ISAYA 1

1Ukisuku lwa Isaya mwana wa Amosi, llukeyaamba findo fyetanyika Yuda na Yerusalemu kyeeri Usia, Yotamu, Ahasi na Esekia vekee vamangyi va Yuda.

Iruva Asakira Vandu Vakwe

2Nndumi Iruva aamba, “arannyiny, yeni ngyina! Loota karwi na yewe uruka! Vandu valya vakwa shilevakapannya na ivalela vanshikapa mungo. 3Kyoongo mmbo kyiishi muni kyoongo, na nshungu ukamanya yeto mwiiniinga kyeelya; indi Israeli mmbeeshi-fo, vandu vakwa mmbakeemanya tere-fo.”

4Yeni Isanga ilyang'a! Vandu valyamari va ngyeeri ya vandu valyang'a, vana mutanaa makasha! Mulelema Nndumi Iruva waany, mukeenyala yeto Mweele nnu, mukankapa mungo, Nndumi Iruva wa Israeli. 5Nkyikyi elyi mwiifo mwiisakyaa na yeengera ishikapa mungo? Nrwe moose mmbo ulwee na nrima ukarovywa mfyoova. 6Kupooka uvayo kundefika nrweny wo ando mwiili moose mmbo ulwee, wo ando mmbo samu ikeeshoshoka, kuleefo mwiifinga fishavere efyo nta mwiifyaamba mafura.

7Uruka lukaaluwa marama lulatiri vandu, miri ikakorwa na muro na kulya kwany kukasamya-fo vandu vengyi uruka lwany lukamamitwa. 8Muri wa Yerusalemu ukarewa-u sha nndu asomuka iviony lyakwe kundo aremmyi matongoryo, kukarewa marama. 9Kukooye kulaore Nndumi Iruva wa Matorito alelureeya-fo maata, mmbo lweeva sha Sodoma, neevaka Gomora.

10Arannyiny irero lya Nndumi Iruva, yeni vashilyi va Sodoma. Looteny maarwi any mwaarannyi miloshye ya Iruva, eni vandu va Gomora. 11Nndumi Iruva mmbo aamba: “Wiingyi lwa firaso fyany kwakwa nkyokyi? Mmbo shilemmbwarya firaso fyeekora fimaaye fya ndafu na firaso fyiingyi fya moonri any alatiri mfere, nshikunndye samu ya shau ao suva ao ndafu-fo. 12Nkyokyi mukesheengye! Mmbi yeto amuninga muumu weesha na ivavara yefo yeemeny kwakwa? 13Mulashe lyingyi kwakwa isheengye firaso fyany-fo, nshikunndye ubani-fo. Lakaniny na sukukuu ta mwiiri mwiiya na sukukuu ta Sabato, nta ikwaanu lya mwiinndye-fo, mashika nshikunndye mwiinndye ukensasande na ulyamari-fo. 14Mmbo shisuuye sukukuu tany ta mwiiri mwiiya, findo efyo mmbo nrima wakwa ufisuuye. Fikashirovya nrima wakwa, fikashiniinga maariso muuny wakwa. 15Kyeeri mushoorwa maako any mwiishiterevaa mmbo shimusurumaa kisangu kyakwa. Naakwa mwashitereva kyi-kwi nshimwaarannyaa-fo, mashika maako any mmbo akeefwaama samu. 16Kusangyeny mukakwiilyisa muveni! Lakaneny na efyo fya ulyamari usanguny lwakwa, nta mulatani lyingyi ulyamari. 17Kulosheny itana mesha, kundeny fya usumanu, reny isarya vandu mutarami vana va ngwera ikapannya nka wa ding'u.”

18Nndumi Iruva aamba, “Oshony, lureryani naakwa ulyamari lwafo lwadodora dawa mmbo lushevaa waa pyany sha kyaamwi, naakwa lwadodora mmbo lushefwanaa sha pafta. 19Kwakooya kwakunyiisa na yiirikya mmbo kushelyaa mesha a ulana. 20Indi kwakooya kwalema neekurosa, mmbo kushewaawa na usu. Ni Yeny Nndumi Iruva shaamba.”

Muri uraaye ulyamari

21Muri ulya wekee nsha indo, ulaalu wammaluka isonga, kweiishwe usumanu na wiitanu ulaalu kwammaluka kwa vaala shya. 22Fesa yaany yammaluka kirashi na mfinyu mweetiri ukavikwa mura. 23Vasongoru vany vakakulunga na manyinyi vakaakana nawo. Wo umwi kakunda iwarya findo fya kisurukumu, neetereva findo fya pya. Mmbakekyikapannya ngwera nta vaka va ding'u-fo.

24Kweekyo, Nndumi, Nndumi Iruva wa matorito, muni finya wa Israeli aamba, “Ni kuti shivapusuye nyashi yakwa, vakiduva eva, nta valakiidima-se isalala lyingyi. 25Mmbo nshoorwa woko lwakwa uwe yaany shimusangye kyirinda ekyo mufwani mwiile pyai sha nndu asinga minya ikeela deny. 26Shishemuniinga valeti vany sha valya mweetiri llya mbee, amwi na vasongoru veemutetera sha llya kasha. Llyo Yerusalemu ushevaangwa muri wa urilalyi muri wa usumanu.”

27Sioni mmbo isheturunyaa kwa usumanu lwawo, urilalyi mmbo lukyiraa yevo vakuryaa. 28Vandu mbafu na valyamari woose mmbo vasherumatwaa na lyimwi, neewo vasheenda kilasha na mavavaso a Iruva woose vashewaawa.

29Mmbo kishevaa usutu kwany, kimaruma kya mialoni ilya mwekunndye kikailannya na yiinndya maruva engyi. 30Mmbo mushevakaa mwaloni wakorwa ni mwi na nnda watura mura wa inisa. 31Valya vatiri finya mmbo vashevakaa mare moomu, mashora awo ave sha sise ta muro varumake amwi na mitannyi yaawo nta valalollyaa mwiivatarama.

Currently Selected:

ISAYA 1: MAS2

Highlight

Copy

Compare