Barua ya Timoteo ya kavili 2
2
1Kyasia iwe, mwanakwa, kukukaarisie uwooń lwa Kristo Yesu. 2Na findo filya kundefiitia kwakwa mbele ya varambua veengi ifo kurambikie vandu vawore usuro iwo veeshi ilosha vengi. 3Sisiria ngatara andu emwi nań sha nseṛo nsha wa Yesu Kristo. 4Eefo nkabana fira akwatariaa findo fa iluya muu ndi, amu asenye ito anrwaa mashoṛeń a nseṛo wa fira. 5Na kwakooya nndu avingana kitavanuń, aniingwaa uvingo kitaare avvingana kisha ndi. 6Kyawara nremi ulya akee iṛunda na nrike ave wa mbele ilya shoonga ya nrema. 7Manya nnu filya nkee irera. Na Nndumi akwaviaa uṛango lwa imanya findo foose.
8Kumbua Yesu Kristo ulya andeṛutwa autwa kwa vafu, amilie ufwariń lwa Davidi, sheeli nrumi shisha ikee irera ilya nkee ikwanisa. 9Kiimba kyayo naliswa ukiva andu a ifingwa sha mutana fikasha. Kake kirero kya Iṛuva kivaa ifinga ndi. 10Nkyo kiimba nasisiria findo foose kiimba kya vasaue valya, amu nawo vakooye ikiṛwa lia likee kari ka Kristo Yesu andu emwi na unini lwa miṛeṛe. 11Kirero kya ikusurwa nkyo iki: Kwakooya tafwa andu emwi nae, tikaa na muu andu emwi nae da. 12Kwakooya tisisiriaa, tishiliaa andu emwi nae. Kwakooya ise tankana, nae atikanaa. 13Kwakooya titankusuraa, ye eengeṛiaa iva na uwoo, amu amakii ikukana ye muni ndi.
14Vakumburuse ifi kwivaikimbaa mbele ya kisangu kya Iṛuva vatave na ivingana lya firero fitawore mbusha kita ifuluta valya vakee yaranya. 15Kutomarise ikworusa kwa Iṛuva sheeli kukee ndundi wa dede atatanaa findo fa usutu kwiṛundaa na kirero kya dede na useli. 16Kwaave na firero fa iiṅana fitawore misendie, fitakee fa miloshie. Fulya vandu sha iwo veengeṛiaa yenda fikasheń 17na kirero kyawo kyambukiaa sha saka ya ivave. Kari ka iwo veefo Imenayo na Fileto 18vandetuṛa dede ilya veenumbuaa sheeli iṛuka lyammaa iva. Nkuro vandeteveta na vengi vatakusure lingi Nndumi.
19Kake mfulo wa Iṛuva uselele, nato uwore kiringisio ki: ”Nndumi eeshi valya vakee vamwi“. Na lingi: ”Ulya woose asendaa irina lya Nndumi atie-wo ukasha“. 20Kyasia kari ka numba nini fiifo fiya fa saabu na fesa da ndi, kake na fa kiri na fa uteri. Fiifo fingi fiwore mashoṛa a tikisi na fingi fiwore ndi. 21Kyasia kwakooya nndu eewukana na vandu iwo, avva sha kiya kiniinge tikisi. Kyammaa iiliswa kisenye Nndumi, kyansongosio̱ kya ishoṛa loose inuru.
22Kake risha milangie ya ukoo, kulatie usumani na ikusura na ikunda na unambwe andu emwi na valya vakee ivaanga Nndumi na nrima mweelwa. 23Kake lea ivingana lya iiṅana lya vandu kitaare valloshika kwimanyaa sheeli linnde myaandu tubu. 24Lingi ndundi wa Nndumi atave wa myaandu, kake avie vandu woose na uwoo, ave llosha wa dede na nsisiria vakasha, 25eeveekimbaa na ulalamboo valya vakee ilea, amu kwakooya kivaa Iṛuva availashie makusaṛo na ivaniinga imanya filya fikee fa dede, 26vasangike lingi mirwe yawo na yuka nreyoń wa Satana, fulya wo veenreywaa yye na itana mifurie yamwi.
Currently Selected:
Barua ya Timoteo ya kavili 2: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
