KYIIMBO KYA FIIMBO 5
5
Nndu Nsoro
1Mmbo shikee yaanga nnda wakwa,
mfwama wakwa tindi ya walyi.
Mmbo shikee isangyirya mane-mane na fyuungo
Mmbo shikee ilya irana lyakwa lya ukyi,
mmbo shikee ina mfinyu wakwa na malela akwa.
Nndu nka
Kulyiyyeny yeni mbuya takwa kuniyyeny,
Kuniyyeny deny vakunde vakwa.
Kyiimbo kya Kaana
Nndu Nka
2Mmbo shelala, kya indi nrima wakwa mmbwelala tara-fo.
Unyanga lwa nkunde wakwa mmbo lweekee ishivaanga.
Nndu Nsoro
Shiruya mfwama wakwa, nkunde wakwa, tindi yakwa ya walyi,
Mbeta yakwa kulatiri mbese.
Nrwe wakwa mmbo wampwaa laura
Na fii takwa uraranya lwa kio.
Nndu Nka
3Ulaalu mmbo shammaa ikwaammbwa soori takwa toose,
Mmbo shitiraa inda lyingyi?
Ulaalu mmbo shammaa isangya marende akwa,
Mmbo shiateffwe inda lyingyi?
4Nkunde wakwa kapaana ipoo na woko lwakwe,
Nrima wakwa ukaishwa nsia deny.
5Shakwiipoo shu naambo shiruye nkunde wakwa ipoo,
Maakony akwa mmbo sherye mane-mane,
Na efo mini yakwa mmbo shekeshoshota mane-mane,
Shatira nsiria naambo shirwe ipoo.
6Sharuya nkunde wakwa ipoo,
Kyaindi shakooya nnyakyi-yo-fo,
Nrima wakwa mmbo weefurye deny kyeeri eekee irera!
Shanruuya shilallollye;
Shammbaanga nalashirikye.
7Varingyi va muri mmbo veshilollya,
Kyeeri veesengetyaa muriny;
Vakashikapa kutani shavina, shava na fishavere
Varingyi va ngiri vakashisoka shela yakwa.
8Mmbo shamutereva yeni vaka va Yerusalemu,
Mukallollya nkunde wakwa,
Mwoongoyeny sheelyi mmbo shallwaa kyuumu kimaruma kya ikunda.
Vaka
9Nkunde yeto kullanngye ngota vaka woose!
Nkyoki nkunde yeto wafo atiri kilanya ya vakunde vengyi,
Kutani kwalutereva na nrima indo?
Nndu nka
10Nkunde wakwa mmbo akee nsha na nnyatiri finya,
Mmbo eeshikwaa nnang'ani ya vomi fiku ikumi.
11Nrwe wakwe mmbo ukee nsha sha saabu shisha,
Fii takwe ntivakye ukoka,
Mmbo tifwani shuu piti sha ikukuru.
12Miso akwe mmbo akee sha mbeta tikee mbaa-mbaa ya kishoro,
Sha mbuku takusangya na malela mbai ya kishoro.
13Ngushu takwe mmbo tivakye matuta a rihani,
Sha nnda wiishwe mafura afwaama nisha na mane-mane,
Firomu fyakwe nsha fivaro fya liilyi,
Mmbo fikee isina mane-mane.
14Maako mmbo akee maambike maambo a saabu shishope nisha,
Mmbo aree soori shisha ta wuuru ta Tarshishi
Nyakee mwoorotu karendeya sha mbembe ta shofu
Tikee tishope nisha na findo fya wuuru uniini fya fwana ya buluu.
15Marende akwe nsha ngo ta maru-maru
tisaleesyo saabuny,
Mmbo avakkye Lebanoni,
Kava nsha ngota mieresi.
16Kana kyakwe mmbo kiishwe marero arolaa,
Kya dede ni nsha kyuumu,
Naasany ni indo nkunde wakwa akai,
Yee, nyendo akai mbuya yakwa,
Yeni vaka va Yerusalemu.
Currently Selected:
KYIIMBO KYA FIIMBO 5: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
