Barua ya Vakorinto ya mbele 11
11
1Kuvakaniseń nań sheeli nań nkee ikuvakanisa na Kristo. 2Kyasia nkee imwitikisa, fulya mushikumbue kya findo foose, neeni mukawara mavavaso akwa alya nndemuniingia. 3Kake mfurie mumanye sheeli nrwe wa nndumi woose ni Kristo, na nrwe wa nka ni nndumi, na nrwe wa Kristo ni Iṛuva. 4Nndumi woose ili eeterevaa ana eeongoyaa nae asikie nrwe wamwi, ansuta nrwe wamwi. 5Kake nka woose ili eeterevaa ana eeongoyaa kitaare asikie nrwe wamwi, ansuta nrwe wamwi, amu avakani na nka wa shia ulya muute nrwe. 6Amu nka kwakooya atasikiaa nrwe, usemwa mafuli deń. Ana kwakooya ni usutu nka isemwa mafuli amwi ana yutwa, asikie nrwe. 7Nndumi dede kyawara asikie nrwe ndi, amu akee fwana ya Iṛuva na ya tikisi yamwi. Kake nka ntikisi ya nndumi. 8Amu nndumi amilie kwa nka ndi, kake ni nka amilie kwa nndumi. 9Ana nta nndumi atanwa kiimba kya nka ndi, kake nka atanwa kiimba kya nndumi. 10Kwa ikyo kyawara nka ave na myorusie ya iitoṛio ni nndumi nrweń (kiimba kya vamalaika). 11Kake nka akee kindo kitaare eefo nndumi ndi, ana nndumi akee kindo kitaare eefo nka ndi, nkwa mifurie ya Nndumi. 12Amu sheeli nka auka kwa nndumi, mfo kuro na nndumi airiwa ni nka. Na findo fi foose mbooko yayo fuukie kwa Iṛuva. 13Kusaṛeń mu veni kwakooya kisumani nndu nka atereve Iṛuva atasikie nrwe? 14A uṛango lwanu lo weni lukee imulosha ndi sheeli nndumi kava na mafuli maasha ni usutu lwamwi? 15Kake nka kava na mafuli maasha ni utoṛe lwamwi. Amu anniingwa mafuli maasha, amu ave andu a masaṛa amwi. 16Kake kwakooya nndu afurie iira ngani, ise toore mikae sha iyo ndi ana nta siṛi ta Iṛuva ndi.
17Kyasia kilya nkee imuia alli ni ivavaso lyakwa, fulya fiifo findo kwanu fitashisenye. Amu makusandio anu amwendee mboṛa ndi, kake ukasha. 18Kya mbele naita sheeli ifo kwanu ili mukee ikwania siṛiń liifo ikuraua. Nań kwa kyeenga niirikie. 19Amu kyawara ikuraua live-fo kwanu, amu valya vakee va dede kwanu valolike na baa. 20Kyasia ili mukee ikwania andu emwi nkimwi na ilya shoonga ya Nndumi ya waaṛo ndi. 21Amu ili mwilyaa, nndu woose akee iimboo-wo miliyeń ilya shoonga yamwi yo sheni, na uu umwi awarwa nsoto na uu ungi anangywa. 22A le muwore numba tanu se ta iliya na inuiya? Ana mukee iila siṛi ya Iṛuva na isuta valya vatawore kindo? Namuia are? Namuitikisa? Kiimba ikyo mmuitikisaa ndi. 23Amu niń kilya nndemurambikia naniingio̱ ni Nndumi, nakyo nkyo iki: Kio kilya Nndumi Yesu aṛiingio̱ kaimboo nkate kaana Iṛuva kaufukyafukya kanumbua: 24Ngyeń leń, uu ni vvili wakwa urawaa ufuń kiimba kyanu. Neeni veń vandu valyaa, amu mushikumbue niń. 25Mfo kuro kaimboo na umbata lua ili vandemaa ilya eenumbuaa: Umbata lu ni mma shiya ivikwa na usao lwakwa. Taniń kuro kyeeri mukee inwa, amu mushikumbue niń. 26Amu kyeeri kyoose mukee ilya nkate uu na inwa umbata lu mukee ikwanisa ufu lwa Nndumi kumande ashaa. 27Kyasia ulya woose alyaa nkate uu ana inwa umbata lwa Nndumi kitaare ankusongosia, ito ankuṛuiya mwaandu kiimba kya vvili wa Nndumi na usao lwamwi. 28Kake nndu akusaṛaani mbele ye muni. Kammaa amakii ilya kya nkate uu na inwa kya umbata lu. 29Amu ulya akee ikuliya da na ikuniya da ankuṛuiya mwaandu ye muni, fulya ataindie vvili wa Nndumi kisumani. 30Kiimba kya ikyo kwanu veefo veengi vakee vatanyari na valole na vandu kinga valele. 31Kake kifo tiikusaṛanaa imanyiń lyeru ti veni, nta tiiumisio̱o̱ ndi. 32Kake ili taumisio̱, neekai taikimbwa ni Nndumi, amu titashe iretwa andu emwi na va isanga li. 33Kwa ikyo vanavama, ili mukusandiaa kiliyoń kyawara mukuvere. 34Kwakooya nndu awore nsoto aliye mbele kyeń kwamwi. Manya ikusandia lyanu litamuvie uumisio. Na ifo fisaiye ili nshaa nndefisongosiaa.
Currently Selected:
Barua ya Vakorinto ya mbele 11: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
