Barua ya Timoteo ya mbele 1
1
1Niń Paulo nkee nrumi wa Yesu Kristo kwa ivavaso lya Iṛuva akee Nkiṛa weru na lya Yesu Kristo yye tiweree. 2Nakwisana iwe Timoteo kukee mwana wakwa wa dede kukusurie Iṛuva. Uwoo lukaa nawe na ililia na unambwe fuukie kwa Iṛuva Nde na kwa Kristo Yesu Nndumi weru.
3Lia niimboo kyaaṛo kya yenda Makedonia nakuvavasia kukaa ifo Efeso, amu kwime vandu valive veeloshaa miloshie ya mikae ingi, 4ana nta vatakuware na sumu titakee ta dede ana mboni ta fimia fa ngyufwari ta mbele titamandaa. Findo sha ifi finnde ivingana, fitannde mashoṛa a iṛundia Iṛuva aukie ikusureń. 5Amu ifurumia lya ikwanisa nrumi shisha ni ikunda limilie ngooń sheelwa na makusaṛoń mesha na ikusureń litawore ukavili. 6Veefo vandu valive vatuṛa ifo vakaaṛukia firero fa ruu. 7Vafurie iva valosha va mavavaso lla kasa vateeshi filya vakee irera ana filya vakee inumbua.
8Tiishi sheeli mavavaso mmanuru, kwakooya nndu aṛundaa nawo kwa shia isumani, 9eemanyaa sheeli ivavaso lyanrawa-fo kiimba kya nsumani ndi, kake nkiimba kya valea na vatakee va walio na vabiṛa Iṛuva na vawore mareko na varavi na vakaba vaande yawo na vakaba vamae vawo na vawaa vandu 10na vaaisi na vaaika womi kwa womi na veeva vandu na varera wongo na valya makite a wongo, na kwakooya kiifo kirero kingi kitavakani na firero fo fiwore muu. 11Kuro mfo tindeloshwa na nrumi shisha ya unini lwa Iṛuva uu eetikiswa, nań naniingio̱ nkwanise.
12Nań nkee yaana Kristo Yesu Nndumi weru uu andeshiniinga finya, fulya ye andeshilolia sheeli nkee nsumani kashirwaa uṛundiń lwamwi. 13Nań lya mbele niikee muruma na mwumbuta na mutuṛua valya vakee vamwi. Kake nalilio̱, fulya natana ifo kwa utondo, amu neenkusuraa Nndumi ndi. 14Kake fisha Nndumi weru andeshiavia fikee fiingi nnu na kwa Kristo Yesu nakooya-fo inkusura na inkunda. 15Na kirero ki nkya dede, nakyo kisumani iwarwa wandu woose: Kristo Yesu ashe isangeń, amu akiṛe varekwa. Nań kari kawo nkee wa mbele. 16Kake nalilio̱, amu Kristo ye aoruse lya mbele kwakwa isisiria lyoose vve myorusie kwa valya vankusuraa vakooye muu wa miṛeṛe. 17Mangi ii ya miṛeṛe atawore mmando ana atalolio̱ na miso a kivandu akee Iṛuva ye muni airio̱ sonu na iitikiswa kyeeri kilungani uteefo mmando! Amen.
18Mwanakwa Timoteo, nankurambikia ivavaso lyo kufifise fisumani na firero fa vaauya findesendwa mbele yafo, amu kukabane ngabanu shinuru kwa finya yayo, 19kwiwaraa ikusura na nrima mweelwa. Veefo kiindi vandefikumba kwaasha vakareta ikusura lyawo. 20Kari ka iwo veefo Imenayo na Alekisandero. Wo navvaniingia Satana, amu valoshike vatakirume Iṛuva.
Currently Selected:
Barua ya Timoteo ya mbele 1: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
