Imbombo zya Vapositili 11
11
UPeteli akusimishizyʼimbombo zyakwe
1Pe vope navapositili navamwavo ve vali mu-Yudayi, vahiṿwa ukuti vope navakunzi vaposheleyʼinongwa zya Mulungu. 2Ilelo lwʼazuṿilʼuPeteli ukuvala mu-Yelusalemu, pe vahamulonga avitisi va vuvolwa, 3vahati: Iwʼuyinjiye munyumba ya vasitakuvolwa nukulya navo. 4PʼuwenʼuPeteli ahandʼukuvasimishizya mwe zyalandatine, ahati: 5Ine nali munkaya mu-Yope, ilelo lwe nkuputa pe nkinjililwa nkalolʼishitushizya; ahantu hakwiha pansi hali fwe mwendʼumupiti umutote we valemile amakope ge gane, vakwisya ukufuma kumwanya, hahaninzila. 6Pe nkinanjizya mumwo ukuti ngamanye, pe nkaga ge gakujendela niṿinama ṿine aga pansʼipa namakoko nage gakwaṿula namayunyi ga kumwanya. 7Pe nkiṿwʼizwʼipiti, likuti: Vuhaga Peteli, uvolaje ulyanje. 8Pʼine nkati: Wandeva Mwene, she nashe shilʼumwiho nishihandamanu ntashimanyile nalumo mwilomu lyane. 9Pe lihavuyizyʼizwi lya kumwanya, lihambuzya lihati: Ywenga aṿizelufizyʼuMulungu ṿwe ndali ukuti mwihʼiwe. 10Zinizi lelo zihaloleha hatatu, pe ṿwonti ṿihakweselwa kumwanya havili. 11Pe nkaganduha panapo avantu vatatu vimiliye panyumba mwe twali, vafumile mu-Kesaleya vatumilwe kukwane. 12PʼuMupepo ahambuzya ahati: Valaga navo utahaganegane napamo. Navamwitu umutanda vanava vahavala poka nane, tuhinjila munyumba ya muntʼula. 13Ahatuvuzya inza shʼamuwenyʼuhavizya wʼayimiliye munyumba yakwe, wʼahati: Tumagʼavantu mu-Yope, vamwitʼuSimoni we vakumutaha nilya Peteli, 14wʼakwʼakuvuzyʼinongwa izya kukupoha iwe navanyumba yaho yonti. 15Ilelo lwe nkwanda ukuvavuzyʼine, pʼuMupepʼuMufinjile ahavishila, inza shʼatwishiye naswe pavwando. 16Pʼine nkakumbuhʼizwi lyʼayanzilʼuMwene lyʼatili: UwenʼuYohani ahozyaga nage minzi, imwe nyene muliyozelwa nuMupepʼuMufinjile. 17Apene lelo ingʼuMulungu avakunjiye ishikunjilwa shʼatukunjiye naswe swe twamwitisilʼuMwene uYesu Chilisiti, pʼine ne muntu vuli uwa kuti ingamulesyʼuMulungu? 18Ilelo lwe viṿuye zinizi pe vahapuma, vahamutimʼuMulungu vahati: Jezile navakunzi uMulungu avapiyʼulupinduho lwa kuvulanzi.
Ishivanza sha vakunzi mu-Antiyokiya
19Avene lelo vala ve vwavasavalizizyʼuvuhamantanilwa vula vwe vwatupusile paSitefani, vahapanguzya ukufiha mu-Foyinike namu-Sipelesi namw-Antiyokiya, vahasita nukumuvuzya numʼuwunji inongwa nkandi ve vaYuda veka. 20Mumpuga yavo mwe vali navamu-Sipelesi navamu-Kileni, ve vahafiha mw-Antiyokiya, vahayangana navaHelenisiti nukuvakumusizya intumʼinyinza ya Yesu uMwene. 21Wope numuhono wa Mwene ahavatula. Pe vahitihʼavinji nukuvwela kwa Mwene. 22Inongwʼizi zihakumuha, zihafiha namumakutwi ga vashivanza sha mu-Yelusalemu. Pe vahamutumʼuBalinaba ukuvala mw-Antiyokiya. 23Uwene lwʼafiha nukulolʼuvwila vwa Mwene ahaseshela, ahavajimṿwʼamaha aga kusimpa mulukasamo lwa mumoyo nukusyelemetela mwa Mwene, 24shʼali muntʼumusilimusu, ayizuye nuMupepʼuMufinjile nulwitiho. Pe vahonjezyʼukumwitihʼuMwene avantʼimpugʼimpiti. 25Pʼahasogola mu-Talisi ukumulondolʼuSavuli. 26Ilelo lwʼamwazile pʼahavala nawo mw-Antiyokiya. Vahadila umwaha wonti mushivanza, vahavasambilizyʼavantʼimpugʼimpiti. Mw-Antiyokiya umu mwʼavasundikwa vatalisile ukutashilwa ukuva vachilisiti.
UBalinaba nuSavuli nimbombo yavo mu-Yelusalemu
27Mumwahʼuno pʼavakuvwi vamo vahafuma mu-Yelusalemu vahiha ukuvala mw-Antiyokiya. 28Pʼahavuha wokʼuwamwavo wʼali wʼuAgabu izina, ahavavuzya nzila muMupepo ukuti iligwʼinzalʼimpiti munsi yonti. Yʼihagwa mumanda ga Kilavudi. 29Pʼavasundikwa vahalingʼishuma shavo mwe shivaliye unʼishakwe unʼishakwe, vahasangulizanya yimo iṿwa kuvatula avamwavo va mu-Yudayi. 30Vwe valihonzya vovulo, vaha-ṿiviha munyove zya Balinaba nuSavuli ukuti vahaṿitwale kuvasongo.
Currently Selected:
Imbombo zya Vapositili 11: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
