Barua ya Vakorinto ya mbele 4
4
1Ise vakwanisa kirero kya Iṛuva tifurie ilolio̱ ni nndu woose sheeli tikee vaṛundi va Kristo na varingi va fiṛisi fa Iṛuva. 2Kyasia kwa varingi wo kiifo kindo kingi kikee illwa kwawo ndi kita usuro lwawo lwa iringa. 3Kilya mukee ishirera ini kya mashoṛa akwa ana vandu vengi vakee ishirera, nkindo ndi. Na akwaa nniń shi muni nkaṛiaa ikurera shi muni kya mashoṛa akwa ndi. 4Niń niimakii inumbua da: Niishi nta kindo nankasheesa ndi, kake irera li llyo likee ishiniinga usongori kwa Iṛuva ndi. Eefo umwi tubu ashiuṛaa mashoṛa akwa na ishitaa. Nae ni Nndumi muni. 5Kyasia manya mutafukye alli kya mashoṛa eru kitaare Nndumi ansha, amu yye asherambuaa uṛikio loose lurikio̱ vvandu na imanyisa ashemanyisaa na baa makusaṛo a vandu afisio̱ ngooń. Llyo na nndu woose aavio̱o̱ maṛe amwi ni Iṛuva alya asumani na mashoṛa amwi.
6Kyasia vanavama, firero fo namfirera kiimba kyakwa na kya Apolo na akwaa nkiimba kyanu, amu mukuloshe kweru imanya kirero kilya: ”Kutakilie filya fikee fitisiṛe“, amu nta umwi wanu atakwishike na llosha uu umwi na ilea ulya ungi. 7Amu ni i akee ikwavanisa na ungi? A iwe nkiki kitaare kwankiwaria? Kake kwakooya kwankiwaria kukwitikisiaań ki sheeli kutandekiwaria? 8Mwammaa iwuura, mwammaa ikooya usimba mukawara na umangi kitaare ni ise tamuniingia. Ee kifoo mushiliaa umangiń lu, amu neese tishilie-fo andu emwi neeni! 9Amu llolie sheeli Iṛuva antirwaa ise varumi tive va ifurumia sha vandu kyawara iwalwa tikavia isanga kindo kya iṛiikisa vamalaika na akwaa vvandu. 10Ise tikee variṅani kiimba kya Kristo, kake ini muwore uṛango luukie kwa Kristo. Ise tikee vatanyari, kake ini muwore finya. Ini mukee na tikisi, neese tikee na wilo. 11Kumande saa ii ya alli ise tikee iliwa nsoto na nyura, tikee kya ruu, tikee ikabwa ṅunde, lingi toore kyeń ndi. 12Mmwasi tikee yatarika tiiṛundaa mashoṛa a ilela muu weru na maako eru meni. Tikanrumwa tikavaniinga mboṛa, tikamuumbutwa tikasisiria. 13Tikafingio̱ uresi neese tikalembalemba. Tamaaṛulwa sha kyoo kya isanga na fiṛinda fa findo foose kumande nnu. 14Namutisiṛia ifi, amu mmusute ndi, kake ni imwikimba nafo mukee vana vakwa wakundie. 15Amu na kwakooya muwore sha valosha fiku na fiku va imulosha fa Kristo, kake muwore nta vaande veengi ndi. Amu niń nniń nndemwira nkee na Kristo Yesu kwa shia ya nrumi shisha. 16Nkyo namutereva mushisoṛe niń. 17Kiimba kya iki nanruma Timoteo kwanu akee mwanakwa nkunde akee mwindia Nndumi. Yye amukumburusaa mikae yakwa ya ilosha nkuvavie na Kristo ilya nkee ilosha siṛiń toose andu woose. 18Veefo vakee ikushomba sheeli ntakikaṛiaa isha kwanu. 19Kake nshaa kwanu ree Nndumi kankunda, nań nndeeleliaa nta firero fa iwo vakushombi ndi kita finya ya mashoṛa awo. 20Amu umangi lwa Iṛuva lukee alya irera firero likai ndi, kake lukee alya finya ikai na mitanie. 21Nkiki mufurień? Nasha kwanu nrie mbiiri ana nasha nrie ikunda na nrima wa uwoo?
Currently Selected:
Barua ya Vakorinto ya mbele 4: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
