Imbombo zya Vapositili 10
10
UPeteli nuKolineli
1Mu-Kesaleya mwʼalʼumuntu wʼizina lyakwe ali uKolineli, umupiti wa vasikali va mpuga ye vatili ya vItali. 2Wʼali mugolosu, ahanyilʼuMulungu poka navamunyumba yakwe vonti, ahavapangʼavantu iṿwa shikuku, ahaputa kwa Mulungu shima. 3Pahavalilizyo ha vusano navune umusanya, pʼahalolʼishitushizya apazelu, uhavizya wa Mulungu ahinjila mwʼali, ahamuvuzya ahati: We Kolineli! 4Uwenʼahamutontomela, shihamugwilʼishitetemwi, ahati: Shonu Mwene? Uwene nyene ahamuvuzya ahati: Imputo zyaho niṿwa shikuku ṿwe wavapangʼavantu ṿizuṿile kumwanya, ṿiyipezile ukuva ṿwa kukumbushilʼuMulungu. 5Ishi lelo tumagʼavantu mu-Yope, vamwitʼuSimoni we vakumutaha nilya Peteli. 6Uwene akudila kwa Simoni umunyuhamakwembe, wʼinyumba yakwe ili kushipuma sha sumbi. 7Ilelo lwʼavazilʼuhavizya uno wʼayanzile nawo, pʼahavitʼavanyamata vakwe vavili numusikali woka wʼahamunyilagʼuMulungu, ahavaseva muli vuvo ve vahamuvombelaga. 8Vʼahavavuzya zyonti, pʼahavatuma mu-Yope.
9Shandavi lelo lwʼavantu vanava vali mwidala, lwe vapalamila munkaya, pʼuPeteli ahazuva panyumba pamwanya ukuputa pahavalilizyo ha mutanda. 10Pʼihamulumʼinzala, ahanzʼukulya. Ilelo lwe vakumuteleshela, pʼahinjililwa. 11Ahaga kumwanya kwigusile nahantu hakwiha he haholine numutotʼumupiti we valemile amakope ge gane ukwisya pansi, 12gali mumwo amahanu gonti, aga munsi, naga ṿinama ṿine nage gakwaṿula pansi namayunyi ga kumwanya. 13Pʼizwʼipiti lihamwinzila, lihati: Vuhaga Peteli, uvolaje ulyanje. 14UwenʼuPeteli ahati: Wandeva Mwene, she ntaliye nalumʼine nage mwiho namahandamanu. 15Pe lihavuyizyʼizwi kukwakwe lye likuti: GengʼuMulungu agazelufizye ge ndali ukuti mwiho iwe. 16Zinizi lelo zihavuyizyʼukuloleha hatatu, pe hahazuva kumwanya luvilo luvilo ahantu hala.
17Ilelo lwʼuPeteli akwalangana kushitushizya shʼashiwenyi ukuti amwe she shintu vuli, pʼahaga avantu vʼavatumilʼuKolineli vavuzilizizyʼinyumba ya Simoni, vimiliye kushilyango. 18Vahavilishilʼilya kusimishizya ukuti pamo u Simoni we vakumutaha nilya Peteli ahadilaga mumwo. 19UwenʼuPeteli lwʼashili ukusivʼishitushizya shakwe, pʼuMupepo ahamuvuzya ahati: Yenya, avantu vatatu vakukwanza. 20Ukwo lelo vuhaga, uyishʼuvale navo utaganegane she mbatumile nene. 21PʼuPeteli ahiha ahavala kuvantu vala, ahavavuzya ahati: Yenyi, nene ne we mukumwanza. Mwinziye nongwa vuli? 22Avene nyene vahati: UKolineli umupiti wa vasikali, umuntʼumugolosu umunyilaMulungu, we vakumuyangʼuvwinza vontʼavankolo zya vaYuda, wʼuhavizya amwitushizizye ukuti akwitʼiwe, uvale munyumba yakwe ukuti atejelezyaje inongwa kukwaho. 23PʼuPeteli ahavaposhela nukuvatetela.
Ilelo shandavi pʼahavuha ukuvala navo, vope navamwavo vamo avamu-Yope vahajenda nawo. 24Ilelo shandavi pe vahafiha mu-Kesaleya. UwenʼuKolineli aminso gali kwidala. Avavunganisile navajenzi vakwe navamanyani. 25Ilelo lwʼuPeteli akwinjila, pʼuKolineli ahamuposhela nukumugwila kuṿinama, ahaputa kuli wuyo. 26UwenʼuPeteli ahamuvusya ahati: Vuhaga, she nane ne muntu vwelele. 27Pʼahayangana nawo, ahinjila, ahaga vavungine mumwʼavinji. 28Pʼahavavuzya ahati: Namwe mumanyile ukuti umuntʼumu Yuda mwiho ukusangana navaluhʼulunji nukuvatandalila, nkandʼuMulungu andanzile ukuti ntamuvuzyaje numʼumuntu ukuti mupopo na muhandamanu, 29zye zizyo ninzile shisitakuhana lwe munisite. Ishi nkuvuzilizya nkuti: Amwe munitiye nongwa vuli? 30PʼuKolineli ahayanga ahati: Ishi gapitilila amanda gane, muhavalilizyo inza shʼiha aha vusano navune nkaputaga munyumba yane, pe nkaganduha umuntu ayimiliye kuminso gane wʼali namenda ge gakulangalila, 31ahayanga ahati: We Kolineli, uluputo lwaho ayiṿuyʼuMulungu niṿwa shikuku ṿwʼukuvapʼavantu akumbusile. 32Tumagʼavantu mu-Yope lelo, vamwitʼuSimoni we vakumutaha nilya Peteli. Akudila munyumba ya Simoni umunyuhamakwembe kushipuma sha sumbi. 33Pe nkatumʼavantu kukwaho. Ilelʼiwe shʼuyinzile hinza. Ishi lelo swenti tuvungine kuminso ga Mulungu ukuti twiṿwe zyonti zyʼuMwene akulajizizye.
Imbila ya Peteli
34PʼuPeteli ahavusyʼilomu, ahayanga ahati: Ishi pe namanyinsanya nalyoli ukuti uMulungu atakusevʼumuntu kuvwinza vwa kuminso ndali, 35nkandi munkolo zyonti umuntu wengʼakumunyila wuyo nukuvombʼizya vugolosu, wʼakumushelʼuwene. 36Izwʼili lyʼavatumiyʼavana-Yisilayili lwʼahakumusyagʼintumʼinyinza ya vwihalo vwe vuli mwa Chilisiti Yesu (uwene we wʼuMwene wa vonti), 37muzimanyile inongwa zye zikwiliye mwonti mu-Yudayi, ukufuma mu-Galilayi lwʼuYohani ahazikumusyaga izya lwozyo, 38izya Yesu wa mu-Nazaleti, inza shʼuMulungu ahamupaha nuMupepʼuMufinjile namaha, wʼahazyungula nukuvombʼinyinza nukuvazuzuvushizya vonti vʼuSetano avamenile, shʼuMulungu ali nawo. 39Naswe swe vahome va zyonti zyʼahavombaga munsi ya vaYuda namu-Yelusalemu, we vahamugoga she vamuhomeleye pikwi. 40We wuyo uMulungu ahamuzyusya pisiku lya vutatu, ahamupa ukuti ayilolesyajʼapazelu, 41te kuvantu vonti ndali, nkandi kuvahome vʼuMulungu avasavuye nzila, swe sweswe swe tuhalya nukungʼwela poka nawo lwʼazyuha kuvafwe. 42Ahatulajizyʼiswe ukukumusya kuvantu nukuhomeshezya ukuti we wuyo uMulungu amwimisile ukuva Mulonzi wa valanzi navafwe. 43We wuyo vakumuhomeshezya vontʼavakuvwi ukuti vonti venga vakumwitiha vakuvwaga uvuswila vwa malandu mwizina lyakwe.
Avakunzi vakuposhelʼuMupepʼuMufinjile nulwozyo
44Ilelo lwʼashilʼuPeteli, lwʼamakuyangʼamazwi ganaga, pʼuMupepʼuMufinjile ahavishila vonti ve vahiṿwagʼinongwa zinizi. 45Pʼavitisi va vuvolwa ve vinjiye nuPeteli vahasukumila lwe vakwenyʼishikunjilwa sha MupepʼuMufinjile ukuvitilizya navakunzi. 46She viṿuye lwe vakuyanga mumili nukumutundumihʼuMulungu. 47PʼuPeteli ahamula ahati: Unanu wʼangadindilʼaminzi ukuti vatozelwaje vanava, ve vaholine naswe ukuposhelʼuMupepʼuMufinjile? 48Pʼahalajizyʼukuti vozelwaje mwizina lya Yesu Chilisiti. Pe vahamulambilizyʼukudila navo nga manda gavili pamo gatatu.
Currently Selected:
Imbombo zya Vapositili 10: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
