Barua ya Vatesalonike ya kavili 2
2
1Kya mboni ta isha lya Nndumi weru Yesu Kristo na isangia lyeru nae tikee imutereva, vanavama: 2Manya mutataṛaakiswa ree ana manya mutakyangiswa mmumuyo llive ana nta nkirero kilive ana mbarua ikee ikusaṛio̱ yyeru, sheeli nkonu wa Nndumi wammaa ifika. 3Manya mutalembwa ni nndu na kava i na mikae yoose. Amu kyawara lishe mbele yuka siṛiń lia inini, na nndu ulya muni urekwa alolike, yye mwana wa ureti. 4Nae ni nkituva ulya akwimboyo kindo kyoose kivaangwaa Iṛuva ana kiwore windi. Na akwaa yye muni akukaarisaa rembo ifo numba ya Iṛuva eekworusaa kyaanya kyamwi sheeli ye yye Iṛuva. 5A le mukumbuye se sheeli lia nkee andu emwi neeni namuia ifi? 6Na alli kilya kikee imwima eekworusaa mukiishi kumande kyeeri kyamwi kyansha. 7Amu kiṛisi kilya kya urekwa lua kikee iṛunda mashoṛa alli. Kake eefo ito akee iima alli kumande autwaa. 8Io llyo muni urekwa ulya alolikaa. Nae Nndumi Yesu antuulaa na mumuyo wa kana kamwi na inreta kyeeri kyamwi kya isha kikamfika. 9Na ili muni urekwa ulya akworusaa aṛundaa eetikwaa nSatana, na iṛunda aṛundaa na imakii lyoose na myorusie na maṛiikiso a wongo, 10na milembie yoose ya ukavili eelembaa nayo iwo vakee vareti, fulya iwo vandelea ikunda udede, amu vakiṛwa. 11Kwa ikyo Iṛuva aveendie finya ya ureti vakusure wongo, 12amu vaumisio̱ woose, fulya vatandekusura fa udede, kake vandesenywa mfilya fikee fa ureti.
13Kake kyantiwara ise yaana Iṛuva mikonu yoose kiimba kyanu, vanavama vakunde va Nndumi, fulya Iṛuva andemusaua kuuka mbooko mukooye ikiṛwa mwiiliswaa mMumuyo na ikusura udede. 14Nkyo andemuvaangia ini na nrumi shisha yeru, amu mukooye unini lwa Nndumi weru Yesu Kristo. 15Kyasia vanavama, salaleń na utomari na iwara miloshie ilya mundeloshwa ni ise kwa firero ana kwa mitisiṛie yeru. 16Na Nndumi weru Yesu Kristo muni na Iṛuva Nde yeru uu andetikunda katiniinga ifura lya miṛeṛe na iverea isha kwa uwoo lwamwi 17ye amuwiiṛie mirima yanu muu na imutomarisa fireroń foose na mitanień misha.
Currently Selected:
Barua ya Vatesalonike ya kavili 2: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
