Barua ya Vakorinto ya mbele 10
10
1Vanavama, mfurie manya mutarekio̱ ndi sheeli vaande yeru veekee kwa si ya iṛumbe lia woose vakaira nruveń woose. 2Woose vakabatisio̱ Mose ifo iṛumbeń na ifo nruveń. 3Woose vakalya shoonga imwi iikee ya Mumuyo. 4Woose vakanwa minuiye imwi iikee ya Mumuyo, amu vandenuiya veeutaa mbambeń wa Mumuyo uriani nawo. Na mbamba ulya wikee Kristo. 5Kake veengi kari kawo Iṛuva andesenywa wwo ndi, amu vandemamisio̱ ṅṅaloń. 6Kyasia mboni to tave wikimbi kweru, amu ise titave vandu va ilanga fikasha sheeli valya nawo vandeva na milangie. 7Ana manya mutave varasia maṛuva a wongo sheeli vengi va iwo veekee. Amu kyatisiṛwa: ”Vandu vakaa rembo veelyaa na inwa, numa vakakwimboo vatavani“. 8Ana manya titave vaaisi sheeli valya vawo vandetana vakawalwa nkonu umwi vandu fiku makumi avili na firaru. 9Ana manya titeelelie Nndumi sheeli vengi vawo vandemwelelia vakaretwa nshoka. 10Ana manya mutaṅuṅure sheeli vengi vawo vandeṅuṅura vakaretwa nNreta. 11Kyasia ifi foose findevavia kwa myorusie fikatisiṛwa, amu fitiikimbe ise teemfikio̱o̱ ni mmando wa feeri. 12Kwa ikyo ulya akusaṛie aselele akulle atawe. 13Nta mwankooya kyelelio kikilie finya tanu ndi kita kilya kikee kya mwina wa kinndu. Kake Iṛuva wwa usuro amutiaa mukooye kyelelio kikilie finya tanu ndi. Kake andu emwi na kyelelio kilya mwelelio̱o̱ aorusaa na mwaango wa isomuka, amu mumakii isisiria.
14Kiimba kya ikyo, vakunde vakwa, risheń windi lwa iindia maṛuva a wongo. 15Narera neeni fulya mukee vandu muwore uṛango. Kusaṛień kilya nkee irera. 16Umbata lua lwa mboṛa tiluniingaa mboṛa ni itaṅaṛia se usao lwa Kristo? Nkate ulya tikee yufukyafukya ni itaṅaṛia se vvili wa Kristo? 17Fulya nkate ukee umwi, neese tikee veengi tikee vvili umwi, amu ise ti woose tikee yavio̱ nkate ulya umwi. 18Lleń Vaisiraeli wo kasa vakai. Valya vakee ilya nyama tilya ta kirasio vawore se ilungana na kiraa kya kirasio? 19A narerań are? Narera sheeli kiraso kya irasia maṛuva a wongo nkindo? Ana narera sheeli Iṛuva lya wongo nkindo? 20Nkuro ndi. Kake filya vayavaṛumu vakee irasa vakee ifirasia masatana, nta Iṛuva ndi. Kake niń mfurie mukulunganise na masatana ndi. 21Nta mumakii inuiyana umbata lwa Nndumi na lwa masatana ndi. Nta mumakii ilyana kiraań kya Nndumi na kya masatana ndi. 22Ana mufurie ikangia Nndumi atuṛuke? A ise toore finya kita ye?
23Mwanumbua: ”Findo foose fikee fisha toore muumu wa ikuṛu-ndia nafo“. Ee, kake mfindo foose feelekaa ndi. Mwanumbua: ”Findo foose fikee fisha toore muumu wa ikuṛundia nafo“. Ee, kake mfoose fisongosiaa ndi. 24Manya nndu atakuṛuiye mbusha yamwi muni, kyawara aṛuye filya fikee yeleka uroe wamwi. 25Findo foose fikee ikumbwa singiṛeń fikee fa nyama kuliyeń kitaare mwauṛa kulya fuukie, amu mirima yanu italemwa. 26Amu: ”Isanga li llya Nndumi na foose fiifo“. 27Nndu ulya atakusurie Iṛuva kamuvaanga kwamwi neeni mukankunda yenda, kuliyeń kindo kyoose vamurwaya liteefo yuṛa nkwi fuukie, amu mirima yanu italemwa. 28Kake nndu kamuia: ”Ii nnyama ya kirasio“, manya mutale kiimba kya ito amumanyisa na kiimba kya mirima. 29Nrima nkee yusenda wwafo iwe ndi, kake wwa ulya ungi. Nkiimba ki iboṛomulwa lyakwa lyumisio̱ ni nrima wa nndu ungi? 30Kwakooya niń nkee ilya filya namaavio̱, nkee iteendwań are kiimba kya filya nawaria niaanaa Iṛuva? 31Kyasia ili mwilyaa ana mwinwaa ana mwitanaa kindo kyoose, taniń foose five fa iṅinisa Iṛuva. 32Kulleń amu mutatevete Vayuda ana Vagiriki ana va siṛi ya Iṛuva, 33mfo kuro sheeli niń nkee isenya vandu woose findoń foose, nta ikunda mbusha yakwa shi muni, kake mbusha ya iwo vakee veengi vakooye ikiṛwa.
Currently Selected:
Barua ya Vakorinto ya mbele 10: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
