Barua ya Petiro ya mbele 2
2
1Kyasia lakaniń na ukasha loose na mitambwe na ukavili na ureeree na ifingia lyoose. 2Ili mukee sha fivana vandeiriwa suku ti langeń maruva va a kimumuyo atawore ulembi, amu muṅine nawo kumande mufikiaa ikiṛwa, 3kwakooya mwammungyamungya dede mukalolia sheeli Nndumi ni nnuru. 4Yye mwammushea akee iwe liwore muu, lindekumbwa wandu mbaai, kake Iṛuva alisaua live na tikisi. 5Mfo kuro neeni mukee sha mawe awore muu musongosio̱ muve numba ya Mumuyo na iva muve varasia vasongori va iniingia Iṛuva misimbika ya kimumuyo ya insenya kiimba kya Yesu Kristo. 6Kwa ikyo nkitisiṛe mitisiṛień kuro: ”Lleń te nrwaa iwe lya wembe kunu Sion lyeensaulwaa live na tikisi, na ulya alikusuraa akivaa nsutu ndi“. 7Neeni mulikusurie alli muniingwaa wavi lu luwore uuru. Kake valya vatakusuraa: ”Iwe li lindelewa watana numba llyo yeni lindevavia iwe inini lya wembe“. 8Lingi ni ”iwe lya ikusiika na usuṛumate lwa ikwinyamiṛa“. Nawo vakee ikukaba kiimba kya ilea ikusura kirero, nafo mfo kuro vankirwaywa. 9Kake ini mukee ufwari lundesaulwa, mukee na varasia va umangi, mukee vayakyama kisongori, mukee vandu vataue, amu mukwanise mitanie ya unini ya ito andemuuta llemiń kamuvaangia langa yamwi ya maṛiikiso. 10Ilyo mbele mwiworee ufwari ndi, kake alli mukee ufwari lwa Iṛuva. Ilyo mbele mwikee vandu kitaare veellilio̱o̱, kake alli mwammaa ililio̱.
11Vanavama, mukee vandu veeni na va kyaaṛo, kiimba kya iki namufunda mwiwukane na malanga makasha akee ikabana na nrima. 12Mukaa na mitanie minuru kwa vandu vateeshi Iṛuva, amu ili vamureraa kikasha vakalolia mitanie yanu minuru, vautiewo iṅinisa Iṛuva kyeeri vashewaa yye.
13Irikień usongori loose lwa vandu lwisekye Iṛuva kiimba kya Nndumi, na kwakooya mmangi ikee nini 14na akwaa washili varumio̱ yye vakabe valya vatanaa fikasha na ikaarisa valya vatanaa finuru. 15Amu mfo Iṛuva afurie musandise vandu vatondo kana na mitanie yanu minuru. 16Kaań-fo sha vataue, neeli mukee vataue mutakikwaṛue sha vasikia fikasha. Kake manyiń sheeli mukee maketi a Iṛuva muni. 17Indień vandu woose, kundeń vanavamae, eṛeeń Iṛuva, itikiseń mangi!
18Ini vaṛundi, indień womi vanu na weṛei unini, ana nta vvalya vakee vesha na vawoo da ndi, kake na akwaa vvalya vakee vavaave. 19Amu iki nkyo kisenyie Iṛuva, nndu kansisiria unaari kiimba kya ikumbua Iṛuva io akee iliswa ukiva ataare antana kikasha. 20Amu ntikisi ki, kwakooya mwasisiria mwikabwaa kiimba kya filya mwanrekio̱? Kake kwakooya mwasisiria mwituṛulwaa kiimba kya itana fisha, ilu llo usha weni mbele ya Iṛuva. 21Amu ikyo nkyo mwavaangio̱, fulya na Kristo antuṛulwa kiimba kyanu kamutia myorusie, amu mulatie mbayo tamwi. 22Nta ye atana kikasha ndi ana nta ye arera wongo ndi. 23Ili anderumwa, awiiṛia kirumu ndi, ili andetu-ṛulwa nta avanaiya ndi, kake arambikia ulya afukyaa kisumani. 24Yye muni akurika mareko eru kaarosia kiriń kya nsalaba andu emwi na wili wamwi, amu ise tilakaniswa na mareko na ikaa tikaa na muu wa iṛundia usumani. Mfaasha famwi findemukiṛa ini. 25Fulya mwikee vaṛaaṛaa sha mburu shireti, kake alli mwamaaṛuywa mwisi akee nringi wa mirima yanu.
Currently Selected:
Barua ya Petiro ya mbele 2: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
