Imbombo zya Vapositili 9
9
Ukupinduha kwa Savuli
1-22: Imbombo zya Vapositili 22,3-16. 26,9-18.
1UwenʼuSavuli lwe suti ashili afundigine kuzya kuvatilinga nukuvagoga avasundikwa va Mwene, ahavala kuwashiputʼumupiti, 2ahamulavʼavakalata ava kuvalila kumasinagogi ga mu-Damasika, ukuti ingʼakuvaga vamo avʼIdala ili avanaṿuli navantanda, avakungaje nukuvatwala ku-Yelusalemu. 3Ilelo lwʼakujenda, lwʼamakupalamila mu-Damasika, pʼahitushilʼuluhozyo lwafuma kumwanya luhamumesezyʼapashezi. 4Pʼuwene ahagwa pansi, ahiṿwʼizwi likuyanga nawo likuti: we Savuli, we Savuli, ukunjimṿwa shonu? 5Pʼuwenʼahati: We nanu Mwene? Uwene ahati: Nene ne Yesu, nʼukunjimṿwa. 6Vuhaga yinjilaga munkaya mwe vakwe vakuvuzye zyʼuhondeyʼukuvomba. 7Avene nyenʼavamwavo ve vahajendaga nawo, ve vahinjila pupo nukuyengwa. Nashenga viṿuyʼizwi, vahapotwʼukumulola numʼumuntu. 8PʼuSavuli ahavuha pansi pʼaguye. Lwʼaminso gakwe giguha, pʼahapotwʼukwenya. Pʼavamwavo vahamulemʼumuhono, vahamutetesya ukuvala nawo mu-Damasika. 9Pʼahadilʼamanda gatatu shisitakwenya, atahalyanga nga kungʼwela.
USavuli mu-Damasika
10Ilelo mu-Damasika mwʼali wokʼumusundikwa, wʼali uAnaniya izina. WʼuMwene ahayanga nawo munjozi ahati: We Ananiya! Uwenʼahitiha ahati: Ta, Mwene, 11PʼuMwene ahamuvuzya ahati: Vuhaga uvale mwigulumo lila lye vakuti lye Ligolosu, munyumba ya Yuda mwʼuhamulondolʼuSavuli we vakuti wa mu-Talisi. Yenya, shʼakuputa. 12Uwenʼamu-wenyʼumuntu we vakuti wʼuAnaniya izina ayazilʼakwinjila mwʼali, akumuviha ninyove ukuti ayenyaje havili. 13UwenʼuAnaniya ahamula ahati: Mwene vambuzizyʼavinji izya muntu wununo, zyʼavafinjile vahʼavamu-Yelusalemu avizizizyʼapinji. 14Mwope namunumu avashiputʼavapiti vamupiyʼamaha aga kuvakunga vonti ve vakutahʼizina lyaho pashiputo. 15UwenʼuMwene nyene ahamuvuzya ahati: Valaga we, shʼumuntu wununo nsonta yanʼinsavulwa iya kuvatwalila mumwʼizina lyane navakunzi navamwene navana-Yisilayili. 16She ndimulanganizya nene gontʼamayimba gugo ge lilimupelelʼukuyimbʼizina lyane. 17PʼuAnaniya ahavala ahinjila munyumba, ahamuvihʼinyove ahati: We Savuli, we wamwitu, uMwene antumile, uYesu ula wʼakwitushizizye mwidala mwe wajenzite lwʼukwinza ipa, atili uyenyaje havili uyizulaje nuMupepʼuMufinjile. 18Pe luvilo luvilo tuhapapatuha muminso ngati tupapazula, pʼahenya nohavili ahavuha ahozelwa. 19Ahalyʼiṿintu ahagoma. Pʼahadila mu-Damasika poka navasundikwa amanda mansi, 20luvilo luvilo ahamukumusya Yesu mumasinagogi ukuti, we Mwana wa Mulungu. 21Vonti ve vahiṿwaga zinizi vahasukumila ukupitilizya, vahati: Amwe uno ate wuyo wʼavaṿwala-nganyaga mu-Yelusalemu ve vaputilaga mwizina ili? Nipa ayinzile ukuti avakungaje nukuvadendemulila kuvashiputʼavapiti? 22UwenʼuSavuli ahonjezyʼukusimpa, ahavatetemwʼavaYuda ve vasamiye mu-Damasika, lwʼakusimishizyʼukuti wʼuChilisiti.
23Ilelo lwe padila pʼavaYuda vahitinkana izya kumugoga. 24Izyene nyene zye vitinkine zihamanyiha kwa Savuli. Vahamwuvililaga napaṿikwilo shamusanya nuvusiku ukuti vamugoje. 25Pavasundikwa vakwe vahamusenda shavusiku, vahamutusya pilinga, vahamwisya mushitundu.
USavuli mu-Yelusalemu na mu-Talisi
26Ilelo lwʼafiha mu-Yelusalemu pʼahati nsangane navasundikwa. Nkandʼavene vahamwogopa, zihasitʼukuvahola ukuti musundikwa wope. 27UwenʼuBalinaba nyene wʼahamutwala kuvapositili, ahavavuzya naṿwʼuSavuli amuwenyi mwidalʼuMwene naṿwʼayanzile nawo, havili zyʼayanzile apazelu inongwa mwizina lya Yesu mu-Damasika shisitakunyila nahamo. 28Pʼahavanga poka navo lwʼakujendanga mu-Yelusalemu. Ahaziyangʼinongwa mwizina lya Mwene shisitakunyila. 29Ahayanga nukudalinkana navaHelenisiti. Avene nyene vahanzagʼukumugoga. 30Avenʼavamwavo lwe viṿuye zinizi pe vahamutwala mu-Kesaleya nukumutuma mu-Talisi. 31Ilelo pashivanza mwonti mu-Yudayi namu-Galilayi namu-Samaliya shihasankana, shihayizenga, shihajendela mulunyilo lwa Mwene, shihaṿula shʼuMupepʼuMufinjile ahashi-tulaga.
UPeteli akumupozyʼuwa ṿwambi mu-Lida
32Ilelo lwʼuPeteli akuzyungula kuvonti, pʼahafiha nakuvafinjile ve vazenzile mu-Lida. 33Mwʼahamwagʼumuntu we vahatinji wʼuYeneya izina, wʼadiliye mumazagala amaha umunana shʼalemayʼiṿwambi. 34PʼuPeteli ahayanga nawo ahati: Yeneya, uYesu Chilisiti akuzuzuvushizya. Vuhaga uyitenjele weka. Pʼuwenʼahavuha pe pala. 35Vahamwenya vonti ve vasamiye mu-Lida namu-Saloni, vahamupindushilʼuMwene.
UDokasi
36Ilelo mu-Yope mwʼali wokʼumusundikwa umwantanda wʼizina lyakwe ali uTabita lye likuti umbavala wʼali nimbombʼinyinzʼinyinji, niṿwa shikuku ahavapangʼavantʼiṿwinji. 37Uwene mumanda gugo ahavina, ahafwa. Pe vahamwozya, vahamuviha munyumba ya kwigulu. 38She pe papipi ukufuma mu-Lida ukuvala mu-Yope, mwe mumwo avasundikwa lwe viṿuyʼukuti UPeteli ali mumwo, pe vahavatumʼavantu vavili kukwakwe. Ve vahamulambilizya vahati: Utahavaje uyinze kumwitu. 39PʼuPeteli ahavuha ahavala navo. Ilelo lwʼafisile pe vahazuva nawo kunyumba ya kwigulu. Pe vontʼavazishe vahamulandata, vahakutʼamansozi, vahamusontela ninkanzu namenda gʼamamilʼuMbavala lwe suti ali navo. 40PʼuPeteli ahavafumwa kunzi vonti, ahasugamila pansi, ahaputa, pʼahagalunkana ukulyenyʼiṿimba, ahati: Tabita vuha! Pʼuwenʼahadamulʼaminso, lwʼamuwenyʼuPeteli pʼahatendama. 41Pʼuwene ahamulemʼumuhono, ahamuvusya. Pʼahavita navafinjile navazishe ahamuviha kuminso gavo she mulanzi. 42Zye zyakumuha mwonti mu-Yope, pe vahamwitiha avinji uMwene. 43Pʼahadilʼamanda gamo mu-Yope nuSimoni wumo umunyuhamakwembe.
Currently Selected:
Imbombo zya Vapositili 9: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
