KYIIMBO KYA FIIMBO 8
8
1A nkyema kweva mwana-maye wakwa,
Loonngye ivee lyimwi!
Mashika naakwa shikwaanye na yewe yefo kipoo,
Mmbo shekumimindaa-nsi,
lyo nkweekafo nndu ashiila-fo.
2Mmbo sheekurwaa kyeny kwa-ma ashiwona,
Naambo kushiloshe ikunda,
Nshekuritaa mfinyu nsongosye nisha naambo kuni,
Mfinyu wakwa wa ndunda takwa shimamiri.
3Woko lwafo umuso mmbo lukee sumbai ya nrwe wakwa,
Na woko lwafo usha lushishukure.
4Mmbo shamutereva woi na woi yeni vaka va Yerusalemu,
Mulasye nta yaanta ikunda-fo,
Kutani fyeeri fya-vayo fyafika fyeni.
Kyiimbo kya Karindaru
Vaka
5A mmbi yeu akeesha auka sakeny
Eekusingaa na nkunde wakwe?
Nndu nka
Mmbo shilekwaanta rony sindeny ya ipeera
Ando mau epookywa mmavavyo a ufee,
Yee alya kwewonikya.
6Shivika sha kiring'isyo nriminy mbwafo,
Yee, sha muuri maakony afo,
Mashika ikunda mmbo llyitiri finya sha ufu.
Kyififi, kyo nkinyaasi sha kyifu
Yaaka lya ikunda mmbo lyikee sha yaaka lya muro,
Fipala-pala fya vayo nsha fya muro ushaaka.
7Mura mwiingyi mbushiidimaa tara irumya ikunda-fo,
Naakwa mmifu na mura wa kyisye ukasha mmbushiidimaa ilyikya ikunda-fo.
Nndu kakunda yuura ikunda,
kalyitaiya masaa akwe moose deny.
Kindo ashekyiwonisaa nkyiila kyeni.
Vakwaani na nndu nka
8Lutiri mfwamaye weeru n-du,
kulaore ammesa mavee.
A ndesa mmbo luntannyaa-kyi mfwamaye weeru
Nkonu ashaalyikwaa?
9Kwakooya akee isimamba,
Mmbo lweentannyaa uroro lwa fesa,
Na kwakooya mmbo eekee ipoo,
Lwenringaa na mapau a mieresi.
Nndu nka
10Yeny mmbo sheekee isimamba,
Na mavee akwa sha ngyuroro ta vayo.
Mbee ya miso a nkunde wakwa,
Mmbo sheekee sha mwiende urilalyi.
Nndu nsoro
11Solomony eetiri irema lya misabibu,
Kulya Baal-hamoni.
Kaara-fo varingyi,
Wo umwi waawo kataa fiparwe fya fesa.
12Irema lyakwa lya misabibu ni irema lyakwa shimuni,
Kya dede llyakwa mmuni!
Naasa yewe Solomony, kukaye na fiku fyafo fya fesa,
Na wo nringyi wa ndunda naniingwa weesi lwakwe lwa mayana avii.
13Yewe kukee nreminy,
mbuya takwa mmbo vakee yaarannya unyanga lwafo;
A nkye na yeny shikwaarannyi-dwa!
Nndu nka
14Osho swany-te nkunde wakwa
Sha sunu ao kyinaamburi
urorony lwa mafumbu a mafura atiri mfwaamu nsha.
Currently Selected:
KYIIMBO KYA FIIMBO 8: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
