Barua ya Yohane ya kavili 1
1
1Niń nsuṛi nakwisana iwe yeyo nnini kukee nsaue na akwaa wana vafo wakundie dede. Nta nniń shi muni wakundie da ndi, kake na valya woose vammanya kilya kikee kya dede. 2Tivakundie kiimba kya udede lukee kweru, nalo luvaa neese miṛeṛe. 3Uwoo na ililia na unambwe fuukie kwa Iṛuva Nde na kwa Yesu Kristo akee Mwana wa Nde fivaa neese kundo udede lukai na ikunda.
4Nkee ifura nnu, fulya nallolia kari ka vana vafo veefo varie shia ya udede isumani na ivavaso Nde andetiniinga. 5Na alli, yeyo, nakutereva, amu tikundane. Nta niikai nakutisiṛia ivavaso iiya ndi, kake llia yeni tikee nalyo kuuka mbooko. 6Na ikunda Iṛuva llyo ili: Teende weendo lusumani na mavavaso amwi. Ili llyo ivavaso lia mundeita kuuka mbooko, amu mwende mwikaariswaa llyo.
7Amu valembi veengi vankwimboo isangeń kitaare vakee irambua sheeli Yesu Kristo ansha kwa mikae a wili wa kinndu. Uu yye llembi ulya akee mukana Kristo. 8Kulleń, amu mutarete mbusha ya mashoṛa anu, kake kabanień maṛe anu amuvie woose. 9Ulya woose ateveta vandu atakaa na ufundo lwa Kristo ito awore Iṛuva ndi. Ulya akaa na ufundo ilo awore Nde alungani na Mwana. 10Kwakooya nndu asha kwanu atarie ufundo lo manya mutawwarie numbeń kwanu ana nta mutamwisane. 11Amu ulya amwisanaa avva uroe wa fikasha filya famwi.
12Noore fiingi fa imutisiṛia ini, kake nndefura imurwaya na karatasi na winu ndi, kake noore ba kundo mfikaa kwanu nshe irera neeni kana kwa kana, amu ifura lyeru lyawukie. 13Vana va mfwamae wafo akee nsaue vakwisana.
Currently Selected:
Barua ya Yohane ya kavili 1: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
