KYIIMBO KYA FIIMBO 4
4
Nndu nsoro
1Kya dede mmbo kukee nsha nnu nkunde wakwa,
Kya dede kukee nsha!
Miso afo mmbo akee sha a mbeta
Numa ya shela yafo,
Fii tafo nsha ironda lya mburu
Tishoolokaa tuuka mafumbuu a Gileadi.
2Mayoo afo mmbo akee sha moonri a kyika moote mafwaa
Akeeyooloka emmaa isanngywa.
Wo lyimwi mmbo lyifeiye maasa,
Na nkwiifo nta lyimwi ngurana ya vayo ifiye-fo.
3Firomu fyafo mmbo fikee sha usiro ludodorye,
Kana kyafo mmbo kisennyi nnu-dwa.
Numa ya shela yafo,
Ngushu tafo mmbo tikee sha fyenga fivii fya ndunda shirenderi.
4Singo yafo mmbo ikee sha nnara wa Davidi,
Ukeensongosye weesuruma fisha,
Na ngawo kyiku kyimwi tikanunutwa-fo,
Toose tikava ta vandu va ngala
5Mavee yafo mmbo akee sha maasa a sunu,
Ashiiswaa fivarony fya liilyi
6Mmbo shikaa ifumbuny lya mane-mane,
Na lya ubani kutani kwakya ngama nraasi
Na kyeende saa kiparikye.
7Lola shaasa kukee nsha-te nkunde wakwa,
Yewe nkutiri teve tara-fo.
8Osho tindi yakwa ya wallyi lukummbwe Lebanoni,
Yewe na yeny lulakani Lebanoni.
Oloka kuuka urorony lwa ifumbu lya Amana,
Uka urorony lwa Seniri na Hermoni,
Uka mbangeny ya miiso,
Uka ifumbuny lya nyamandu.
9Mmbo kwamfurisa nrima wakwa, mfwama-akwa tindi ya walyi,
Nkwashifurisa nrima wakwa elyi kwashilola lyimwi-nsi,
Na lyingyi-da kimaruma kya nse yeto wafo singony.
10Mfwama wakwa tindi ya walyi;
Ikunda lyafo mmbo lyirolaa kyuumu,
Mmbo lyisennyi ngota mfinyu,
Mfwaamu wa mafura afo mesha mmbo eelannyi kindo kyingyi kyoose.
11Firomu fyafo mfyashoshota ukyi, yee tindi ya walyi lwakwa,
Ulumi lwafo mmbo lutiri ukyi na malela.
Mfwaamu nsha wa soori tafo nsha va Lebanoni.
12Mfwama wakwa, yee tindi ya walyi,
Ni nnda ukusurummyi
ni nnda nshope,
Ni usoka kulaore lulempaanwa.
13Maa tafo ni nnda wa ndunda shirenderi tivaramaa,
Amwi na ndunda shisha ngota tingyi toose, ina na nardo.
14Nardo na safarani, surumuta na ndalasini,
mane-mane na udi,
Na fimu fingyi fitiri mfwaamu nsha.
15Mmbo kukee usoka lwa nnda,
Kirori kya mura utiri muu,
Soko tisheeta mura uka kulya Lebanoni
Nndu nka
16Ona-te yewe uraato lwa taari ya ndoo,
Osho-te, yewe uraato lwa taari ya sinde;
Oneny kya nnda wakwa,
Iishureny ngina mfaamu nsha wa mafura akwe.
Nkunde wakwa akusheye nndeny mmbwakwe,
Alye ndunda takwe tisha ngota tingyi toose.
Currently Selected:
KYIIMBO KYA FIIMBO 4: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
