Barua ya Timoteo ya mbele 6
6
1Valya woose vakee masinga kyawara vairie womi vawo sonu, amu irina lya Iṛuva litarumwa na miloshie yeru. 2Na valya vawore womi vakusurie manya vatavaile, ili vakee vanavamae vawo. Kake vaengeṛie ivaṛundia, fulya vakusurie Iṛuva na ikundio̱ yye. Amu nawo vakee iniingia findo fa yelekia vengi.
3Firero ifo filoshe na iikimba. Kwakooya eefo nndu aloshaa kingi ana atairikie firero fa Nndumi weru Yesu Kristo fiwore muu ana miloshie ikulunganisie na iindia Iṛuva, 4ito ankushomba ateeshi nta kindo kimwi. Teve yamwi ni ivingana na ikureya lya ikureria da. Ifo mfo fuukaa iiria iriso na myaandu na nrumu na ifingia ikasha 5na isuyana litawore mmando lya vandu vavakani sha vaworwa ni uketo vakwavie na udede. Wo vakee ikusaṛa sheeli iindia Iṛuva ni ikooya mbusha. Iwo va mikae yo lakana nawo. 6Nkya dede mbusha nini ni ikusura Iṛuva kikawa andu emwi na ifilwa ni ifo tifiwore. 7Amu nta kindo tiiriee ili tindesha isangeń, ana nta kindo tiimboo kyeeri tuukaa-fo lingi. 8Kake tikawa na shoonga na kya iṛaa tinumbue: Fitifile. 9Kake valya vafurie ifumbisa masaa awo vawaa nreyoń ana mfwaanriń na ilangeń iingi litawore misendie lya ikasheesa vandu na ivakunia uretiń. 10Amu kilya kyantaa ukasha loose ni ilafuka na fesa. Veefo vandelilatia vakareta ikusura Iṛuva vakakuniinga mavaviso meengi wo veni.
11Kake iwe kukee nndu wa Iṛuva iwukana na fikasha ifi! Latia usumani na unuru na ikusura na ikunda na isisiria na ulalamboo! 12Kabana ngabanu shisha ya ikusura lyafo! Wara muu utasiaa uve uvingo lwafo nto kwawaangio̱, amu kwarambua irambua inuru mbele ya varambua veengi. 13Nakuvavasa kisanguń kya Iṛuva aniingaa findo foose muu na kisanguń kya Kristo Yesu anderambua irambua inuru mbele ya Pontio Pilato, 14irikia ivavaso likutaare ilomi, kumande Nndumi weru Yesu Kristo alolikaa. 15Milolikie yamwi tooruswaa ni ṅṅinise uu kyeeri kyamwi awore finya toose ye muni, akee mangi ya mamangi na nndumi wa womi. 16Ni ulya atawore ufu kutu akaa langeń itavaa iserikia, ni ulya kitaare nndu ammulolia ana atamakii illolia. Ito ave na iṅiniswa na unini miṛeṛe na miṛeṛe! Amen.
17Valya vawore masaa meengi kunu isangeń vaikimbe, kaaṛa vatakwishike ana manya vatakusurani na usimba, amu lutaṛakanaa ree. Kake kyawara vaveree Iṛuva uu atiaviaa foose na ififumbuta tikawuura kisha. 18Vaikimbe vave vatana finuru, vave vasaṅiṛia masaa a mitanie misha, vave na maako na iva veelekana na vengi kwa kia kya nrima. 19Kuro llyo ikufisia diṅu ivavie kirembo kinuru kyeeri kilya kishaa, amu vakooye muu ukee muu wa dede.
20Iwe Timoteo, ringa ikyo kunderambikio̱! Iwukana na firero kitaare mfa ufundo fitawore misendie na ivingana lya uṛango lukee lwa wongo tubu. 21Veefo vakee ilatia ifi vakakumba ikusura lya dede.
Uwoo lukaa nawe!
Currently Selected:
Barua ya Timoteo ya mbele 6: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
