TITO 1
1
1Yeny Paulo, shikee ishinga lya Iruva, na nrumi wa Yesu Kristo, kimaruma kya kyikusiryo kya vasauwe va Iruva, na wiidimi lweemanya dede ilya ishendee muu nsha. 2Na ivika nsia kya muu wa llung'anu, yeto Iruva yeu nalashambaa wongo aleluvikya nsia uka elyo mbee. 3Kavasukuya irero lyakwe elyi kyeeri kyakwe kyileinana kya nrumi ilya shilerambikywa kwi ivavasyo lya Nkira weeru we Iruva. 4Yewe Tito, mwana-kwa kunu iirikyony elyi lukee ilyivambisa. Isarya lyikae neewe na urilalyi luukye kwa Iruva Nde na kwa Kristo Yesu Mwiikira weeru.
5Nkyo kimaruma shilekura Krete, naambo kutumbani filya fyeanguye, neevika vamiku va siri wo muri shaasa llya shilekuvavasya; 6kwakooya nndu nalatiri kiteve nawe ni nndu wa nka umwi, na vana vakwe vatiri iirikyo, nta valarerwaa kya ukasha nta valakee valyang'a. 7Mashika mmbo kisumani askofu nave nndu nalatiri kiteve, mashika mmbo akee nngari wa Iruva; nta nalave nndu akukundye we muni-fo, nalave mwaangu irosa unyafi-fo ao mwinangwa mmbwari na mwikunda myaandu-fo, nta nalave mwikuwonisya kindo kilasumani-fo. 8Lyo nave nndu alangye yaambya vandu, alangye mesha, wa mwiiyanu, wa usumanu, mweele, ashiidimaa isira ngata yakwe muni. 9Mwikallya irero elyo lya kyikusiryo shaasa llya aleloshwa, indo llyo ashiidimaa ilosha vandu evaikimbaa na ufundo elo lwa muu naveidima ivinga yewo vesalala ao vekukyikyisaa nawe.
10Mashika veefo veengyi valakeekiita kindo vavioo, vatiri marero alatiri urango, valembaa vengyi, mmwasi ni yewo veerinwa, na yewo lyo nkuti vafindikirwa kana. 11Yewo mmbo vakee ireta vandu va mmba shoose, vevaloshaa findo filavasumannyi kimaruma kya ikuwonisya findo fya sony. 12Kwiifo nndu umwi wa kwawo ekee nkisuku karera indi kyawo, “Vakrete ni vandu va wongo kyeeri kyoose, mmbo vavakye mafisi maravi, veetalauwa ndeu vakaveva varoko.” 13Ukureekyi yelo ni lwa dede. Kikeeny indo vakyeemyi na finya, naambo vakooye itumaa iirikyony; 14valashearanya ng'anu-ng'anu ta Kiyuda, nta ilatya mavavasyo a vandu vareeye filya fikee fya dede. 15Findo fyoose mmbo fikee fyeeremutu kwa yewo va usumanu; lyo nkwiifo kyikee kyeeremutu kwa yewo vakyirinda, na kwa yewo valairikye-fo, mashika makusaro awo mmbo akee matefusu na mirima yawo kiwo. 16Vakaamba mmbo vaishi Iruva, lyo na ngaa tawo mmbo vakee inkana; mmbo vatanaa fya yeende unyafi, vakava filemi, valavaa nta kwa kindo kisha.
Currently Selected:
TITO 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
