Barua ya Vakorinto ya mbele 15
15
1Kyasia vanavama, namukumburusa mboni ya ifura ya Iṛuva nndemukwanisia, nayo yyo mundeiwaria na ikuvava nayo. 2Na ikiṛwa mukiṛwaa yyo, kwakooya mukuwore deń na mboni tilya nndemukwanisia. Ili kiikooyaa kitaare mundekusura kya ruu. 3Amu niń mbooko nndemumanyisa filya nndewaria nań, sheeli Kristo afwe kiimba kya mareko eru sheeli mitisiṛie ikee irera. 4Na sheeli andeṛikwa na nkonu wa kararu kaṛuka, sheeli kikee kitisiṛe. 5Na sheeli andekworusa Kefa na numa valya ikumi na vavili. 6Numa andekworusa vanavamae kilanya ya mayana araanu andu emwi. Na kari kawo veengi veefo na muu kumande alli kita kiindi kari kawo vamiimuruswa. 7Numa andekworusa Yakobo kakworusa na varumi woose. 8Na ifurumia lya vandu woose kashikworusa nań nkee sha nndu andeiriwa kwa kyeeri kitakee kyamwi. 9Amu niń nkee munnya wa varumi ntasumani ivaangwa nrumi, fulya niń natuṛua siṛi ya Iṛuva. 10Kake kwa ililia lya Iṛuva nava sheeli nkai, na ililia lyamwi likee kwakwa lindeva lya ruu ndi. Kake nndeengeṛia nnu iṛunda mashoṛa kilanya ya woose, ana nta niń ndi, kake ni ililia lya Iṛuva likee nań. 11Kyasia kwakooya nniń ana kwakooya vvalya mfo tikwanisaa, na mfo kuro mundekusura.
12Kyasia ise talosha sheeli Kristo anduka kwa vafu. Nki ili kiindi kyanu kikee inumbua liteefo iṛuka lya vafu? 13Kwakooya liteefo iṛuka lya vafu, na Kristo aṛuka ndi. 14Kwakooya atanika, mboni teru teelekaa ndi na ikusura lyanu nkindo ndi. 15Neese tilolioo sheeli tikee varambua va Iṛuva va wongo, fulya tarambua sheeli Iṛuva anduta Kristo kitaare ammuṛuta, kwakooya vafu kitaare vaṛukaa. 16Amu kwakooya vafu vataṛukaa, na Kristo nae aṛuka ndi. 17Kwakooya Kristo ataṛuka, ikusura lyanu liwore misendie ndi, neeni mukikee uretiń lwa mareko anu. 18Na valya vandefwa veekusuraa Kristo varekaa. 19Kwakooya tikusuraa Kristo muuń uu tiurie alli tubu, tikee vakiva kita vandu woose.
20Kake alli Kristo ammaa iṛuka kwa vafu kava wa mbele wa vafu anduka. 21Amu ili ufu lundenndwa ni nndu umwi, mfo na iṛuka lya vafu lindenndwa ni nndu umwi. 22Amu sheeli woose vakee ifwa, fulya vakee vana va Adamu ulya, mfo kuro da woose vavaa lingi na muu, fulya vawa va Kristo. 23Kake nndu woose na ikamba lyamwi, wa mbele nKristo, numa walya vakee va Kristo ili ashaa. 24Numa livaa ifurumia lya foose, ifi arambikiaa Iṛuva Nde umangi kammaa ireta ngyunini toose na finya toose na imakii lyoose. 25Amu ye kyawara akaa na witoṛo, ”kumande arwaa fituva famwi foose kwa si ya marende amwi“. 26Kituva kya ifurumia kiretwaa ni ufu. 27Amu ”arwaa findo foose kwa si ya marende amwi“. Kake ifi anumbuaa: Sheeli foose fikee kwa si yamwi, kisumani ito andefirwaa kwa si yamwi atasaandi-wo. 28Ifi kivaa findo foose fammaa irawa marendeń amwi, llyo na Mwana nae akurwaa kwa si ya marende a ulya andenrwaya findo foose kwa si ya marende amwi, amu Iṛuva ave muni foose kundo koose.
29Kwakooya kitaare nkuro, valya vakee ikubatisio̱ vafu vakuutiaa-wo ki? Kwakooya vafu vataṛutwaa kutu, nkiki vakubatisio̱o̱ń? 30A ise nki ifi tikee kitaniń kya muu weru kyeeri kyoose? 31Ee vanavama mukee nduma wakwa nkee nato kiimba kyanu kari ka Kristo Yesu Nndumi weru, nkee ifwa nkonu tiṛi. 32Kwakooya navingana na mafisi mavaave kinndu kulya Efeso, fisheelekiaań ki? Kwakooya vafu vataṛutwaa, kyasia ”tilye na inwa, amu ndesi tifwaa“. 33Manya mutalembike! Mirerie mikasha ikasheesaa windi unuru. 34Rundeń na uṛango sheeli kyawara ana manya mutatane fikasha. Fulya veefo kari kanu vateeshi Iṛuva. Nkee irera ifo mmumanyise sonu.
35Kake eeba eefo nndu ashiuṛaa: Vafu vaṛutwaa are naań? A wo vashaa varie mivili ingai? 36Iwe nriṅani! Kilya kuveekiaa kimiaa kitaare kyafwa mbele ndi. 37Na kilya kukee iveekia kukee iveekia yumba lia fivaa ndi, kake kukee iveekia mbeu da, kwakooya yya ngano ana mbeu tingi. 38Kake Iṛuva akee iiniinga yumba sheeli akundie kaniinga mbeu yoose yumba lyayo yeni.
39Nyama toose nnyama timwi ndi, kake tingi n ta vandu na tingi n ta numbe na tingi n ta ndee na tingi n ta makunga. 40Lingi iifo mivili ya kiiṛuvewu na mivili ya kiisangeń. Kake yumba lia lya kiiṛuvewu nkyaanya na yumba lia lya isangeń nkyaanya. 41Iifo langa imwi ya saa na langa ingi ya mwiri na ingi ya nyinyiri, amu kiifo kiilasha kya langa kari ka nyinyiri na nyinyiri. 42Mfo kuro kikai na iṛuka lya vafu. Kikee iveekio̱ kilya kibwaa na iṛutwa kiṛutwaa kilya kitabwaa. 43Kikee iveekio̱ kya usutu na iṛutwa kiṛutwaa kiwore tikisi. Kikee iveekio̱ na utanyari na iṛutwa kiṛutwaa kiwore finya. 44Ukee iveekio̱ vvili wa kivandu na iṛutwa uṛutwaa vvili wa kimumuyo. Kwakooya iifo mivili ya kivandu, na ya kimumuyo iifo. 45Amu nkuro kyatisiṛwa: ”Adamu nndu ulya wa mbele akooya nrima uwore muu“. Na Adamu ulya wa ifurumia kava wa mumuyo annde muu. 46Kake vvili wa kimumuyo to wwa mbele ndi, kake ulya wa kinndu nto wabooka. Numa ukasha ulya wa kimumuyo. 47Nndu wa mbele auka uteriń, nae ni uteri. Nndu ulya wa kavili aukie iṛuvewu. 48Sheeli ito wa uteri akai, mfo kuro na iwo va uteri vakai. Na sheeli ito wa iṛuvewu akai, mfo kuro na va iṛuvewu vakai. 49Na sheeli tankurika fwana ya ulya wa uteri, mfo kuro tikurikaa na fwana ya ito wa iṛuvewu.
50Vanavama, kilya nkee irera ni iki: sheeli kilya kikee na nyama na usao kimakii iwara diṅu ya umangi lwa Iṛuva ndi. Ana kilya kibwaa kimakii irwaa diṅu ya kilya kitabwaa ndi. 51Lleń te namuia ini kiṛisi: Tifwaa ti woose ndi, kake tiilashikaa ti woose 52kwa tiń sha isindiṛa da na ilolia kyeeri kya wembe lwa ifurumia. Amu wembe lwivilio̱o̱ na vafu vaṛutwaa vatakibwaa, neese tiilashikaa. 53Amu mivili ii yoore uboru yaṛukaa ilya itakibwaa, na uu wa ifwa waṛukaa ulya utakifwaa. 54Kake ili mivili ii iwore uboru yaṛukaa ii itabwaa na ii yoore ufu yaṛuke ii itakifwaa, Ilyo kirero kilya kitisiṛe kifikaa: ”Ufu lwammiṛwa lwawingwa. 55Iwe ufu, uvingi lwafo lukee kwi? Iwe kimiṛa, ukiva lwafo lukee kwi“. 56Fulya ukiva lwa ufu llo mareko, kake finya ya mareko mmavavaso. 57Kake Iṛuva aanwa, fulya antiniinga ivinga kwa finya ya Nndumi weru Yesu Kristo. 58Kiimba kya ikyo vanavama vakunde, mukuumise koṛoń, manya mutasingesinge! Tanień utomari iṛunda mashoṛa a Nndumi kundo koose, fulya mwammanya yatarika lyanu mukee yatarika kiimba kya Nndumi llya ruu ndi.
Currently Selected:
Barua ya Vakorinto ya mbele 15: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
