vakauya Antiokia vauka Yerusalemu vakakurika na Yohane eevaangwaa Mariko.
Currently Selected:
Mitanie ya varumi 12: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
