Barua ya Vakorinto ya mbele 12
12
1Kyasia vanavama, kiimba kya ngyuavi ta Mumuyo mfurie mulemwa imanya ndi. 2Mwishi sheeli mwikee vandu va vayavaṛumu na ilatia firasio fa findo fiteeshi irera. 3Kiimba kya ikyo namumanyisa sheeli eefo nta nndu areraa awarwa mMumuyo wa Iṛuva ndi anumbue: Yesu eerarwa. Ana nta eefo nndu amakii inumbua: Yesu ni Nndumi kitaare awarwa mMumuyo Nsongori ndi. 4Kiifo kiilasha kya ngyuavi ta Mumuyo, kake Mumuyo ni ulya muni da. 5Lingi kiifo kiilasha kya uṛundi, kake Nndumi ni umwi tubu. 6Kiifo kiilasha kya vaṛundi, kake Iṛuva ni ulya muni da aṛundaa mashoṛa kari ka woose. 7Kake nndu woose aavio̱ wavi lwamwi mMumuyo, amu aelekie vengi. 8Fulya nndu umwi akee iniingwa kirero kya uṛango mMumuyo, na ungi kirero kya waṛia, kake Mumuyo ni ulya muni da. 9Na ungi awore ikusura ifo Mumuyoń ulya muni da, na ungi mmwavie wavi lwa ikiṛa ifo Mumuyoń ulya muni da. 10Na ungi ni nniinge iṛunda fa maṛiikiso na ungi mmwauya na ungi mmwavanisa fa nrima na ungi ni nrera mirerie miini na ungi mmutambashua mirerie ilya. 11Kake ifi foose fikee iṛundwa mMumuyo ulya muni da eeaviaa nndu woose sheeli akundie ye muni.
12Amu sheeli vvili wa nndu ukee umwi, nato uwore meeṛo mengi na meeṛo woose a vvili to nawo mmeengi, kake vvili ni umwi, mfo kuro na Kristo akai. 13Amu ise ti woose tindebatisio̱ vvili umwi mMumuyo umwi, kwakooya tikee Vayuda ana kwakooya tikee Vagiriki ana kwakooya tikee masinga ana tikee vabo-ṛomue. Neese toose tindeavio̱ Mumyo uu umwi. 14Amu na vvili wa nndu yyeeṛo Umwi ndi, kake mmeengi. 15Kifo urende lwinumbuaa: fulya niń ntakee uko, niń nkee wa vvili ndi. Naare? Llwa vvili se kiimba kya ikyo? 16Na kuri kifo kwinumbuaa: Fulya niń ntakee iriso, nkee wa vvili ndi. Naare? Nkwa vvili se kiimba kya ikyo? 17Kifo vvili woose wivaa iriso, a iita lyukaa kwi? Kifo vvili woose wivaa kuri, a inuta lyukaa kwi? 18Kake Iṛuva anrwaa meeṛo woose limwi limwi ifovviliń sheeli andekunda. 19Kake kifo foose fiivaa yeeṛo limwi, a vvili ukaań kwi? 20Kake alli meeṛo mmeengi, kake vvili ni umwi. 21Nta iriso limakii iia uko ntawore kiteveto nawe ndi. Ana nrwe umakii iia marende ntawore kiteveto neeni ndi. 22Kake kya mmwasi meeṛo a vvili alya akee ikusaṛio̱ sheeli mmatanyari atinye mmwasi. 23Na meeṛo a vvili alya akee ikusaṛio̱ sheeli atawore tikisi meeṛo va tikee yaniinga tikisi kilanya. 24Amu meeṛo eru alya awore unuru awore mashoṛa ndi. Kake Iṛuva alunganisa vvili na iniinga kyeenga kilya kyaanguywa tikisi ikilie, 25amu utakaafo mwavanu kari ka vvili, kake meeṛo eelekani yeeṛo lyoose na lingi. 26Na yeeṛo limwi likavavio̱ meeṛo woose avavio̱ andu emwi nalyo. Na yeeṛo limwi likaṅiniswa meeṛo woose afura andu emwi nalyo.
27Kyasia ini mukee vvili wa Kristo na nndu woose wanu kava yeeṛo lya vvili uu lisumani na mashoṛa ayo. 28Veefo Iṛuva avarwaa ifo siṛiń: Va mbele warumi, va kavili waauya, va kararu vvalosha, lingi watana fa maṛiikiso, lingi waavie finya ta ikiṛa valole, lingi weeleki, lingi wairia mbele, lingi mmakanika a mirerie. 29A le woose warumi? Woose waauya? Woose vvalosha? Woose watana fa maṛiikiso? 30Woose vawore finya ta ikiṛa valole? Woose vareraa kwa mirerie? Woose waaṛua? 31Kyasia langeń kya mmwasi myavie ya miniingie ikilie iyo. Nań mmworusaa shia ingi shisha kita toose.
Currently Selected:
Barua ya Vakorinto ya mbele 12: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
