Barua ya Timoteo ya kavili 1
1
1Niń Paulo nkee nrumi wa Kristo Yesu kwa mifurie ya Iṛuva isumani na kirekio kya muu ukee na Kristo Yesu. 2Nakwisana iwe Timoteo mwana wakwa nkunde. Uwoo luve nawe na ililia na unambwe fuukie kwa Iṛuva Nde na kwa Kristo Yesu Nndumi weru!
3Nkee yaana Iṛuva uu ninterevaa kuuka ilyo mbooko ya vakuuku vakwa na nrima mweelwa, sheeli nkukumbuaa iwe matika woose fiterevioń fakwa kio na nsanyiń ntalemwa. 4Nań llangie nnu ikulolia niikumbuaa masoru afo, amu niishue ifura, 5niikumbuaa ikusura kukee nalyo fitawore ukavili, amu lya mbele lukee na kyekue wafo Loisi na yeyo wafo Evonike. Nań nkusurie deń nawe kukee nalyo.
6Kiimba kya ikyo nakukumburusa kuṛute lingi wavi lua lwa Iṛuva kundeluavio̱ lia nndekwekeṛia maako akwa. 7Amu Iṛuva antiaṛua tive vandu vawore weṛei ndi, kake antiaṛua tive vandu vawore finya na witanu na nrima wa useli. 8Kyasia manya kutaire sonu ya irambua Nndumi weru ana manya kutashiirie sonu niń nkee mfinge kiimba kyamwi. Kake sisiria mavavio andu emwi nań kiimba kya nrumi shisha kwa kiṛengo kya finya ya Iṛuva. 9Yye uu andetikiṛa kativaangia fuva shisongori kitaare nkwa mitanie yeru ise, kake nkwa kiṛengo kya wafio lwamwi muni na uwoo lwamwi. Uwoo lo tindeniingwa nKristo Yesu kuuka mbooko. 10Lukamanyika alli, ifi nkiṛa weru Yesu Kristo andelolika uu andefukya finya ta ufu kannde muu na mikae itakisiaa kwa shia ya nrumi shisha. 11Kyayo niń nanrawa-fo vve nkwanisa na nrumi na llosha.
12Nkyo kiteveto naliswa ngyukiva ti. Kake nta niilashaa ndi, fulya niishi ulya ninkusurie na imanya sheeli awore finya ya iringa kilya nndeavio̱ kumande nkonu ulya ufikaa. 13Wara firero filya foore muu kwamiitia kwakwa fa ikukaarisia ikusureń na ikundeń lya ikunda Kristo Yesu. 14Ringa wavi lua usha kundeniingwa kwa finya ya Mumuyo Nsongori akee neese.
15Kwammaa imanya mboni ii sheeli woose vakee Asia vandeshitia, na kari kawo veefo Figelo na Erimogene. 16Nndumi alilie va numba ya Onesiforo, amu keengi eekee ishiwiiṛia muu ana nta andeiria mise yakwa sonu ndi. 17Kake ili andefika Rome ashiṛuya na utomari kumande ashikooyaa. 18Nndumi Yesu anniinge akooye ililio̱ kisanguń kya Iṛuva Nndumi nkonu ulya. Na kasa ashiṛundia fiingi ifo Efeso, iwe kwishi nnu.
Currently Selected:
Barua ya Timoteo ya kavili 1: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
