Barua ya Timoteo ya mbele 4
4
1Kyasia Mumuyo akee irera na baa sheeli mikonu ya ifurumia vavaa vandu vakwavaa na ikusura veearanyaa mimuyo ya ulembi na miloshie ya Masatana 2na itevetwa ni ukavili lwa vandu vareraa wongo veekoṛwaa mmuro wa ukasha lwawo imanyeń lyawo veni. 3Wo walya veemaa vandu veealikaa na ivavavasa veewukani na shoonga shilive tilya Iṛuva andetitana, amu tiwario̱ na waanu walya va ikusura veeshi filya fikee fa dede. 4Fulya kindo kyoose kyasongosio̱ ni Iṛuva nkinuru ana nta kiifo kiwore teve, kwakooya kikee iwario̱ na yaanio̱ ndi. 5Amu kikee iiliswa nkirero kya Iṛuva na kiterewo.
6Kwallosha vanavamae mboni iti kuvaa ndundi nnuru wa Yesu Kristo na ilisa nrima wafo firero fa ikusura na fa miloshie ilya minuru kwisoṛie. 7Kake sumu ta vasuṛi titasumani na miloshie tilee. Kake kukuloshe ku muni kuve muni windi. 8Amu wishiviṛi lwa wili lwelekaa kinnya da. Kake ikusura Iṛuva lyelekaa findoń foose, lingi liwore na kirekio kya muu wa alli na kya ulya uvaa numa. 9Kirero ki nkya dede, nakyo kyawara kiirikio̱ wandu woose. 10Kiimba kya iki tikee yatarikia kirero iki na tikarumwa, fulya tikusurie Iṛuva muni muu akee nkiṛa wa vandu woose na kilanya wa iwo vamwirikie. 11Vavasia mboni iti na itilosha! 12Manya nta nndu ailaa ukoo lwafo, kake va nndu wa iiria valya vakusurie mbele na firero na weendo na ikundana na ikusura na usha. 13Kumande nasha tania utomari kusomie siṛi na iikimba na ilosha. 14Kutave kutaṛunda na wavi lua lwa Iṛuva kukee nalo. Kundeluniingwa kwa wauya usongori lia kwekeṛio̱ maako wasuṛi va siṛi. 15Kwataria iki na ikaa nakyo, amu woose vamanye kasa kukee yengeṛia yenda na mbele. 16Kuringe ku muni na iringa miloshie. Kuware tabu na findo fo. Kwantana kuro kukukiṛaa ku muni na akwaa vvalya vakwitaa.
Currently Selected:
Barua ya Timoteo ya mbele 4: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
