Barua ya Vakorinto ya mbele 2
2
1Kyasia vanavama lia niń nndesha kwanu, nta nndesha mmukwanisie Iṛuva na unini lwa firero ana nta lwa uṛango ndi. 2Amu niikusaṛiee nta imanya kirero kimwi kwanu ndi kita Yesu Kristo, nae yye akabio̱ nsalabeń. 3Nań nakaa kwanu na mikae ya utanyari na weṛei na irerema iingi. 4Na kirero kyakwa na mikwanisie yakwa nnderera nta kwa firero fa waṛia lwa ikangia ngyuṛango ta vandu ndi, kake nkwa finya ya Mumuyo, 5amu ikusura lyanu litave lya uṛango lwa kivandu, kake live kwa finya ya Iṛuva.
6Lingi fiifo fa uṛango lwa dede tikee iia valya vamakii yawutia, kake mfa uṛango lwa isanga li ndi ana fa iwo vashiliaa isanga li varekaa ndi. 7Kake tarera uṛango lwa Iṛuva lukee kiṛisi, lukee ufise llua Iṛuva eemmaa iludeeṛia kuuka ilyo kala kitaare isanga lyeentanwaa, amu ise tikooye tikisi yeru. 8Uṛango lu veetoṛio isanga li veelwishii nta umwi ndi. Amu kifo veelwishii, nta veekabiaa Nndumi muni unini nsalabeń ndi. 9Nsheeli kyatisiṛwa: ”Filya kitaare iriso lyamfilolia ana kitaare kuri kwamfiita ana kitaare famaaka ngooń ya nndu, mfo Iṛuva eemmaa ideeṛia valya vankundie“. 10Kake ise Iṛuva antirambuya lia atiniinga Mumuyo wamwi. Amu Mumuyo akee yavanisa foose na irambua fiṛisi fa Iṛuva. 11A naań eefo nndu eeshi mikae ya nndu kitaare mmumuyo wa nndu to ukee kari kamwi? Mfo kuro da fa Iṛuva fikai, nta nndu afimanyaa kitaare mMumuyo wa Iṛuva. 12Kake ise tanniingwa mumuyo wa isanga li ndi, kake tanniingwa Mumuyo aukie kwa Iṛuva, amu timakii imanya filya tamaavio̱ ni Iṛuva. 13Nafo mfo tikee ifirera ana tikee ifirera kwa firero talloshwa ni uṛango lwa kivandu ndi, kake talloshwa mMumuyo. Na ifo mboniń ta Mumuyo mfo tikee ikooya firero fa Mumuyo. 14Kake nndu akusurani na mikae yamwi meni awariaa fa miniingie ya Mumuyo wa Iṛuva ndi, amu kwamwi ye nsha fa utondo, amakii ifimanya ndi. Amu ifi kyawara fimanyike kwa finya ya Mumuyo. 15Kake nndu wa Mumuyo akee imanya foose ana ye akee irambuywa ni nndu ndi. 16Amu: ”Ni i ammanya makusaṛo a Nndumi amwie kindo?“ Kake ise tikee na mikae ya Kristo.
Currently Selected:
Barua ya Vakorinto ya mbele 2: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
