Barua ya Vakorinto ya mbele 1
1
1Niń Paulo nndevaangwa vve nrumi wa Yesu Kristo kwa mifurie ya Iṛuva. 2Ise na Sositene mwanamae weru teesana siṛi ya Iṛuva ikee ifo Korinto tiisanaa valya vamiiliswa ni Kristo Yesu iwo vandevaangwa vave vasongori andu emwi na woose vakee yarafuma irina lya Nndumi weru Yesu Kristo andu woose kwawo na kweru. 3Uwoo luve kwanu na unambwe fuukie kwa Iṛuva Nde yeru na kwa Nndumi Yesu Kristo.
4Nkee yaana Iṛuva wakwa mikonu yoose kiimba kyanu na kiimba kya mboṛa mwanniingwa ni Iṛuva mukuvavie na Yesu Kristo. 5Fulya kari ka kindo kyoose mundeva masimba mukuwore nae kya firero foose na kya uṛango loose, 6kwakooya irambuka lya Kristo lyankukaarisia kwanu. 7Kiimba kya iki nta wavi lumwi mwantuṛa ili mwivereaa ilolika lya Nndumi weru Yesu Kristo. 8Nae yye amuniingaa finya kumande ifurumia, amu mukooywa mutawore malomi nkonu ulya Nndumi weru Yesu Kristo ashaa nato. 9Na Iṛuva wwa usuro, nae yye andemuvaanga mukaliana na Mwana wamwi Yesu Kristo Nndumi weru.
10Kyasia vanavama namutereva na irina lya Nndumi weru Yesu Kristo: Murere kimwi mu woose, manya kwanu utave-fo mwavanu, kake muve na ikusaṛo limwi na ifukya limwi. 11Amu vanavama namoongoywa mboni tanu vvalya vakee va numba ya Kiloe, sheeli kwanu lwifo uṛiingi. 12Kyasia misendie yakwa yyo ii, sheeli nndu woose wa kwanu akee irera kingi. Umwi anumbua: Niń nkee wa Paulo, na ungi: nań nkee wa Apolo, na ungi: nań nkee wa Kefa, na ungi: nań nkee wa Kristo. 13A le Kristo akwavie? A le Paulo akabio̱ nsalabeń kiimba kyanu? A le mwabatisio̱ irina lya Paulo? 14Nkee yaana Iṛuva, fulya kitaare nambatisa nndu kwanu kita Kirisipo na Gayo. 15Manya nndu areraa sheeli abatisio̱ irina lyakwa. 16Kake ibatisa nndebatisa na vandu va numba ya Sitefana. Mmwasi wa iwo niishi akwaa nambatisa nndu ungi ndi. 17Amu Kristo ashiruma amu mbatise ndi, kake naamu nkwanise mboni ya ifura ya ikiṛwa. Nakyo kitave na firero fa imanya lya uṛango, amu nsalaba wa Kristo utabiṛwa.
18Amu kirero kya nsalaba kwa valya vakee yenda ireka ni utondo, kake kweru ise tikee ikiṛwa mfinya ya Iṛuva. 19Amu nkitisiṛe: ”Nkasheesaa uṛango lwa iwo vakee vaṛango, na imanya lya vayauṛango llileaa“. 20Nkwi ndango kwa dede akai? Nkwi mwaṛia wa fitabu akai? Nkwi valya veeshi ivinga fikweniń fa isanga li vakai? Naare? Iṛuva ariṅanisa uṛango lwa isanga li se? 21Amu kwa uṛango lo lwayo isanga li lindemanya Iniva na uṛango lwamwi lwa kiiṛuvewu lukee lwa dede ndi. Kwa ikyo Iṛuva andekunda ikiṛa valya vankusurie na mboni ikee ilolio̱ ni isanga sheeli yya uṛiṅani. 22Amu Vayuda vafurie myorusie na Vagiriki vaṛuyaa uṛango. 23Kake ise tikwanisaa Kristo sheeli akabio̱ kiriń, na mikwanisie ii Vayuda vakaila na Vagiriki vakaiaṛua ya utondo. 24Kake valya vandevaangwa kwakooya vVayuda ana kwakooya vVagiriki wwo tikee ivakwanisia Kristo sheeli mfinya ya Iṛuva, lingi ni uṛango lwa Iṛuva. 25Amu kilya kikee kya utondo kyuka kwa Iṛuva kyo kikee na uṛango lukilie lwa vandu. Na kilya kikee kya utanyari kyuka kwa Iṛuva kyo kikee na finya ikilie ya vandu. 26Kwa ikyo vanavama kumbueń kasa mundevaangwa ni Iṛuva. Kari kanu veefo veengi vawore uṛango lwa kivandu ndi, veefo veengi vawore finya ndi, veefo veengi vawore unini ndi. 27Kake valya vakee matondo a isanga li wwo Iṛuva andevasaua asute vaṛango. Lingi valya vakee varengesi va isanga li wwo Iṛuva awasaua asute valya vawore finya. 28Lingi valya vatawore nsendo kunu isangeń li na valya vakee iilwa ni isanga wwo Iṛuva awasaua, amu arete valya vakee ikulolia sheeli nkindo. 29Katana kuri, amu mbele yamwi nndu atakushombe-fo nta umwi. 30Kwamwi ye mfo mundeuka ini mukee va Kristo Yesu. Uu yye antitanio̱ ni Iṛuva ave mutiṛangusa na mutisumanisa na mutisongovisa na mutikiṛa. 31Kyasia kive sheeli kyatisiṛwa: ”Ulya akee ikuṅinisa akuṅinise, fulya akee wa Nndumi“.
Currently Selected:
Barua ya Vakorinto ya mbele 1: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
