2 TIMOTEO 4
4
1Mmbo sheengera ikuvavasa-se na irina lya Iruva, na lya Kristo Yesu yeto asheutyaa vakee na muu na vafu uvingo, elyi ashelolywa paa we na umangyi lwakwe; 2vambisa irero lya Iruva, kyeeri kyisenyi na kyeeri kyilasennyi, sakira na ikyeemya, na iikimba kwikee na usisiryo loose kwiloshaa. 3Mashika kwiikaa kushe fyeeri vashelemaa kiloshyo ekyo kirye muu, lyo kimaruma kyeesora makusaro awo veni mmbo vashekuwonisyaa veelosha nkuka maronda na maronda, ni elyi vatiri maarwi enunnwa. 4Nawo mmbo vashekwiisaa naambo valeete efyo fikee fya dede, vendukye ngyuraawe ta wongo. 5Kyaindi yewe, va na mwiiyanu findony fyafo fyoose, sisirya makasha, runda ishora lya mwiivambisa Nrumi ya Nsia, kwiinutye urundi lwafo. 6Mashika yeny ulaalu nkimwi sheelyi nkeepusuwa sha mura, nkyo kyeeri kya ifwa lyakwa mmbo kyamfika. 7Mmbo shikapanaa fira shisha shyaawutye kyaaro kyakwa, shiringe iirikyo. 8Mafurumyony a vayo mmbo shikee n-deesye ureto lwa usumanu, elo Nndumi yeu mwirummbwa usumanu asheshiniingaa nkonu yeto, nta nshi yeny shimuni-fo, ni ando amwi na vandu woose yewo valelanga ilollya ifumirwa lyakwe.
9Kutakure isha kwakwa uviny. 10Mashika Dema mmbo alelakana neeny, kalanga ulana elu, kakwiipoo keenda Tesalonike, na Kreske mmbo aleenda Galatia; na Tito Dalmatia, 11ni Luka muni akee yaa ando amwi neeny. Ipoo Marko kushe nawe, mashika ashisennyi nnu urundiny lwakwe. 12Kyaindi we Tikiko mmbo shilenruma Efeso. 13Osho na ikoti llya shilelyira kwa Karpo efo Troa, ando amwi na fitabu filya, mmwasi filya fya shony. 14Mfuru ulya wa minya ya arera we Iskanda mmbo aleshitannya findo firavi nnu; nawe Nndumi mmbo ashentaa kiinani na mitannyi yakwe. 15Neewe kwiise nawe, mashika mmbo alemina nnu ufundo lweru. 16Kindo kya mbee shilelollya, nkwiifo nndu alesalala taari yakwa-fo. Woose mmbo valeshira. Neeny mmbo shatereva Iruva nalasheevautya uvingo kimaruma kya vayo. 17Lyo Nndumi mmbo aleshisalallya kashiniinga finya, naambo, kyeendwa ni urundi lwakwa naambo nrumi yeyo yaambawa kisumani, naambo vandu va masanga moose veete; neeny lyo shaauwa efo kaniny kya miiso. 18Nawe Nndumi mmbo asheshaauwaa efo nrengeny toose, neeshiringa kutani shafikya umangyi lwakwe lwa iruvee-u. Nnduma mmbwakwe we fika llun'anu na llung'anu. Amen.
19Shiidikirya Priska na Akila, na valya va kyeny kwa Onesiforo. 20Erasto mmbo alekaa Korinto. Trofimu mmbo shilenra Mileto elwee. 21Kutakure isha kulaore kyeeri kya mbeo kyansha. Eubulo akwiidikira, na Pude na Lino, na Klaudio na vakristo woose da.
22Naasa Nndumi nakae na nrima wafo. Isarya lyimukae.
Currently Selected:
2 TIMOTEO 4: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
