Barua ya Yohane ya mbele 2
2
1Vana vakwa vakunde, namutisiṛia ifi, amu mutarekwa. Kake kwakooya eefo anderekwa, toore mutisalalia kwa Nde, yye Yesu Kristo akee wa usumani. 2Nae yye kirasio kya mareko eru, ana nta nkya mareko eru da ndi, kake na kya mareko a va isangeń lyoose. 3Na kunu mfo timanyiaa sheeli tammanya Iṛuva, kwakooya tikee iwara mavavaso amwi. 4Nndu kanumbua: Nammumanya, na mavavaso amwi ataawore, nndu to wwa wongo na udede lwifo kari kamwi ndi. 5Kake nndu kawwara kirero kyamwi, kwamwi ye ikunda lya Iṛuva lyamaawukia dede. Kuro llyo timanyaa sheeli tikee nae. 6Nndu kanumbua sheeli akaa nae, ito kyawara aende weendo lua Yesu eekee yenda.
7Vakunde, ivavaso li namutisiṛia ni iiya ndi, kake ni ivavaso lia lya mbele mwikee nalyo kuuka mbooko. Na ivavaso lyo lya mbele nkirero kilya mwankiita. 8Kake lingi namutisiṛia ivavaso iiya, lyo likee lya dede kwa Kristo na kwanu ini sheeli: Llema ukee iira na langa ya dede yammaa imulika. 9Nndu kanumbua akee langeń, nae kasua mwanamae, ito akee llemiń na kumande alli. 10Ulya akundie mwanamae ava mukaa langeń ana aṛaaṛaa ndi. 11Kake ulya asule mwanamae, ye akee llemiń, nae akee yendaenda ifo llemiń ana eeshi kundo akee yenda ndi, amu llema wammuwaa miso.
12Nkee imutisiṛia ini vana vakwa, fulya mwantio mareko kiimba kya irina lyamwi. 13Nkee imutisiṛia ini mukee vaande, fulya mwammanya ito eefo kuuka mbooko. Nkee imutisiṛia ini vakoo, fulya mwawinga Nkasha ulya. 14Namutisiṛia ini vana, fulya mwishi Nde. Namutisiṛia ini mukee vaande, fulya mwishi ito eefo kuuka mbooko. Namutisiṛia ini mukee vakoo, fulya mukee na finya na kirero kya Iṛuva kikee neeni, neeni mwawinga Nkasha ulya. 15Manya mutafure isanga li ana filya fikee isangeń. Nndu kakunda isanga li, ikunda lya ikunda Nde liifo kari kamwi ndi. 16Fulya foose fikee isangeń sha ilanga lya wili na ilanga lya miso na ikushomba na masaa fo fuukie kwa Nde ndi, mfa kunu isangeń tubu. 17Kake isanga lisiaa andu emwi na ilanga lyayo. Kake ulya ava mutana kilya Iṛuva afurie akaa miṛeṛe.
18Muṛe vana, alli nsaa ya ifurumia. Mwamiita sheeli mwima Kristo ashaa. Na alli vammaa ivafo veengi vakee iima Kristo. Mfo tammanyia sheeli saa ya ifurumia iifo. 19Vamuuka kweru ise, kake veekee va kweru ndi. Amu kikooye veekee va kweru, veekaa andu emwi neese. Kake kindeva kuro, amu vamanyike na baa sheeli nta woose wa kweru, ndi. 20Neeni mwamaambwa mafura ni ulya akee nsongori mukamanya foose. 21Nammutisiṛia ini, fulya muteeshi filya fikee fa dede ndi, kake mfulya mweemfimanyaa, lingi mwammanya sheeli iifo wongo yukaa udedeń ndi.
22Lingi ni i akee wa wongo kitaare ni ito akanaa Yesu akee Kristo? Ito yye mwima Kristo ulya akanaa Nde na Mwana. 23Ulya woose akanaa Mwana awore Nde ndi. Ulya arambuaa Mwana awore na Nde. 24Kilya mwamiita kuuka mbooko kyawara kikaa neeni kyeeri kyoose. Kwakooya kilya mwamiita kuuka mbooko kikaa neeni, ini neeni mulunganaa na Mwana na Nde. 25Na iki nkyo kirekio kilya Yesu muni andetirekia, nato mmuu wa miṛeṛe. 26Ifi namutisiṛia kiimba kya iwo vafurie imureta. 27Neeni yaambwa li mwawaria lyukie kwamwi llyo likaa neeni matika woose. Neeni muuṛi mifundie ingi ndi. Myaambie yamwi ikee imulosha foose, nayo ikee ya dede, wwongo ndi. Kyasia kaań nae, sheeli mundeloshwa. 28Na alli, vana vakwa, kaań mukulunganise nae, amu ili alolikaa tive na ifura, titasutwa ili auyaa. 29Mukamanya sheeli Iṛuva wwa usumani, mumanyaa sheeli ulya woose atanaa kisumani amiiriwa yye.
Currently Selected:
Barua ya Yohane ya mbele 2: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
