Barua ya Vakorinto ya kavili 6
6
1Kake ili ise tikee uṛundiń ilu lwa iṛundia Iṛuva, tikee imufunda: Manya mutawarie ililia lya Iṛuva kya ruu. 2Fulya Iṛuva arera: ”Kyeeri kya isenya nankwaranya, nkonu wa ikiṛwa nankweleka“. Lleń alli kiifo kyeeri kya isenya, alli wifo nkonu wa ikiṛwa. 3Kiimba kya iki tikee na useli, amu mashoṛa eru atabiṛwa. 4Kake findoń foose tikee ikworusa sheeli tikee maketi a Iṛuva. Nafo mfa utele wiingi na fa ngyukiva na fa ngatara. 5Na fa kitani na fa ikabwa na ifingwa na fa myaandu na fa mashoṛa na fa ilala rembo na ikwima shoonga. 6Na fa unuru na fa imanya na isisiria na fa uwoo na fa Mumuyo Nsongori na fa ikundana litawore ukavili. 7Na fa firero fa dede na fa finya ya Iṛuva andu emwi na fiya fa usumani fa ikabana na ikuringa uko usha na uko umuso. 8Tikee ikworusa sheeli tikee maketi a Iṛuva, na tikaṅiniswa na tikabiṛwa na tikarerwa kikasha na tikarerwa kinuru. Tikee ivaangwa valembi, kake tikee va dede. 9Tikee vandu vatamanyikie, kake timanyikaa. Tikee sha vakee ifwa, a te tikee na muu. Tikee sha vakee ituṛulwa, kake tawalwa ndi. 10Tikee sha vanarise, kake nkonu woose toore ifura. Tikee sha vakiva vatawore kindo, kake toore foose. 11Kana keru nkarue kwanu, ini Vakorinto, lingi mirima yeru mmirue kwanu kutu. 12Ifo kari keru kwanu nkunnya ndi, kake kari ka mirima yanu nkunnya. 13Kyasia amu mutaa kiṛengo kilya mwanniingwa — nkee irera neeni sha vana vakwa —, neeni mfo kuro murulwa mirima mutiniinge mwaanya nnini mirimiń yanu.
14Manya mutafingwa nkindo andu emwi na valya vatakusurie Iṛuva. Lwifo wavi ki lwa usumani na lwa urekwa lumakii ikayana andu emwi? Ana wifo nsando ki wa langa na llema? 15Lingi liifo ivakana ki kya Kristo na waaisi? Ana ulya akusurie awore kyeenga ki andu emwi na ulya atakusurie Iṛuva? 16Lingi lwifo witanu ki kari ka numba ya Iṛuva na ya firasio? Amu ise tikee numba ya Iṛuva akee na muu, sheeli Iṛuva anderera: ”Nkaa kari kawo, lingi nruaruaa kari kawo, nań vvaa Iṛuva wawo, nawo vavaa vandu vakwa“. 17Kwa ikyo Nndumi anumbua: ”Somukeń kari kawo, mulakaniswa nawo“. Na lingi: ”Manya mutabaani kindo kiravi, nań mmuwariaa“. 18Na lingi anumbua: ”Vvaa Nde yanu, neeni muvaa vana vakwa va kiwomi na va kika“. Mfo kuro Nndumi muni finya arera.
Currently Selected:
Barua ya Vakorinto ya kavili 6: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
