Barua ya Vakorinto ya kavili 3
3
1Naare? Tambooka lingi ikwitikisa ti veni? Ana tilangie sha vengi barua toore tikisi yeru tishe kwanu ana tuuke kwanu? 2Barua yeru yyo ini, nayo yantisiṛwa ngooń teru ilolikie na isomwa vvandu woose, 3mumanyike na baa sheeli mukee barua ya Kristo yansongosio̱ ni ise, ili tindemuṛundia. Nta indetisiṛwa na winu ndi, kake nkwa Mumuyo wa Iṛuva akee na muu. Lingi nta indetisiṛwa maweń ndi, kake mmaweń akee ifo mirimiń yeru. 4Na ikusurana lyo na Iṛuva tikee nalyo taniingwa nKristo. 5Niikai tikufile ise ti veni ikusura nta kirero kimwi sheeli nkyeru ti veni ndi, kake ifilwa lyeru lyukie kwa Iṛuva.
6Nae yye andetikaarisa tikava vaṛundi vasenye va mma shiiya, nta yyo ya mitisiṛie ndi, kake yya Mumuyo. Amu mitisiṛie innde ufu, kake Mumuyo annde muu. 7Kyasia kwakooya uṛundi lurie ufu lua lwantisiṛwa na irawa maweń lwikee na unini na unini lua lukaima vana va Isiraeli veeimboo miso valle kisangu kya Mose kiimba kya ivarama lya kisangu kyamwi lindesia lingi, 8a le uṛundi lwa Mumuyo luvaa na unini kita se? 9Amu kwakooya uṛundi lu lwakooiya vandu ireka lukee na unini, na mmwasi uṛundi lu lwendee vandu usumani luvaa na unini, lukee unini lukilie lua deń. 10Amu unini lua lwikee lwa kyeenga da ili tiluvakanisaa na unini ilu lukilie kutu, tinumbuaa: nta lua lwikee unini ndi. 11Amu kwakooya kilya kisiaa kiikee na unini, na mmwasi nnu kilya kikaa kikee na unini lukilie.
12Kyasia fulya toore iverea lya mikae ii, tikee iṛunda na utomari wiingi. 13Nta ise tikee sha Mose lia arwaa kirami kisanguń kyamwi ndi, amu Vaisiraeli vatalle mmando wa filya fikee isia. 14Kake makusaṛo awo akee yemeriswa. Amu na kumande nkonu wa nnu ili vakee isomio̱ mma ilya shikuu kirami ikyo kiiyo kisikie, nta iruukio̱, fulya ulya akiutaa-wo nKristo ye muni. 15Kake kumande nnu ili mavavaso a Mose akee isomwa kirami kilya kikee isikia mirima yawo. 16Kake kyeeri ikyo vaaṛukiaa Nndumi, Ilyo kirami kilya kyutwaa-wo. 17Kyasia Nndumi yye Mumuyo to. Na alya Mumuyo wa Nndumi akai wwo na itaulwa likai. 18Kake ise ti woose tilolie unini lwa Nndumi na kisangu kitaare nkisikie. Na kita ifi tiilashwaa tiivakaniswaa na fwana yamwi na yengeṛio̱ teengeṛio̱o̱ unini. Na ifi foose fuukie kwa Nndumi akee Mumuyo.
Currently Selected:
Barua ya Vakorinto ya kavili 3: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
